ސްޓޭޓް ބޭންކް އޮފް އިންޑިއާ (އެސްބީއައި) އިން ނަގާފައިވާ 50 މިލިއަން ޑޮލަރުގެ ޓްރެޝަރީ ބިލު އަނބުރާ ދައްކަންޖެހޭ މުއްދަތު އިތުރުކޮށްދީފިއެވެ. މިކަން ހާމަވެގެން ދިޔައީ މިއަދު މާލީ ވުޒާރާއާއި އިންޑިއާ ހައިކޮމިޝަނާ ދެމެދު ބޭއްވުނު މުހިންމު ބައްދަލުވުމަކަށް ފަހުގައެވެ.
މި ބައްދަލުވުމުގައި މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވަޒީރު މޫސާ ޒަމީރާއި އިންޑިއާގެ ސަފީރު ޖީ. ބާލަސުބްރަމާނިއަން ބައިވެރިވެ ވަޑައިގެންނެވިއެވެ. އިންޑިއާ ސަފީރުގެ އަރިހުގައި އިންޑިއާގެ ޖޮއިންޓް ސެކްރެޓަރީ ސޫޖާ ކޭ. މެނޮން އާއި އިންޑިއާގެ ޚާރިޖީ ވުޒާރާގެ އިސް އޮފިޝަލުން ބައިވެރިވެ ވަޑައިގެންނެވިއެވެ.
މާލީ ވުޒާރާއިން ހާމަކުރި ގޮތުގައި، ސެޕްޓެމްބަރު 18 ގައި މުއްދަތު ހަމަވާން އޮތް 50 މިލިއަން ޑޮލަރުގެ ޓްރެޝަރީ ބިލުގެ މުއްދަތު އިތުރުކުރުމަށް ނިންމާފައިވާކަން މި ބައްދަލުވުމުގައި ކަށަވަރުކޮށްދީފައިވެއެވެ.
"މި ނިންމުމުން ހާމަވަނީ އިންޑިއާ ސަރުކާރުން ރާއްޖެއަށް ދެމުންގެންދާ ދެމެހެއްޓެނިވި އިތުބާރާއި އެހީތެރިކަން" މާލީ ވުޒާރާއިން ފާހަގަކުރެއްވިއެވެ.
Minister @MoosaZameer met today with G. Balasubramanian, High Commissioner of India to the Maldives, Suja K. Menon, Joint Secretary, and senior officials of @MEAIndia. Discussions centred on ongoing cooperation and ways to further strengthen Maldives–India relations. pic.twitter.com/KBdaF5lCKR
— Ministry of Finance and Planning (@MoFmv) September 17, 2025
މި ބައްދަލުވުމުގައި އިންޑިއާ ސަރުކާރުގެ ލައިންސް އޮފް ކްރެޑިޓް (އެލްއޯސީ) ގެ ދަށުން ކުރިއަށްގެންދާ ތަރައްޤީގެ މަޝްރޫޢުތަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ. އަދި މި މަޝްރޫޢުތައް ކާމިޔާބުކަމާއެކު ނިންމުމަށްޓަކައި އަޅަންޖެހޭ އަވަސް ފިޔަވަޅުތަކާ ގުޅޭގޮތުންވެސް މަޝްވަރާކުރެވުނެވެ.
މީގެއިތުރުން، ދެ ޤައުމުގެ ދެމެދުގައި ވިޔަފާރީގެ ގުޅުން އިތުރަށް ހަރުދަނާކުރުމަށް އޮތް ފުރުޞަތުތަކާމެދު މަޝްވަރާކުރެވުނެވެ. ދާދި ފަހުން އިންޑިއާގެ ބޮޑުވަޒީރު ނަރެންދުރަ މޯދީ ރާއްޖެއަށް ކުރެއްވި ދަތުރުފުޅުގައި ދެ ޤައުމު ދެމެދު މިނިވަން ވިޔަފާރީގެ އެއްބަސްވުމެއް އެކުލަވާލުމާއި، އިޤްތިޞާދީ އަދި މާލީ ދާއިރާގެ އެހެނިހެން އެއްބަސްވުންތަކުގައި ސޮއިކުރެވިފައިވާކަންވެސް ފާހަގަކުރެވެއެވެ.
ކިޔުންތެރިންގެ ޚިޔާލުތައް:
އިތުރުކޮށްދެއްވިމުއްދަތު މިލިޔުމުންއެނގެންޖެހެންވާނެ