ރައްޔިތުންގެ މަޖިލީހަށް ހުށަހެޅިފައިވާ "މޯލްޑިވްސް މީޑިއާ އެންޑް ބްރޯޑްކާސްޓިން" ބިލު ފާސްވިޔަސް ސޯޝަލް މީޑިއާ ބަންދެއް ނުވާނެ ކަމަށް ސަރުކާރު ހިންގާ ޕާޓީ ޕީއެންސީގެ ޕާލަމެންޓްރީ ގްރޫޕްގެ ލީޑަރު އަދި އިނގުރައިދޫ ދާއިރާގެ މެންބަރު އިބްރާހިމް ފަލާހު ވިދާޅުވެއްޖެއެވެ.
މި ބިލާ ގުޅޭގޮތުން ކުރެއްވި ޕޯސްޓެއްގައި ފަލާހު ވިދާޅުވެފައިވަނީ، "ފޭސްބުކް، ޓިކްޓޮކް އަދި ޓްވިޓަރ ފަދަ ސޯޝަލް މީޑިއާގެ އެއްވެސް ވަސީލަތެއް ބަންދުކުރެވޭނެ ފަދަ އެއްވެސް މާއްދާއެއް މި ބިލުގައި ނެތް" ކަމަށެވެ. އަދި މިކަމާ ގުޅޭގޮތުން ރައްޔިތުން ކަންބޮޑުވާން ނުޖެހޭނެ ކަމަށްވެސް އެމަނިކުފާނު ވިދާޅުވިއެވެ.
ފަލާހު އިތުރަށް ފާހަގަކުރެއްވި ގޮތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަކީ ރައްޔިތުންގެ މުސްތަޤުބަލު އުޖާލާކޮށް ރައްކާތެރިކޮށްދޭނެ ހެޔޮލަފާ ވެރިއެކެވެ. އަދި ޒުވާނުންނާއި ރައްޔިތުންނަށް ކުރިއަށް އޮތްތަނުގައިވެސް ސޯޝަލް މީޑިއާ ބޭނުންކުރެވޭނެ ކަމަށް އެމަނިކުފާނު ޔަގީންކަން ދެއްވިއެވެ.
ލޮބުވެތި ޒުވާނުން އަދި ރައްޔިތުން
މިހާރު ރައްޔިތުންގެ މަޖިލީހަށް އަމިއްލަ މެމްބަރ ޢަބްދުލް ހަންނާން.
ހުށައަޅާފައިވާ މީޑިއާ ބިލުގައި. ސޯޝަލް މީޑިއާތައް ރެގިއުލޭޓްކޮށް. ފޭސްބްކާއި ޓިކްޓޮކް އަދި ޓްވިޓަރ އެކައުންޓްތައް. މިބިލް ރައްޔިތުންގެ މަޖިލީހުން
މިސާލަކަށް ފާސްވިއަސް…— Ibrahim Falah (@IbrahimFalahR) September 13, 2025
އެމްޑީޕީއާ ބެހޭގޮތުން ވާހަކަފުޅު ދައްކަވަމުން ފަލާހު ވިދާޅުވީ، އެމްޑީޕީން މިހާރު މުޒާހަރާތަކަށް ގޮވާލަމުންދަނީ މިދިޔަ ވެރިކަމުގައި އެމްޑީޕީގެ ނުފޫޒުގަދަ ފަރާތްތަކުން ކޮށްފައިވާ ވައްކަންތަކުގެ މައްސަލަތައް ބެލެން ފެށުމާ ގުޅިގެން ކަމަށެވެ.
ފަލާހު ވަނީ ޒުވާނުންނަށް އިލްތިމާސްކުރައްވާފައިވެއެވެ. އެގޮތުން އެމަނިކުފާނު ގޮވާލެއްވީ ނޫސްވެރިކަމުގެ ތާޖު އަޅައިގެން ތިބި އެމްޑީޕީގެ އެކްޓިވިސްޓުންތަކެއްގެ މަޅީގައި ނުޖެހުމަށެވެ.
