އަލަށް އުފަންވާ ކުދިންގެ ސިއްޙަތާއި ދުޅަހެޔޮކަމަށް އެކުއެކީގައި މަސައްކަތްކުރުމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ގޮވާލައްވައިފިއެވެ. އެކަމަނާ މިފަދައިން ގޮވާލެއްވީ، ނިއޮނޭޓަލް ނަރުހުންގެ ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ފަސްޓް ލޭޑީ ސާޖިދާ ވިދާޅުވި ގޮތުގައި ތުއްތު ކުދިންގެ ދުޅަހެޔޮކަމާ ގުޅޭ މި މައުޟޫއަކީ ކޮންމެ އާއިލާއަކާއި، ކޮންމެ މީހަކާ އަދި އަންނަން އޮތް ޖީލުތަކާވެސް ގުޅިފައިވާ މައުޟޫއެކެވެ. އަދި މި ކޮންފަރެންސް ކާމިޔާބުކުރުމުގައި ބައިވެރިންގެ އެއްބާރުލުމާއި، ބިނާކުރުވަނިވި ޙައްލުތަކަށް ޚިޔާލާއި މަޝްވަރާ ވަރަށް މުހިންމުކަމަށް އެކަމަނާ ފާހަގަކުރެއްވިއެވެ.
"އަލަށް އުފަންވާ ކުދިންގެ ދުޅަހެޔޮކަމަށް އެކުއެކީގައި މަސައްކަތްކުރުމަށް ގޮވާލަން." ފަސްޓް ލޭޑީ ވިދާޅުވިއެވެ.
އެކަމަނާ ފާހަގަކުރެއްވި ގޮތުގައި މިއީ އިހުގައި ވަރަށް ގޮންޖެހުންތައް ބޮޑު މަސައްކަތެއް ކަމަށާއި، ވަރަށް ގިނަ ހިތާމަވެރި ޙާދިސާތައްވެސް ހިނގާފައިވާ ދާއިރާއެކެވެ. އަދި މިހާރުވެސް މިއީ އިތުރު، އަވަސް ކުރިއެރުންތަކެއް ބޭނުންވާ ދާއިރާއެއްކަމަށް ވިދާޅުވިއެވެ. މިގޮތުން ވަސީލަތްތަކާއި އިންސާނީ ހުނަރުތައް ތަރައްޤީކުރުމުގެ މުހިންމުކަން އެކަމަނާ ފާހަގަކުރެއްވިއެވެ.
ދުނިޔޭގެ ތަރައްޤީވެފައިވާ ސިއްޙީ ނިޒާމުތަކާ ފައިހަމަކުރުމަށް އަބަދުވެސް މަސައްކަތްކުރަން ޖެހޭކަމަށް ފާހަގަކުރައްވައި، މި ކޮންފަރެންސްގެ އަލީގައި ރާއްޖޭގައި ހުރި ގޮންޖެހުންތަކާއި ވަސީލަތުގެ ގޮތުން ބޭނުންވާ ކުރިއެރުންތަކާ މެދު މަޝްވަރާކޮށް، ޙައްލަކަށް ބަހުސްކުރެވޭނެކަމަށް އުއްމީދުކުރައްވާކަމަށް އެކަމަނާ ވިދާޅުވިއެވެ. އަދި މީގެ އާޚިރު ނަތީޖާއަކީ ހިތްހަމަޖެހުމާއި އުފާވެރިކަން ލިބިފައިވާ މުޖުތަމަޢެއް ބިނާކުރުންކަމަށްވެސް އެކަމަނާ ފާހަގަކުރެއްވިއެވެ.
