ވިލުންތެރި ރާއްޖޭގެ ޤައުމީ ތަރައްޤީގެ ޕްލޭން ޖެނުއަރީ މަހު އިފްތިތާހުކުރަނީ
2045 ވަނަ އަހަރާ ހަމައަށް ރާއްޖޭގެ ތަރައްޤީގެ މިސްރާބު ކަނޑައަޅާ "ވިލުންތެރި ރާއްޖެ" ޤައުމީ ތަރައްޤީގެ ޕްލޭންގެ ޑްރާފްޓް މަސައްކަތްތައް ނިންމާ، މި ޕްލޭން ޖެނުއަރީ މަހު އިފްތިތާހުކުރުމަށް ހަމަޖެހިފައިވާ ކަމަށް ސަރުކާރުން ވަނީ ހާމަކުރައްވާފައެވެ.
މި މަސައްކަތް ކުރިއަށްދަނީ ނެކްސިއާ މޯލްޑިވްސްގެ ފަރާތުން ކަމަށްވާއިރު، މިހާރު ވަނީ ރައްޔިތުންގެ ޚިޔާލާއި މަޝްވަރާ ހޯދުމަށް އަތޮޅުތަކަށް ދަތުރުތައް ފަށާފައެވެ. މި ގޮތުން ޕައިލެޓް މަސައްކަތުގެ ގޮތުގައި ކ. ގުރައިދޫއަށް ދަތުރުކޮށް، އެ ރަށުގެ މުއައްސަސާތަކާއި ރައްޔިތުންގެ މަޝްވަރާ ވަނީ ހޯދާފައެވެ.
ނެކްސިއާ މޯލްޑިވްސްގެ ފަރާތުން މަޢުލޫމާތު ދެއްވާފައިވާ ގޮތުގައި، ރަށްރަށަށް ދަތުރުކޮށް ރައްޔިތުންނާއި ހިއްސާދާރުންގެ ޚިޔާލު ހޯދުމަށް 10 ޓީމު ހަރަކާތްތެރިވާނެއެވެ. އަދި ދަތުރުތައް ފެށުމަށްފަހު 3 ހަފްތާގެ ތެރޭގައި ރާއްޖޭގެ މީހުން ދިރިއުޅޭ 180 ރަށުގެ ރައްޔިތުންނާ ބައްދަލުކޮށް ޚިޔާލު ހޯދުމުގެ މަސައްކަތްތައް ނިންމާލެވޭނެ ކަމަށް ވެސް ވަނީ ހާމަކުރައްވާފައެވެ.
މި ޕްލޭންގެ މަސައްކަތްތައް ކުރިއަށްދާއިރު، އޮކްޓޯބަރު މަހުގެ ފަހުކޮޅު މަތީ ފަންތީގެ މަހާސިންތާއެއް ބޭއްވުމަށް ވަނީ ހަމަޖެހިފައެވެ. އަދި މި މަހާސިންތާގައި އެއްކުރެވޭ ހުރިހާ މަޢުލޫމާތެއް ހުށަހެޅުމަށްފަހު، އެ މަހާސިންތާއިން ނިންމާ ނިންމުންތަކަށް ބިނާކޮށް ޖެނުއަރީ މަހުގެ ތެރޭގައި "ވިލުންތެރި ރާއްޖެ" 20 އަހަރުގެ ޤައުމީ ތަރައްޤީގެ ޕްލޭން އިފްތިތާހުކުރެވޭނެއެވެ.
މި ޕްލޭންގައި ހިމެނޭ ކަންކަން ތަރުތީބުކުރުމުގައި ރާއްޖެއިން ބޭރުގެ 5 ތަޖުރިބާކާރުންގެ ޓީމެއް ނެކްސިއާ މޯލްޑިވްސްގެ ޓީމާއެކު މަސައްކަތްކުރާނެ ކަމަށް ވެސް ވަނީ ހާމަކުރައްވާފައެވެ. މި ޕްލޭން އިފްތިތާހުކުރުމަށްފަހު، ޤާނޫނީ ބާރުވެރިކަން ދިނުމުގެ ކުރިން ރައްޔިތުންގެ ރުހުން ހޯދުމުގެ މަރުހަލާއެއް ކުރިއަށް ގެންދިއުމަށްފަހު، ޖޫން މަހު ރަސްމީކޮށް އިފްތިތާހުކޮށް ޢަމަލުކުރަން ފެށޭނެއެވެ.
