ނޭޕާލްގައި މީސްމީޑިއާގެ ބައެއް މަންސަތައް މަނާކުރުމާއި ކޮރަޕްޝަނާ ދެކޮޅަށް ހިނގަމުންދާ މުޒާހަރާތަކުގައި ފާއިތުވި 24 ގަޑިއިރުގެ ތެރޭގައި 19 މީހުން މަރުވެއްޖެއެވެ. މީގެ ތެރޭގައި ކަތުމަންޑޫގައި 17 މީހުންނާއި އިތަހަރީ ސިޓީގައި ދެ މީހުން ހިމެނެއެވެ.
މުޒާހަރާތަކުގައި ކަތުމަންޑޫގައި ހުންނަ މަޖިލިސް ކުރާ ގެއަށް ވަދެގަތުމަށް ޒުވާނުން މަސައްކަތްކުރުމުން، އެކަން ހުއްޓުވުމަށް ފުލުހުން ވަނީ ކަރުނަ ގޭހާއި އުނދަ ބޭނުންކޮށްފައެވެ. މި ހަމަނުޖެހުންތަކުގައި 100 އަށްވުރެ ގިނަ މީހުންނަށް އަނިޔާވެފައިވާއިރު، އޭގެ ތެރޭގައި 28 ފުލުހުން ހިމެނެއެވެ.
ހަމަނުޖެހުންތައް އިތުރުވުމާ ގުޅިގެން ކަތުމަންޑޫގެ ބައެއް ސަރަހައްދުތަކުގައި ވަނީ ކަރްފިއު އިއުލާންކޮށްފައެވެ. ބޮޑުވަޒީރު ކޭޕީ ޝަރްމާ އޯލީ ވަނީ މި ކަމާ ގުޅޭގޮތުން ވަޒީރުންގެ މަޖިލީހުގެ ކުއްލި ބައްދަލުވުމެއް ބާއްވާފައެވެ.
"މި މުޒާހަރާތަކުން ދައްކުވައިދެނީ ޤައުމުގެ ޒުވާނުންގެ މެދުގައި ސަރުކާރާމެދު އޮތް ހިތްހަމަނުޖެހުން،" މުޒާހަރާގެ ބައިވެރިން ބުނެފައިވެއެވެ. އެމީހުން ފާހަގަކުރި ގޮތުގައި ސަރުކާރުން ކޮރަޕްޝަނާ ދެކޮޅަށް އެކަށީގެންވާ ފިޔަވަޅު ނާޅައެވެ.
30 މިލިއަން މީހުންގެ އާބާދީއެއް އޮތް ނޭޕާލްގައި، އާބާދީގެ 90 އިންސައްތަ މީހުން އިންޓަނެޓް ބޭނުންކުރެއެވެ. ސަރުކާރުން ފޭސްބުކް ހިމެނޭ ގޮތަށް ބައެއް މީސްމީޑިއާ މަންސަތައް މަނާކުރީ، އެ މަންސަތައް ސަރުކާރުގެ ކަމާބެހޭ އިދާރާތަކުގައި ރަޖިސްޓަރީ ކުރުމަށް ދިން މުއްދަތު ހަމަވުމާ ގުޅިގެންނެވެ. ސަރުކާރުން ބުނާ ގޮތުގައި މި ފިޔަވަޅު އަޅާފައިވަނީ ނަހަމަ ގޮތުގައި މީސްމީޑިއާ ބޭނުންކުރުމާއި ސައިބަރ ކްރައިމް އިތުރުވަމުން ދިއުމާ ގުޅިގެންނެވެ.
