ރިޝްވަތާއި ދިއްކޮށްލާ ލާރިކޮޅާއި ނޫނީ ޢާއިލީ ގުޅުމެއްގެ ތެރެއިންވެސް ޖަލުގެ ގޮޅިތަކުގެ ތެރެއަށް ވައްދަން މަނާތަކެތި ވެއްދުމުގެ ފުރުޞަތު އެއްވެސްވަރަކަށް ނުދެއްވުމަށް ކޮމިޝަނަރ އޮފް ޕްރިޒަންސް ޙަސަން ޒަރީރު ވިދާޅުވެއްޖެއެވެ.
ކޮމިޝަނަރ އޮފް ޕްރިޒަންސް ޙަސަން ޒަރީރު ވަނީ ޖަލުތަކަށް މަނާތަކެތި ވެއްދުމަށް އެއްވެސް ފުރުސަތެއް ނުދިނުމަށް އިންޒާރު ދެއްވާފައެވެ. މިގޮތުން ރިޝްވަތު، ފައިސާ އަދި ޢާއިލީ ގުޅުމުގެ ތެރެއިންވެސް މަނާތަކެތި ވެއްދުމުގެ ފުރުސަތު ނުދިނުމަށް އަންގަވާފައިވެއެވެ.
ޖަލު އޮފިސަރުންނަކީ 24 ގަޑިއިރު މަސައްކަތްކުރާ ޤައުމީ ބަޠަލުންކަމަށް ސީޕީ ފާހަގަކުރައްވައި، ޖަލުތަކުގައި މަސައްކަތްކުރާ 500 އެއްހާ އޮފިސަރުންނަކީ ހުވަޔާ އެއްގޮތަށް މަސައްކަތްކުރާ ހީވާގި، މުރާލި ބައެއްކަމަށް ވިދާޅުވިއެވެ. އަދި ޤައިދީންގެ އަސާސީ ޙައްޤުތައް ފޯރުކޮށްދިނުމަށް އެމްސީއެސްގެ އޮފިސަރުން ތައްޔާރަށް ތިބިކަންވެސް ފާހަގަކުރެއްވިއެވެ.
"ކަސްޓޯޑިއަލް މެނޭޖްމަންޓް އެންޑް ސެކިއުރިޓީ" ޕްރޮގްރާމްގެ 12 ވަނަ ބެޗްގެ ދަސްވެނިވުމުގެ ރަސްމިއްޔާތުގައި 15 ހަފްތާގެ ތަމްރީން ފުރިހަމަކުރި 33 އޮފިސަރުންނަށް ސެޓްފިކެޓް ދެވުނެވެ. މި ރަސްމިއްޔާތުގައި ޕެރޭޑް ޖެހުމާއި، ކޯސް ކުރިއަށްދިޔަގޮތުގެ ވީޑިއޯ ރިޕޯޓް ހުށަހެޅުން އަދި ހަޔަރ ޑިސްޓިންކްޝަން ހާސިލުކުރި ފަރާތްތަކަށް މެޑަލް ހަވާލުކުރުން ހިމެނުނެވެ.
