އޮޑިޓަރ ޖެނެރަލް އޮފީހުން ނެރެފައިވާ މިދިޔަ އަހަރުގެ ކޮމްޕްލަޔަންސް އޮޑިޓް ރިޕޯޓުން ދައްކާގޮތުގައި، 2023 ވަނަ އަހަރު ވަޒީފާއާބެހޭ ޓްރައިބިއުނަލުން 273 މައްސަލަ ނިންމާފައިވެއެވެ.
ދިވެހިރާއްޖޭގެ ވަޒީފާގެ މައްސަލަތައް ބެލުމަށް ޤާނޫނީ ގޮތުން އުފައްދާފައިވާ ވަޒީފާއާބެހޭ ޓްރައިބިއުނަލަށް މިދިޔަ އަހަރު 277 މައްސަލަ ހުށަހެޅިފައިވެއެވެ. މިއީ އޭގެ ކުރީ އަހަރު ހުށަހެޅުނު 200 މައްސަލައާ އަޅާބަލާއިރު 38.5 އިންސައްތައިގެ އިތުރުވުމެކެވެ.
އޮޑިޓް ރިޕޯޓުން އިތުރަށް ހާމަކޮށްފައިވާ ގޮތުގައި، 2023 ވަނަ އަހަރާ އަޅާބަލާއިރު މިދިޔަ އަހަރު ނިންމި މައްސަލަތަކުގެ އަދަދު ވަނީ 2.5 އިންސައްތަ ދަށްވެފައެވެ. 2023 ވަނަ އަހަރު ޓްރައިބިއުނަލުން ވަނީ 280 މައްސަލަ ނިންމާފައެވެ.
މިދިޔަ އަހަރުގެ ނިޔަލަށް ގޮތެއް ނުނިންމި 244 މައްސަލަ އޮތްކަމަށް އޮޑިޓް ރިޕޯޓުން ދައްކައެވެ. މީގެ ތެރޭގައި 2023 ވަނަ އަހަރު ހުށަހެޅުނު މައްސަލަތަކުގެ ތެރެއިން ގޮތެއް ނުނިމި އޮތް 124 މައްސަލަވެސް ހިމެނެއެވެ.
އޮޑިޓަރ ޖެނެރަލް އޮފީހުން ފާހަގަކޮށްފައިވާ ގޮތުގައި، މިދިޔަ އަހަރު ވަޒީފާއާބެހޭ ޓްރައިބިއުނަލުން ޚަރަދުތައް ކޮށްފައިވަނީ ކަނޑައެޅިފައިވާ ބަޖެޓާއި އެއްގޮތަށް، ޤަވާއިދުތަކާ އެއްގޮތްވާ ގޮތުގެ މަތިންނެވެ.
ވަޒީފާއާބެހޭ ޓްރައިބިއުނަލަކީ ރައީސުލްޖުމްހޫރިއްޔާ އައްޔަންކުރައްވާ 7 މެންބަރުންގެ މައްޗަށް އެކުލެވޭ މުއައްސަސާއެކެވެ. މި މުއައްސަސާގެ މައިގަނޑު މަޤްޞަދަކީ ވަޒީފާގެ މާހައުލުގައި އުފެދޭ މައްސަލަތައް ވީހާވެސް އަވަހަކަށް ބަލައި ނިންމުމެވެ.
