ބައިނަލްއަޤްވާމީ ކުޅިވަރު މުބާރާތްތަކުގައި ޒަޔަނިސްޓު އިސްރާއީލާއި ރަޝިޔާ ބައިވެރިވުން މަނާކުރަންޖެހޭ ކަމަށް ސްޕެއިންގެ ބޮޑުވަޒީރު، ޕެޑްރޯ ސަންޗޭޒް ވިދާޅުވެއްޖެއެވެ. މިގޮތަށް އެ މަނިކުފާނު ވިދާޅުވެފައިވަނީ ފަލަސްޠީނުގެ ޣައްޒާއަށް ޔަހޫދީން ދެމުންދާ ޢުދުވާނީ ޙަމަލާތަކާއި ޔޫކްރެއިންއަށް ރަޝިޔާއިން ދެމުންދާ ޙަމަލާތަކަށް އިޝާރާތްކުރައްވައެވެ.
ސަންޗޭޒް މި މޭރުމުން ވާހަކަފުޅު ދައްކަވާފައިވަނީ ފަލަސްޠީނުގެ ހައްޤުތަކަށް ވަކާލާތުކޮށް ސްޕެއިންގެ މެޑްރިޑްގައި ބޭއްވި މުޒާހަރާތަކެއް ހޫނުވެ، އެ ސަރަޙައްދުގައި ކުރިއަށްދިޔަ "ލަ ވުއެލްޓާ" ބައިސްކަލް ދުއްވުމުގެ މުބާރާތަށް ހުރަސްއެޅުނު ދަނޑިވަޅެއްގައެވެ. މުޒާހަރާތަކުގެ ސަބަބުން މުބާރާތުގެ ފަހު ބުރު ވަނީ ކެންސަލްކުރަން ޖެހިފައެވެ.
ސަންޗޭޒްއަކީ ޣައްޒާ އުދުވާނާ ގުޅިގެން ޔަހޫދީންނާ ދެކޮޅަށް ހަރުކަށި އިބާރާތުން ވާހަކަފުޅު ދައްކަވާ ބޭފުޅެކެވެ. އެ މަނިކުފާނުގެ މޭސްތިރިކަމުގެ ދަށުން މިދިޔަ އަހަރުގެ މެއި މަހު ސްޕެއިނުން ވަނީ ފަލަސްޠީނަކީ މިނިވަން ދައުލަތެއްގެ ގޮތުގައި ބަލައިގަނެފައެވެ. އަދި ޣައްޒާ ޢުދުވާނާ ގުޅިގެން ޔަހޫދީންނަށް ތެލާއި ހަތިޔާރު އެއްވެސް މިންވަރަކަށް ފޯރުކޮށް ނުދިނުމަށް ވެސް ސްޕެއިނުން ވަނީ ނިންމާފައެވެ.
2022 ވަނަ އަހަރުން ފެށިގެން ރަޝިޔާއިން ޔޫކްރެއިންއަށް ދެމުންދާ ހަމަލާތަކުގައި 77,000 އަށްވުރެ ގިނަ ޔޫކްރެއިން ސިފައިންނާއި 13,000 އަށްވުރެ ގިނަ އާންމުން ވަނީ މަރުވެފައެވެ. އަދި 2023 ވަނަ އަހަރުގެ އޮކްޓޯބަރު 7 އިން ފެށިގެން ޔަހޫދީން ޣައްޒާއަށް ދެމުންދާ ޢުދުވާނީ ޙަމަލާތަކުގައި 64,000 އަށްވުރެ ގިނަ މީހުން ވަނީ ޝަހީދުވެފައެވެ. މީގެ އިތުރުން ބަނޑުހައިހޫނުކަމުގެ ސަބަބުން 400 އަށްވުރެ ގިނަ މީހުން ވަނީ ޝަހީދުވެފައެވެ.
