ދިވެހިރާއްޖޭގެ ސިޔާސީވެރިންގެ އަމިއްލައެދުން ދޫކޮށް، ސިޔާސީ ގޮތުން ޚިޔާލު ތަފާތުވުމުގެ ޣާފިލުކަމުން ހޭލަން އެބަޖެހޭ ކަމަށް ވިލިމާލެ ދާއިރާގެ މެންބަރު މުޙައްމަދު އިސްމާއިލް ވިދާޅުވެއްޖެއެވެ.
21 އަހަރުގެ އަންހެނަކު ބިލްޑިންގއަކުން ވެއްޓުނު ހާދިސާއާ ގުޅުވައިގެން އެކްސްގައި ކުރެއްވި ޕޯސްޓެއްގައި، ދިވެހިރައްޔިތުން ކުރިމަތިލާ ހައްސާސް އަދި ނުރައްކާތެރި ޙާދިސާތަކުގެ މައުލޫމާތު އޮޅުންބޮޅުން އަރާ ފަދައިން ވާހަކަ ފަތުރާ މީހުންގެ ނާތަހްޒީބީ އަމަލުތައް ހުއްޓާލަން ޖެހޭކަމަށް އެމަނިކުފާނު ވިދާޅުވިއެވެ.
އޭޕްރިލް 18 ވަނަ ދުވަހު ހިނގި މި ހިތާމަވެރި ހާދިސާގެ ހަގީގަތް ހޯދަން ޖެހޭކަމަށް ފާހަގަކުރައްވަމުން، މީގެ 40 އަހަރު ކުރިން ދިވެހިންގެ މެދުގައި އޮތް ރިވެތި އާދަކާދަތައް އަލުން އާލާކުރަން ޖެހިފައިވާ ކަމަށް މުހައްމަދު އިސްމާއިލް ވިދާޅުވިއެވެ.
ކުރިއަށް އޮތް ޖީލަށް ދިވެހިރާއްޖޭގެ މުސްތަގްބަލް ހަވާލުކުރެވޭއިރު، ދިވެހިރާއްޖެއަކީ އިސްލާމީ އުސޫލުތަކުގެ މައްޗަށް ތަބާވެ، މަސްތުވާތަކެއްޗާއި ކުށްކުރުމުން ދުރުހެލިވެ، އެކަކު އަނެކަކަށް އޯގާތެރިވެ އިހްތިރާމްކުރާ ބަޔަކަށް ވާން ޖެހޭކަމަށް އެމަނިކުފާނު އިތުރަށް ފާހަގަކުރެއްވިއެވެ.
މީގެއިތުރުން، ޑިމޮކްރަސީ ނިޒާމަކީ އިސްލާމީ އުސޫލުތަކާ ދުރުހެލި ސިޔާސަތުތަކެއް އެކުލެވޭ ނިޒާމެއްކަމަށް ދެކުމަކީ، ދިވެހިރާއްޖޭގެ ސައްތައިން ސައްތަ މުސްލިމު ރައްޔިތުންގެ ތެރޭގައި ފާހިޝް އަމަލުތައް އިތުރުވެ، ކާބަފައިންގެ ފުށުން ދަސްވި ރީތި އުސޫލުތައް ނެތިގެން ދިއުމަށް މަގުފަހިވެގެންދާނެ ކަމެއްކަމަށްވެސް މުހައްމަދު އިސްމާއިލް ވަނީ ފާހަގަކުރައްވާފައެވެ.
