ރާއްޖޭގައި ކުރެވޭ ފޮރިން ޑައިރެކްޓް އިންވެސްޓްމަންޓްތަކަކީ، ދިވެހި ޒުވާނުންނަށް ވަޒީފާއާއި، ވިޔަފާރީގެ ފުރުޞަތުތައް ލިބޭނެ އިންވެސްޓްމަންޓްތަކަކަށް ވާންޖެހޭކަމަށް އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ. މިފަދައިން ވަޒީރު ވިދާޅުވެފައިވަނީ މިއަދު ބޭއްވުނު މާފަރު އިންޓަނޭޝަނަލް އެއަރޕޯޓް ތަރައްޤީކޮށް ނިންމުމުގެ ރަސްމިއްޔާތުގައެވެ.
ވަޒީރު މުއްޠަލިބް ވިދާޅުވި ގޮތުގައި ރައީސުލްޖުމްހޫރިއްޔާ ޑރ. މުހައްމަދު މުޢިއްޒުގެ ސަރުކާރުގެ ސިޔާސަތަކީ ރާއްޖެއަށް އަންނަ ތަރައްޤީއާއެކު ދިވެހި ރައްޔިތުންގެ ދިރިއުޅުމުގެ ފެންވަރު މަތިކުރުމެވެ. އެގޮތުން ރާއްޖޭގައި ކުރެވޭ އެފްޑީއައި އިންވެސްޓްމަންޓްތަކަކީ ހަމައެކަނި ދައުލަތަށް ޓެކްސް ފައިސާ ހޯދުމުގެ ވަސީލަތަކަށް ވެގެން ނުވާނެކަމަށް ވަޒީރު ފާހަގަކުރެއްވިއެވެ.
މާފަރު އެއަރޕޯޓް މަޝްރޫޢުއާ ގުޅޭގޮތުން ވާހަކަފުޅު ދައްކަވަމުން ވަޒީރު ވިދާޅުވީ، "މިއަދަކީ ދިވެހިރާއްޖޭގެ ތަރައްޤީގައި ނ. އަތޮޅުގެ މުހިއްމުކަން ރަމްޒުކޮށްދޭ ދުވަހެއް. މިއަދަކީ ނ. އަތޮޅުގެ ރައްޔިތުންނަށް ފާގަތި މުސްތަޤުބަލެއްގެ އުންމީދު އާކޮށްދޭ ދުވަހެއް" ކަމަށެވެ. އަދި ނ. އަތޮޅަކީ ޤުދުރަތީގޮތުން އޮތް އެންމެ ރީތި އަތޮޅުކަމަށާއި، ދުނިޔޭގެ އެންމެ މަތީ ފެންވަރުގެ އެތައް ރިސޯޓްތަކެއް އޮތް އަތޮޅެއްކަންވެސް ފާހަގަކުރެއްވިއެވެ.
ވަޒީރު އިތުރަށް ވިދާޅުވި ގޮތުގައި ރާއްޖެއަށް އަންނަ ތަރައްޤީއަކީ އާންމު ރައްޔިތުން ހަމައެކަނި ބަލަން ތިބޭ ތަރައްޤީއަކަށް ވެގެން ނުވާނެއެވެ. އެހެންކަމުން ނ. އަތޮޅުގައި ދުނިޔޭގެ ފެންވަރުގެ ރިސޯޓްތަކަށް ޚިދުމަތް ކުރުމާއި، ވިޔަފާރިތަކަށް އިތުރު ފުރުޞަތުތައް ހޯދައިދީ، ރިސޯޓްތައް ތަރައްޤީކުރުމަށް އަންނަ ފަރާތްތަކާ ގުޅިގެން ރަށްރަށުގައި ވަޒީފާގެ ފުރުޞަތުތަކާއި ވިޔަފާރީގެ ފުރުޞަތުތައް އިތުރުކުރެވިދާނެކަމަށް ވަޒީރު ފާހަގަކުރެއްވިއެވެ.
މިވަގުތު ނ. އަތޮޅުގައި އެތައް މިލިޔަން ޑޮލަރުގެ އިންވެސްޓްމަންޓްތަކެއް ހިނގަމުންދާކަން ފާހަގަކުރައްވައި، އެ އަތޮޅަށް އަންނަ ތަރައްޤީގެ ފޮނިމީރުކަން އެއަތޮޅުގެ ކޮންމެ ރައްޔިތެއްގެ ދިރިއުޅުމަށްވެސް ލިބޭނެ ގޮތް ހެދުމަކީ މުހިންމު ކަމެއްކަމުގައި ވަޒީރު މުއްޠަލިބް ވިދާޅުވިއެވެ.
