މަނަދޫ އަޒީގެ ޅެންހާރު: މާތްވި ޤުރުއާނުން

*ރާގު! ޢިޝްޤުނުވިނަމަދޭހުގައި…

މާތްވި ޤުރްއާނުންލިބޭ ފިނިކަން ހިތަށް ހޯދާލަމާ
ގާތްކަމެއް އެފޮތާއިމެދު އަބަދާއަބަދުވެސް ބާއްވަމާ

ދެދުނިޔޭގެ ސަލާމަތަށް އެދެމުންމިދާ އަޚް އުޚްތުނޭ 2
(އެދެމުންމިދާ އަޚް އުޚްތުނޭ)
މިދުނިޔޭގައި ތިބިދުވަހު މިފޮތަށް ސަމާލުކަމެއްދެމާ
ދުނިޔެވީމައިދާނުގައި ހޯދޭނެފަހިކަން ހޯދުމަށް 2
(ހޯދޭނެފަހިކަން ހޯދުމަށް)
އުނިނުވާފުން ހިތުގެ އީމާނާ މިފޮތް ގުޅުވާލަމާ
ހިތްތަކުގެ ނޫރެއްކަމަށްވާ މާތްކަލާމު ﷲ އަށް 2
(މާތްކަލާމު ﷲ އަށް)
ހިތްތަކުގެ ލޯތްބާއި ޤަދަރާ އިޙްތިރާމުދެމުންދަމާ
ބަލިތަކަށްއޮތް އެންމެމަތިވެރި ވީ ޝިފާކަމުގައިވުމުން 2
(ވީ ޝިފާކަމުގައިވުމުން)
ހަލިޝިފާއަށްއެދި ކިޔާލަން ހިނދުކޮޅެއް ހުސްކޮށްލަމާ
އެންމެފުރިހަމަވީ ފަޞާޙަތް އަދި ބަލާޣާތްތެރި މިފޮތް 2
(އަދި ބަލާޣާތްތެރި މިފޮތް)
އެންމެއިސްކަންދީ ތިލާވަތުކުރުމުގައި ދެމިހުންނަމާ
ކޮންމެދުވަހަކު އެންމެ ޞަފްޙާއެއްވިޔަސް ކިޔެވުންމަތީ 2
(އެއްވިޔަސް ކިޔެވުންމަތީ)
ކޮންމެދުވަހަކު ސާބިތުވެ މިކަމުގެރޭ ދެމިހުންނަމާ
ހިތުގެ އީމާންގަދަވެ މާތް ﷲ އަށް ކުއްތަންވުމާ 2
(ﷲ އަށް ކުއްތަންވުމާ)
އިބްތިހާލުވުމަށް ލިބޭމީ ފުރްޞަތެއްކަން ދަންނަމާ
މަޙްޝަރުގެ މައިދާނުގައި ޤުރްއާން ޝަފާޢަތްދޭނެތީ 2
(ޤުރްއާން ޝަފާޢަތްދޭނެތީ)
މަޙްޟުއިޙްސާނާއެކީ އަބަދަށްމެ ރައްކާތެރިވަމާ

5 ޖަނަވަރީ 2025
*عبدالعزيز قاسم
ލިލީ ނ.މަނަދޫ