މިރޭ ހަނދުކޭތައާ ގުޅިގެން ރާއްޖޭގެ މީހުން ދިރިއުޅޭ ހުރިހާ ރަށެއްގައި ރޭގަނޑު 23:12 ގައި ކޭތަ ނަމާދު ކޮށްފިއެވެ.
ކޭތަ ނަމާދުގެ ޚުތުބާގައި ވަނީ ކީރިތި ރަސޫލާ މުޙައްމަދު ޞައްލައްﷲ އަލައިހި ވަޞައްލަމަ ކުރެއްވި ކޭތަ ނަމާދުގައި ދެއްވި ޚުތުބާއަށް އަލިއަޅުވާލައްވާފައެވެ. ޚުތުބާގައި ފާހަގަކުރެއްވި ގޮތުގައި ކޭތަހިފަނީ ހަމައެކަނި ޤުދުރަތީ ސަބަބުތަކާހެދި ނޫނެވެ. އަދި މީސްތަކުންގެ ކުށްފާފަތަކާއި އުރެދުންތައް ގިނަވުމުގެ ސަބަބުން މާތްﷲގެ ޙަޟްރަތަށް މީސްތަކުން އެނބުރި ރުޖޫޢުވުމަށް ކުރެވޭ އިންޒާރެއްގެ ގޮތުގައިވެސް މެއެވެ.
ޚުތުބާގައި "މާތްﷲގެ އަޅުތަކުންނޭވެ! ކައުނު ފަސާދަވެ، ދުނިޔެ ޚަރާބުވަނީ ތަފާތު ކުށްތައް ގިނަވަމުންދާތީއެވެ" މިފަދައިން ވިދާޅުވެ، ބިމުގައި ފަސާދަ ނުކުރުމަށާއި މާތްﷲއަށް ބިރުވެތިވެ އެކަލާނގެ ރަޙްމަތަށް އެދުމަށް ގޮވާލެއްވިއެވެ.
މިރޭގެ ހަނދުކޭތަ ހިފަން ފެށީ ރާއްޖޭ ގަޑިން 20:28 ގައެވެ. ނަމަވެސް ކޭތަ ހިފާ މަންޒަރު ފެންނަން ފެށީ 21:30 ހާއިރުއެވެ. 1 ގަޑިއިރާއި 22 މިނެޓުގެ މުއްދަތަށް ފުރިހަމަ ކޭތައެއް ރާއްޖެއަށް ފެނުނެވެ. ކޭތަ އެއްކޮށް ވީއްލޭނީ ދަންވަރު 01:55 ގައެވެ.
ޚުތުބާގައި އިތުރަށް ފާހަގަކުރެއްވި ގޮތުގައި ކޭތަހިފުމަކީ މުސްލިމުން އެކަމާމެދު ދީނީ ނަޒަރަކުން ވިސްނަންޖެހޭ ކަމެކެވެ. އަދި އެއީ ކޭތަނަމާދުކޮށް، ކުށްފާފަތައް ފުއްސެވުން އެދި މާތްﷲގެ ޙަޟްރަތަށް ރުޖޫޢުވާންޖެހޭ ވަގުތެއްކަމުގައި ވިދާޅުވިއެވެ.
