ރާއްޖެއަށް ދިމާވެފައިވާ މާލީ ދަތިތަކުން އަރައިގަތުމުގައި ޗައިނާގެ ފުރިހަމަ އެއްބާރުލުމާއި އެހީތެރިކަން ރާއްޖެއަށް ލިބޭނެކަމަށް ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޒިއަންހުއާ ވިދާޅުވެއްޖެއެވެ. ސަފީރު މިފަދައިން ވިދާޅުވެފައިވަނީ ޗައިނާއިން ރާއްޖޭގައި ހިންގާ މަޝްރޫޢުތަކާއި ދެ ޤައުމުގެ ގުޅުމާ ބެހޭގޮތުން ނޫސްވެރިންނާއެކު ބޭއްވި ބައްދަލުވުމެއްގައެވެ.
ސަފީރު ވިދާޅުވި ގޮތުގައި ރާއްޖެއަށް ދިމާވެފައިވާ މާލީ ދަތިތަކުން އަރައިގަތުމަށްޓަކައި ޗައިނާއިން އެހީވުމަށް ދިވެހި ސަރުކާރާއެކު ރޭވުންތަކެއް ރާވަމުންދެއެވެ. އަދި މިކަމާ ގުޅޭ ކަރުދާސް މަސައްކަތްތައް މި މަހުގެ ނިޔަލަށް ނިންމާލެވޭނެ ކަމަށް ސަފީރު ވަނީ ހާމަކުރައްވާފައެވެ.
"ދުރު ރާސްތާއެއްގައި ލޯނުތައްވެސް ދެއްކޭނެ ފަދަ ލުއި އިންތިޒާމެއް ހަމަޖެއްސުމަށް މަސައްކަތްކުރަމުންދަނީ" ސަފީރު ވިދާޅުވިއެވެ. އަދި ރާއްޖެއަށް އެހީ ދިނުމަށް ނިންމާފައިވަނީ އިތުރު މާލީ ބުރައެއް ރާއްޖެއަށް އުފުލަން ނުޖެހޭނެ ގޮތަށްކަން ސަފީރު ފާހަގަކުރެއްވިއެވެ.
ޗައިނާގެ ހިލޭ އެހީގައި ރާއްޖޭގައި ހިންގާ މަޝްރޫޢުތަކުގެ ތެރެއިން ވިލިމާލޭގައި އަޅާ ހޮސްޕިޓަލުގެ ޑިޒައިން ބިޑިން މަރުހަލާއަށް މިހާރު ހުޅުވާލާފައިވާ ކަމަށާއި، ވިލިމާލެއާއި މާލޭގެ މަގުތައް ޒަމާނީ ފެންވަރަށް ތަރައްޤީކުރުމުގެ މަޝްރޫޢުގެ ފަހު ތައްޔާރީތައް ކުރިއަށްދާކަން ސަފީރު ހާމަކުރެއްވިއެވެ. މީގެއިތުރުން 50 ކައުންސިލް އިދާރާ އެޅުމުގެ މަޝްރޫޢަށް ހަދަންޖެހޭ އޮން-ސައިޓް ފީސިބިލިޓީ ސްޓަޑީ ވަނީ ނިމިފައެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ފަހުން ޗައިނާއަށް ކުރެއްވި ދަތުރުފުޅާ ގުޅިގެން ދެ ޤައުމުގެ ގުޅުން އިތުރަށް ބަދަހިވެފައިވާކަން ފާހަގަކުރައްވަމުން، ދަނޑުވެރިކަމާއި ބިނާވެށި އަދި މަސްވެރިކަމާއި އިޢާދަކުރަނިވި ހަކަތައާއި ތަޢުލީމުގެ ދާއިރާއިން 11 ފަހުމުނާމާއެއްގައި ސޮއިކުރެވި، މި ދާއިރާތަކުން ކުރިއެރުން ހޯދުމުގައި މުހިންމު ދައުރެއް ޗައިނާއިން އަދާކުރާނެކަމަށް ސަފީރު ވިދާޅުވިއެވެ.
