މިއަހަރުގެ ތެރޭގައި ރާއްޖޭގެ ހުރިހާ އަތޮޅަކަށް އާރްޓީއެލްގެ ޚިދުމަތް ފެށުމަށް، އެކަމަށް ބޭނުންވާ މަސައްކަތްތައް ކުރަމުންދާކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
ރައީސުލްޖުމްހޫރިއްޔާގެ ވަޢުދާ އެއްގޮތަށް، މިއަހަރުގެ ތެރޭގައި ރާއްޖޭގެ ހުރިހާ އަތޮޅަކަށް އާރްޓީއެލްގެ ޚިދުމަތް ފޯރުކޮށްދިނުމަށް މަސައްކަތްތައް ކުރިއަށްދާކަމަށް ދަތުރުފަތުރާ މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ހާމަކުރައްވައިފިއެވެ. މިހާތަނަށް މި ޚިދުމަތް ވަނީ އުތުރުން 4 އަތޮޅު، ދެކުނުން 4 އަތޮޅު އަދި ޅ. އަތޮޅުގައި ފަށާފައެވެ.
އާރްޓީއެލްގެ މަޝްރޫޢު އަސްލު ފަރުމާކުރެވިފައިވަނީ 2027 ވަނަ އަހަރަށް ނިންމުމަށް ނަމަވެސް، ރައީސުލްޖުމްހޫރިއްޔާގެ އިރުޝާދުގެ ދަށުން މިއަހަރުގެ ނިޔަލަށް މުޅި ރާއްޖެއަށް މި ޚިދުމަތް ފެށުމަށް މަސައްކަތްކުރެވެއެވެ. އެގޮތުން ޖޫން މަހުގައި ރ. އަދި ބ. އަތޮޅުގައި ޚިދުމަތް ފެށުމަށް ވަނީ ހަމަޖެހިފައެވެ.
މި ޚިދުމަތް މުޅި ރާއްޖެއަށް ފުޅާކުރުމަށް 70 އަށްވުރެ ގިނަ އުޅަނދު ބޭނުންވާއިރު، މިހާރު 26 ފެރީ ބޭނުންކުރެވެމުންދެއެވެ. މަސައްކަތް އަވަސްކުރުމަށްޓަކައި އިތުރު ކުންފުނިތަކާ މަސައްކަތް ހަވާލުކުރުމުގެ ފުރުސަތުތައް ބަލަމުންދާކަމަށް ވަޒީރު ވިދާޅުވެފައިވެއެވެ. މިހާތަނަށް 9 އަތޮޅެއްގެ 81 ރަށް ވަނީ އާރްޓީއެލް ފެރީގެ ޚިދުމަތުން ގުޅާލެވިފައެވެ.
