ރައީސް އިބްރާހީމް މުޙައްމަދު ސާލިހުގެ ވެރިކަމުގެ ދައުރުގައި ވައްކަމުގެ އަމަލުތައް ހިންގާފައިވާ ކަމަށާއި، އެކަން ހެއްކާއެކު ފެނިގެންދާނެކަމަށް ޕީއެންސީގެ ޕީޖީ ލީޑަރު އިބްރާހީމް ފަލާހް ވިދާޅުވެއްޖެއެވެ.
ރައީސް ޑރ. މުހައްމަދު މުއިއްޒުގެ ސަރުކާރު ހަމަމަގަށް އެޅުވުމަށް ކަމަށް ބުނެ އެމްޑީޕީން އޮކްޓޫބަރު 3 ވަނަ ދުވަހުން ފެށިގެން މަގުމަތީގެ ހަރަކާތްތައް ކުރިއަށް ގެންދިއުމަށް ނިންމާފައިވާއިރު، ފަލާހު ވަނީ ސޯޝަލް މީޑިއާގައި އާންމުކުރެއްވި މެސެޖެއްގައި އެ ޕާޓީގެ ވިސްނުމަށް ފާޑުވިދާޅުވެފައެވެ.
"މި ދައުރުގައި ޕީއެންސީގެ ސަރުކާރުން ގައުމު ލޫޓުވާލައިފި ކަމަށް ބުނެ އެމްޑީޕީން ވާހަކަތައް ދެއްކުން ރީއްޗެއް ނޫން،" ފަލާހު ވިދާޅުވިއެވެ. އަދި އެމްޑީޕީގެ ވެރިކަމުގައި މުޅި ގައުމު އެއްކޮށް "ދަވާލާފައި" ވާކަން ފާހަގަކުރެއްވިއެވެ.
ފަލާހު ވިދާޅުވި ގޮތުގައި، އެކި ކަންކަމުގައި ބަދަލު ދިނުމުގެ ނަމުގައި އެކަނިވެސް އެ ދައުރުގެ ތެރޭގައި ސަރުކާރުގެ އިސްވެރިންގެ ގާތް ރަހުމަތްތެރިންނަށް 800 މިލިއަން ރުފިޔާ ބަހާލާފައިވެއެވެ. އަދި ކޮވިޑް-19 ގެ ބަލިމަޑުކަމުގެ ދުވަސްވަރު ރާއްޖެއަށް އެކި ގައުމުތަކުން ލިބުނު ހިލޭ އެހީގެ ފައިސާ ހުރީ ރާއްޖެއިން ބޭރުގައި ހަދާފައިވާ އަމިއްލަ އެކައުންޓުތަކުގައި ކަމަށް ތުހުމަތުކުރެއްވިއެވެ.
އިތުރަށް ފަލާހު ފާހަގަކުރެއްވި ގޮތުގައި، ރައީސް ސާލިހުގެ ވެރިކަމުގައި ޕްރޮޖެކްޓުތައް ހިންގުމުގެ ނަމުގައި އެކި ލިޔެކިއުންތަކުގައި ސޮއިކުރެވުނު ނަމަވެސް، މަސައްކަތްތައް ކުރިއަށް ނުގޮސް ހުރި އެތައް ކަމެއް އެބަހުއްޓެވެ. ނަމަވެސް ވެރިންގެ ގޮތުގައި ތިބި ފަރާތްތަކާ ގުޅުން އޮތް ކުންފުނިތަކަށް އެތައް ސަތޭކަ މިލިއަން ރުފިޔާއެއް ބައި އަޅާ ގޮތަށް ބަހާފައިވާކަން ފެންނަން އޮތް ކަމަށް ވިދާޅުވިއެވެ.
"އެމްޑީޕީގެ ވެރިކަމުގައި ހިންގާފައިވާ އެތައް ހާސް ޖަރީމާއެއް މިގޮތަށް ރައްޔިތުންނަށް ހާމަކޮށްދެވިދާނެ. ކުރި ވައްކަމެއް އޮތްނަމަ ހެއްކާއެކު އަރާ ހަމަކުރާނަން،" ފަލާހު ވިދާޅުވިއެވެ.
