ޣައްޒާގައި ހިންގަމުންދާ އަނިޔާވެރި ޙަމަލާތަކުގައި ފަަލަސްޠީނުގެ 200،000 އަށްވުރެ ގިނަ ރައްޔިތުން މަރުވެ ނުވަތަ ޒަޚަމްވެފައިވާކަމަށް އިސްރާއީލުގެ ކުރީގެ އަސްކަރީ އިސްވެރިޔާ ހާޒީ ހަލެވީ އިޢުތިރާފުވެއްޖެއެވެ.
ދެކުނު އިސްރާއީލުގެ އާބާދީއެއްގައި ބޭއްވުނު ބައްދަލުވުމެއްގައި ވާހަކަދައްކަމުން ހަލެވީ ބުނެފައިވަނީ ޣައްޒާގެ އާބާދީގެ 10 އިންސައްތައަށްވުރެ ގިނަ މީހުން ޝަހީދުވެ ނުވަތަ ޒަޚަމްވެފައިވާ ކަމަށެވެ. މިއީ ޣައްޒާގެ ސިއްޙީ މިނިސްޓްރީން އާންމުކޮށްފައިވާ ތަފާސްހިސާބުތަކާ ދާދި އެއްގޮތް އަދަދުތަކެކެވެ.
ޣައްޒާގެ ރަސްމީ ތަފާސްހިސާބުތަކުން ދައްކާގޮތުގައި މިހާތަނަށް 64،718 ފަލަސްތީނު ރައްޔިތުން ޝަހީދުވެ، 163،859 މީހުން ޒަޚަމްވެފައިވެއެވެ. މީގެ އިތުރުން، އިސްރާއީލުން ސަލާމަތްކުރުމުގެ މަސައްކަތަށް ހުރަސްއަޅަމުންދާއިރު، އެތައް ހާސް މީހުން ވަނީ އިމާރާތްތަކުގެ ދަށުވެފައެވެ.
"މިއީ މަޑުމައިތިރި ހަނގުރާމައެއް ނޫން. އަޅުގަނޑުމެން ފުރަތަމަ މިނެޓުން ފެށިގެން އެއްވެސް ރަޙުމެއް ނުކުރަން. ހިތާމައަކީ މިއަށްވުރެ ކުރިން ނުފެށުނުކަން،" އޭނާ ބުނެފައިވެއެވެ.
ލީކްވެފައިވާ އިސްރާއީލުގެ އަސްކަރީ އިންޓެލިޖެންސް ރިޕޯޓުތަކުން ދައްކާގޮތުގައި މޭ މަހާ ހަމައަށް ޣައްޒާގައި ޝަހީދުވެފައިވާ މީހުންގެ ތެރެއިން 80 އިންސައްތައަކީ އާންމު ރައްޔިތުންނެވެ. ނަމަވެސް ހަލެވީ ބުނެފައިވަނީ އިސްރާއީލުގެ އަސްކަރިއްޔާއިން ޢަމަލުކުރަމުންދަނީ ބައިނަލްއަޤްވާމީ އިންސާނީ ޤާނޫނުތަކާ އެއްގޮތަށް ކަމަށެވެ.
އިސްރާއީލުގެ އަސްކަރީ ޤާނޫނީ ލަފާދޭ ފަރާތްތަކުގެ ދައުރަކީ ހަނގުރާމައިގެ މައިދާނުގައި ހިންގާ ޢަމަލުތައް ހުއްޓުވުމަށްވުރެ ބޮޑަށް، ބައިނަލްއަޤްވާމީ މުޖުތަމަޢުގައި އިސްރާއީލުގެ އިމޭޖް ދިފާޢުކުރުން ކަމަށް ހަލެވީ ވަނީ ދޭހަކޮށްދީފައެވެ.
