ޖަރުމަނުވިލާތުގެ މިއުނިކްގައި އެއްޗެއް ގޮވައި ހިނގި ހާދިސާއެއްގައި ފިހުނު ދިވެހި ޒުވާނާ، ބ. ތުޅާދޫ، ބީޗްހައުސް އިބްރާހިމް ފަޔާޒް (35 އަހަރު) މިއަދު ނިޔާވެއްޖެއެވެ.
މި ހާދިސާ ހިނގާފައިވަނީ މިދިޔަ އޮގަސްޓު މަހުގެ 8 ވަނަ ދުވަހުއެވެ. ފަޔާޒްގެ އާއިލާގެ މެންބަރެއް، ދައުލަތުގެ މީޑިޔާ، ޕީއެސްއެމް ނިއުސްއަށް މަޢުލޫމާތު ދެމުން ބުނެފައިވަނީ، ފަޔާޒް މަސައްކަތްކުރަމުންދިޔަ ފެކްޓަރީގައި ހުސް ބެރެލްތައް ބަހައްޓަން ޖެހޭ ތަނެއްގައި ތެޔޮ ބެރެލްއެއް ހުރުމާ ގުޅިގެން އެ ބެރެލް ގޮވައި، އޭގެ ސަބަބުން ފަޔާޒް ފިހުނު ކަމަށެވެ.
މި ހާދިސާގައި ފަޔާޒްގެ ހަށިގަނޑުގެ 50 އިންސައްތަ 3 ޑިގްރީއަށް ފިހިފައިވާ ކަމަށް އާއިލާއިން މަޢުލޫމާތު ދީފައިވެއެވެ. ހާދިސާ ހިނގުމާއެކު ފަޔާޒް ވަނީ މިއުނިކްގެ ހޮސްޕިޓަލެއްގެ ވެންޓިލޭޓަރަށް ލާފައެވެ.
"ފުރަތަމަ ދިޔައީ ވަރަށް ހާލު ސީރިއަސްކޮށް. ނަމަވެސް ހާލު ރަނގަޅުވާން ފެށުމުން ވެންޓިލޭޓަރުން ނަގައި ގިނަ އޮޕަރޭޝަންތަކެއް ކުރި," އާއިލާއިން ބުނެފައިވެއެވެ.
އެހެންނަމަވެސް ހުކުރު ދުވަހު ފަޔާޒްގެ ހާލު އަލުން ސީރިއަސްވެ، ފަރުވާ ދެމުންދަނިކޮށް މިއަދުގެ މެންދުރު ހާއިރު ވަނީ ނިޔާވެފައެވެ. މަރުޙޫމް އިބްރާހިމް ފަޔާޒަކީ ޕީއެސްއެމް ނިއުސްގެ ޖާނަލިސްޓް ޔަޒީދް ރަޝީދުގެ ބޮޑު ބޭބެއެވެ.
އާއިލާއަށް ކުރިމަތިވެފައިވާ މި ހިތާމަވެރި ދަނޑިވަޅުގައި ޕީއެސްއެމް ނިއުސް ޓީމުގެ ފަރާތުން އާއިލާއަށް ތަޢުޒިޔާ ރައްދުކުރަމެވެ.
