އަލް-މަޔާދީން އަށް ލިބިފައިވާ މަޢުލޫމާތުގެ މައްޗަށް ބިނާކޮށް، ޣައްޒާގައި ހިނގަމުންދާ ހަނގުރާމަ ހުއްޓުވުމަށް އިސްރާއީލާއި ފަލަސްތީނުގެ ދެމެދުގައި އެއްބަސްވެވުނު އެއްބަސްވުމުގެ މުހިންމު ނުކުތާތައް ހާމަކޮށްފިއެވެ.
މި އެއްބަސްވުމުގައި 11 މާއްދާ ހިމެނޭ ކަމަށާއި، މިއީ ދެމެހެއްޓެނިވި ހައްލެއް ހޯދުމަށް އެޅޭ މުހިންމު ފިޔަވަޅެއް ކަމުގައި ބެލެވެއެވެ.
އެއްބަސްވުމުގެ މުހިންމު ބައިތަކުގެ ތެރޭގައި:
1. އިސްރާއީލުގެ ސިފައިން ޣައްޒާއިން އެއްކޮށް ފަހަތަށް ޖެހުން
2. ރަފާހު ބޯޑަރު ހުޅުވުން
3. ޒަޚަމްވެފައިވާ މީހުންނަށް ބޭރަށް ދިއުމުގެ ފުރުސަތު ދިނުން
4. ދުވާލަކު 600 އެހީގެ ޓްރަކު ވެއްދުމަށް ހުއްދަ ދިނުން
5. 200،000 ޓެންޓާއި 60،000 ކެރެވާން ވެއްދުން
6. ބަންދުގައި ތިބި 1،000 ފަލަސްތީނު މީހުން ދޫކޮށްލުން
7. އިސްރާއީލުގެ ޖަލުތަކުގައި ތިބި އަންހެނުންނާއި 19 އަހަރުން ދަށުގެ ކުޑަކުދިން ދޫކޮށްލުން
8. ނެޓްޒަރިމް ކޮރިޑޯއާއި ފިލަޑެލްފިއާ ރޫޓުން އިސްރާއީލުގެ ސިފައިން ފަހަތަށް ޖެހުން
9. ގެދޮރު ގެއްލިފައިވާ މީހުން އަނބުރާ ގެތަކަށް ފޮނުވުން
10. ދުވާލެއްގެ މައްޗަށް 8-10 ގަޑިއިރު ޣައްޒާގެ މަތިން ހަނގުރާމައިގެ މަތިންދާބޯޓުތައް ނުދުއްވުން
11. ޣައްޒާގެ ހުރިހާ ހޮސްޕިޓަލްތަކެއް އަލުން ބިނާކުރުން
މި އެއްބަސްވުން ތަންފީޒުކުރުމުގެ ފުރަތަމަ މަރުހަލާގައި 33 އިސްރާއީލު އަސީރުން ދޫކޮށްލެވޭނެ ކަމަށާއި، މި މަރުހަލާ 6 ހަފްތާ ދެމިގެންދާނެ ކަމަށް ބުނެފައިވެއެވެ. އަދި ދެން އަންނަ މަރުހަލާތަކުގައި އިތުރު 66 އަސީރުން ދޫކޮށްލެވޭނެ ކަމަށްވެސް ބަޔާންކޮށްފައިވެއެވެ.
މި އެއްބަސްވުމަކީ ގިނަ ދުވަސްތަކެއް ވަންދެން ކުރެވުނު މަޝްވަރާތަކަކަށްފަހު ވެވުނު އެއްބަސްވުމެއް ކަމަށާއި، މިއީ ހަނގުރާމަ ފެށުނީއްސުރެ އެންމެ ގިނަ އިސްރާއީލު އަސީރުން ދޫކޮށްލެވޭ އެއްބަސްވުން ކަމަށްވެސް ފާހަގަކުރެވެއެވެ.
