ފްރާންސްގެ ރައީސް އެމެނުއެލް މެކްރޯންގެ ސަރުކާރުން ހުށަހަޅާފައިވާ ބަޖެޓް އުނިކުރުމުގެ ސިޔާސަތުތަކާ ދެކޮޅަށް، މުޅި ޤައުމުގައި ފުޅާ ދާއިރާއެއްގައި މުޒާހަރާތަކެއް ކުރިއަށްދާ ކަމަށް ރިޕޯޓްކޮށްފިއެވެ.
ރޮއިޓަރސްއިން ރިޕޯޓްކޮށްފައިވާ ގޮތުގައި، މި މުޒާހަރާތަކުގައި 300 އާ ގާތްކުރާ އަދަދެއްގެ މީހުން ހައްޔަރުކުރެވިފައިވެއެވެ. ސަލާމަތީ ބާރުތަކުން 80،000 އަށްވުރެ ގިނަ އަދަދެއްގެ ސެކިއުރިޓީ މުވައްޒަފުން މުޅި ޤައުމުގެ އެކި ކަންކޮޅުތަަކަށް ވަނީ ނެރެފައެވެ. ޕެރިސްގައި އެކަނިވެސް 200 އަށްވުރެ ގިނަ މީހުން ހައްޔަރުކުރެވުނެވެ.
މި މުޒާހަރާތަކަކީ "ބްލޮކް އެވްރީތިންގް" ގެ ނަމުގައި ފެށުނު ހަރަކާތެކެވެ. މިއީ މެއި މަހު ސޯޝަލް މީޑިއާގައި ކަނާތު ފިޔައިގެ ގްރޫޕްތަކުން ފެށި ހަރަކާތެއް ނަމަވެސް، މިހާރު ވަނީ ވާތު ފިޔައިގެ ފަރާތްތަކުންވެސް މި ހަރަކާތުގައި ބައިވެރިވެފައެވެ.
ފްރާންސްގެ ބަޖެޓް ޑެފިސިޓް ވަނީ ޔޫރަޕިއަން ޔޫނިއަންގެ 3 ޕަސެންޓްގެ ސީލިންގއަށްވުރެ ދެގުނަ އިތުރުވެފައެވެ. އަދި ޤައުމުގެ ދަރަނި ވަނީ ޖީޑީޕީގެ 114 ޕަސެންޓަށް އަރާފައެވެ. މި ހާލަތު ރަނގަޅުކުރުމަށް ސަރުކާރުން 44 ބިލިއަން ޔޫރޯގެ ޚަރަދު ކުޑަކުރުމަށް ހުށަހެޅުމުން، ރައްޔިތުންގެ ކަންބޮޑުވުން އިތުރުވެފައިވެއެވެ.
މި މުޒާހަރާތަކުގައި ސްކޫލް ކުދިންނާއި ޔުނިވަރސިޓީ ދަރިވަރުން ވަރަށް ފުޅާ ދާއިރާއެއްގައި ބައިވެރިވެފައިވެއެވެ. ޕެރިސްގެ ގާރެ ޑު ނޯރޑް ރޭލްވޭ ސްޓޭޝަން ކައިރީގައި އެތައް ސަތޭކަ ޒުވާނުން މެކްރޯންއާ ދެކޮޅަށް އަޑުއުފުލަމުންދެއެވެ.
