ޚާރިޖީ ވަޒީރު ޑރ. ޚަލީލާއި އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު، އިސްތަންބޫލްގައި ތުރުކީގެ ވިޔަފާރިވެރިންނާ ބައްދަލުކުރައްވައި، ރާއްޖޭގައި ހުރި އިންވެސްޓްމަންޓް ފުރުސަތުތަކުގެ މަޢުލޫމާތު ހިއްސާކުރައްވައިފިއެވެ. މި ބައްދަލުވުމަކީ ތުރުކީގެ ފޮރިން އިކޮނޮމިކް ރިލޭޝަންސް ބޯޑުން އިންތިޒާމްކޮށްގެން ބޭއްވި ބައްދަލުވުމެކެވެ.
ބައްދަލުވުމުގައި ފަތުރުވެރިކަމާއި، އިއާދަކުރަނިވި ހަކަތައާއި، ދަނޑުވެރިކަމާއި، ގެދޮރުވެރިކަމާއި، ރިއަލް އެސްޓޭޓް ވިޔަފާރި އަދި ބަނދަރު ތަރައްޤީކުރުމާއި ޓެކްނޮލޮޖީގެ ދާއިރާއިން ދެ ޤައުމުގެ ދެމެދު އިޤްތިޞާދީ ގުޅުން ބަދަހިކުރުމަށް މަޝްވަރާކުރެވުނެވެ. އިންވެސްޓް މޯލްޑިވްސްގެ ސީއީއޯ ނުހާ މުޙައްމަދު ރިޒާ ވަނީ ރާއްޖޭގައި ހުރި އިންވެސްޓްމަންޓް ފުރުސަތުތަކާ ގުޅޭ ޕްރެޒެންޓޭޝަނެއް ހުށަހަޅުއްވާފައެވެ.
އިޤްތިޞާދީ ވަޒީރު ފާހަގަކުރެއްވި ގޮތުގައި 2023 ވަނަ އަހަރުގެ ނޮވެންބަރު މަހު ސޮއިކުރެވުނު "އިކޮނޮމިކް ކޯޕަރޭޝަން" އަދި "ޕްރިފަރެންޝަލް ޓްރޭޑް" އެއްބަސްވުމަކީ ދެ ޤައުމުގެ އިޤްތިޞާދީ ގުޅުން ކުރިއަރަމުންދާކަމުގެ ހެއްކެކެވެ. ޚާރިޖިއްޔާއިން ބުނާ ގޮތުގައި މި ބައްދަލުވުމަކީ ކުރިއަށް އޮތް އަހަރުތަކުގައި ދެ ޤައުމުގެ އިޤްތިޞާދީ ގުޅުން އިތުރަށް ހަރުދަނާކުރުމަށް މުހިންމު ބައްދަލުވުމެކެވެ.
