މާލޭ ބޮޑުތަކުރުފާނު މަގުގެ އުތުރު ސަރަހައްދު ތަރައްޤީކުރުމުގެ މަޝްރޫޢުގެ ދަށުން މިހާތަނަށް 24 މީޓަރުގެ ސަރަހައްދެއްގައި ޝީޓް ޕައިލްކުރުމުގެ މަސައްކަތް ނިންމައި، އެއްގަމު ތޮށި ތަޅާލުމުގެ މަސައްކަތް ވަނީ ނިންމާލެވިފައިކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މިއަދު ހާމަކުރައްވައިފިއެވެ.
މިދިޔަ ބުރާސްފަތި ދުވަހު ފެށުނު މި މަޝްރޫޢަކީ 144 މިލިއަން ރުފިޔާއަށްވުރެ ބޮޑު އަގެއްގައި އެމްޓީސީސީއާ ހަވާލުކުރެވިފައިވާ މަޝްރޫޢެކެވެ. މި މަޝްރޫޢުގެ ދަށުން 830 މީޓަރުގެ ސަރަހައްދެއް ތަރައްޤީކުރެވޭއިރު، އޭގެ ތެރެއިން 737 މީޓަރުގެ ސަރަހައްދެއްގައި ޝީޓް ޕައިލް މަސައްކަތް ކުރުމަށް ވަނީ ހަމަޖެހިފައެވެ.
މި މަޝްރޫޢުގެ މައިގަނޑު މަސައްކަތްތަކުގެ ތެރޭގައި މަގު 4 ލޭނަށް ތަރައްޤީކުރުމާއި، ހިނގާ މީހުންނަށް ވަކި ލޭނެއް ޤާއިމުކުރުމާއި، ފެން ހިންދާ ނިޒާމެއް ޤާއިމުކުރުން ހިމެނެއެވެ. މި މަސައްކަތްތައް ނިންމުމަށް އެމްޓީސީސީއަށް ދެވިފައިވަނީ 1 އަހަރާއި 3 މަސް ދުވަހުގެ މުއްދަތެކެވެ.
We have completed 24 meters sheet piling works and now commenced the demolishing of the quay wall capping for the segment 1 area of the Boduthakurufaanu north side road development project.
This transformative project will enhance accessibility in Malé City through the… pic.twitter.com/42T2tOMF7C
— MTCC Plc (@MTCCPlc) August 26, 2025
ސަރުކާރުން ފާހަގަކުރައްވާ ގޮތުގައި މި މަޝްރޫޢު ނިމުމުން މާލޭގެ މަލަމަތި ރީތިވުމުގެ އިތުރުން، ކޮންމެ ދުވަހަކު އެތައް ސަތޭކަ ބަޔަކު ބޭނުންކުރަމުންދާ މި ސަރަހައްދުގެ ތޮއްޖެހުން ވަރަށް ބޮޑަށް ކުޑަވެގެންދާނެއެވެ. "މި ސަރަހައްދަކީ ސަރުކާރާއި އަމިއްލަ ފަރާތްތަކުގެ ގިނަ އޮފީސްތަކާއި، މާލޭ މަސްމާރުކޭޓު އަދި ދަތުރުވެރިންގެ މާރުކޭޓު ހިމެނޭ ސަރަހައްދަކަށްވުމާއެކު، މި ތަރައްޤީގެ ސަބަބުން ގިނަ ބަޔަކަށް އޭގެ ލުއިފަސޭހަކަން ލިބިގެންދާނެ" ކަމަށް ސަރުކާރުން ވިދާޅުވެފައިވެއެވެ.
މި މަޝްރޫޢަކީ މާލޭ އުތުރުން ބޮޑުތަކުރުފާނު މަގު ހެދުމުގެ މަޝްރޫޢުގެ ފުރަތަމަ ފިޔަވަހީގެ ބައެއްކަން ފާހަގަކޮށްލެވެއެވެ.
