ރައްޔިތުންގެ މަޖިލީހުގެ މާލިއްޔަތު ކޮމިޓީއާއި، ޤައުމީ ސަލާމަތީ ހިދުމަތްތަކާއި ބެހޭ ކޮމިޓީ، 241 ކޮމިޓީން ހިތަދޫ މެދު ދާއިރާގެ މެމްބަރު އަޙްމަދު އަޒާން މަރުޒޫޤް ވަކިކޮށް އެ ކޮމިޓީތަކުގައި ސަރުކާރު ހިންގާ މައި ޕާޓީ، ޕީއެންސީ ތަމްސީލު ކުރާނެ އެހެން މެމްބަރުން ހަމަޖައްސައިފިއެވެ.
ޕީއެންސީގެ ޕާލިމަންޓްރީ ގްރޫޕުން އަޒާން އެ ކޮމިޓީތަކުން ދުރުކޮށްފައި މި ވަނީ، ސުޕްރީމް ކޯޓުގެ ދެ ފަނޑިޔާރަކު މަގާމުން ވަކިކުރުމަށްޓަކައި ގާނޫނު ބަދަލުކުރުމާ ދެކޮޅު ހައްދަވައި އެ ބިލާ ގުޅިގެން ޕީއެންސީގެ ޕީޖީ ގްރޫޕުން ނެރުނު ވިޕްލައިންއާ ޚިލާފުވެފައި ވަނިކޮށެވެ.
އަޒާންގެ ބަދަލުގައި މާލިއްޔަތު ކޮމިޓީއަށް ޕީއެންސީގެ ޕާލިމެންޓްރީގެ ގުރޫޕުން މިހާރު އައްޔަނުކުރައްވާފައި ވަނީ ހެންވޭރު އުތުރު ދާއިރާގެ މެމްބަރު އަޙްމަދު އައިފާނެވެ. އަދި 241 ކޮމިޓީއަށް އައްޔަނު ކުރެއްވީ ވިލިމާލެ ދާއިރާގެ މެމްބަރު މުހައްމަދު އިސްމާއީލެވެ.
ސުޕްރީމް ކޯޓުގެ ފަނޑިޔާރުންގެ އަދަދު މަދުކުރުމުގެ އިސްލާޙަށް ވޯޓު ނުދެއްވިނަމަވެސް، އަޒާން ވިދާޅުވި ގޮތުގައި އޭނާ އަދިވެސް ހުންނެވީ ސަރުކާރާއެކު ދާއިރާއަށް ތަރައްޤީ ގެންނެވުމުގެ އަޒުމުގައެވެ.
