ބޭންކު އޮފް މޯލްޑިވްސް (ބީއެމްއެލް) އިން ގެދޮރު އެޅުމަށާއި ފްލެޓް ގަތުމަށް ދޫކުރާ ލޯނު ސްކީމްތަކަށް ރައްޔިތުންނަށް ރަނގަޅު ބަދަލުތަކެއް ގެނެސްފިއެވެ.
މި ބަދަލުތަކާ ގުޅޭގޮތުން ބޭއްވުނު ނޫސްވެރިންގެ ބައްދަލުވުމުގައި، ބީއެމްއެލްގެ ރީޓެއިލް ބޭންކިން ޑައިރެކްޓަރ ބަދުރުއްދީން ވިދާޅުވީ، މި ބަދަލުތައް ގެނެވިފައިވަނީ ރައްޔިތުންގެ ގެދޮރުވެރިކަން އިތުރަށް ޔަޤީންކޮށްދިނުމަށާއި، ގެދޮރު އިމާރާތްކުރުމުގެ ފުރުޞަތުތައް ފަހިކޮށްދިނުމުގެ މަޤްޞަދުގައި ކަމަށެވެ. މި ބަދަލުތަކާއެކު ލޯނުތައް އަގުހެޔޮވެ، މަހުން މަހަށް ދައްކަންޖެހޭ އަދަދު ކުޑަވެގެންދާނެ ކަމަށާއި، އިޤްތިޞާދީ ދުވެލި ހަލުވިވެގެންދާނެ ކަމަށް އެމަނިކުފާނު ފާހަގަކުރެއްވިއެވެ.
ބީއެމްއެލް އިސްލާމިކްގެ މެނޭޖަރ މަރިޔަމް ޝިރާނީ ވިދާޅުވީ، މި އައު ބަދަލުތަކާއެކު ބިމާއި ޕާކިންގ ސްޕޭސް ގަތުމަށްވެސް ލޯނު ލިބޭނެ ކަމަށެވެ. އަދި ޑައުންޕޭމަންޓްގެ އަދަދުތަކަށްވެސް ލުއިތަކެއް ގެނެވިފައިވާ ކަމަށް އޭނާ ފާހަގަކުރެއްވިއެވެ. މިގޮތުން، 3 މިލިއަން ރުފިޔާއަށްވުރެ ދަށުގެ ތަންތަނަށް 10 އިންސައްތައިގެ ޑައުންޕޭމަންޓަކާއެކު ލޯނު ނެގޭނެއެވެ.
މީގެ އިތުރުން، ގެދޮރު މަރާމާތުކުރުމަށް ދޫކުރާ ލޯނުތަކުގެ މުއްދަތު 15 އަހަރުން 20 އަހަރަށް އިތުރުކުރެވި، ނެގޭނެ އެންމެ މަތީ އަދަދު 15 މިލިއަން ރުފިޔާއިން 45 މިލިއަން ރުފިޔާއަށް އިތުރުކުރެވިފައިވެއެވެ. އަދި ގެދޮރު އިމާރާތްކުރުމަށް ދޫކުރާ ލޯނުގެ އެންމެ މަތީ އަދަދު 2 މިލިއަން ރުފިޔާއަށް އިތުރުކޮށް، ޝަރުތު ހަމަވާ އާމްދަނީގެ މިންގަނޑު ދަށްކޮށްފައިވާކަން ފާހަގަކުރެވެއެވެ.
މި ބަދަލުތަކަކީ ރާއްޖޭގެ ގެދޮރުވެރިކަމުގެ ދާއިރާއަށް އައު ހިތްވަރަކާއި ކުރިއެރުމެއް ގެނެސްދޭނެ ބަދަލުތަކެއް ކަމަށް ބެލެވެއެވެ.
