ޤައުމީ އެއަރލައިން މޯލްޑިވިއަނުން ޗައިނާގެ ތިން ސިޓީއަކަށް ކުރާ ދަތުރުތަކަށް ޚާއްޞަ ޕްރޮމޯޝަނެއް ތަޢާރަފުކޮށްފިއެވެ. މި ޕްރޮމޯޝަނަކީ ދިވެހި ދަތުރުވެރިންނަށް ޚާއްޞަކޮށްގެން ކުރިއަށްގެންދާ ޕްރޮމޯޝަނެއްކަމަށް އެ އެއަރލައިނުން މަޢުލޫމާތު ދީފައިވެއެވެ.
މި ޕްރޮމޯޝަނުގެ ދަށުން ޗައިނާގެ ވެރިރަށް ބެއިޖިންގ އާއި، އިޤްތިޞާދީ މަރުކަޒު ޝަންހާއީ އަދި ސިޗުއަން ޕްރޮވިންސްގެ ވެރިރަށް ޗެންގްޑޫއަށް ދެކޮޅު ޓިކެޓު 499 އެމެރިކާ ޑޮލަރަށް ލިބެން ހުންނާނެއެވެ. މި ޕްރޮމޯޝަން ކުރިއަށްދާނީ އޮކްޓޫބަރު 28 އިން ނޮވެމްބަރު 15 އަށެވެ.
މޯލްޑިވިއަނުން ފާހަގަކުރައްވާފައިވާ ގޮތުގައި ފްލައިޓުތަކުގެ ގަޑިތައް ތާވަލުކޮށްފައިވަނީ ޗުއްޓީ ހޭދަކުރަން ދާ އާއިލާތަކަށާއި، ވިޔަފާރި ބޭނުންތަކުގައި ދަތުރުކުރާ ފަރާތްތަކަށް އެންމެ ފަސޭހަވާނެ ގޮތަށެވެ. މާލެއިން ފުރާ ފްލައިޓުތައް ޗައިނާއަށް ޖައްސާނީ އެގައުމުގެ ހެނދުނުގެ ވަގުތުތަކުގައެވެ.
މި ޕްރޮމޯޝަނުގެ އިތުރު ފައިދާއެއްގެ ގޮތުގައި، ޗައިނާއަށް އެތެރެވާ ދިވެހިންނަށް 30 ދުވަހުގެ އޮން-އެރައިވަލް ވިސާ ލިބޭނެކަމަށް އެއަރލައިނުން ހާމަކުރައްވާފައިވެއެވެ. އަދި މި ތިން ސިޓީއަށް ދަތުރުކުރަނީ އެންމެ ފަހުން ގެނެސްފައިވާ އެއަރބަސް އޭ330 ވައިޑް ބޮޑީ މަތިންދާބޯޓުގައެވެ.
މިވަގުތު މޯލްޑިވިއަންގެ ފްލީޓުގައި 25 މަތިންދާބޯޓު ހިމެނޭއިރު، މީގެ ތެރޭގައި ވައިޑް-ބޮޑީ އެއަރބަސް އޭ330، ނެރޯ-ބޮޑީ އެއަރބަސް އޭ320 މަރުކާގެ މަތިންދާބޯޓުތަކާއި، އޭޓީއާރު، ޑޭޝް 8 އަދި ޑޭޝް 6 މަރުކާގެ މަތިންދާބޯޓުތައް ހިމެނެއެވެ.
