މިހާރު ފެންމަތިވެފައިވަނީ އެމްޑީޕީގެ ވެރިކަމުގައި ކޮށްފައިވާ ވައްކަމުގެ ކުޑަ މިންވަރެއް ކަމަށް އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު އިބްރާހިމް ފަލާޙު ވިދާޅުވެއްޖެއެވެ.
ފެނަކަ ކޯޕަރޭޝަންގެ އޮޑިޓް ރިޕޯޓުގައި ފާހަގަކޮށްފައިވާ ހިޔާނާތުގެ މައްސަލަތަކާ ގުޅޭގޮތުން އެކްސްގައި ކުރެއްވި ޕޯސްޓެއްގައި ފަލާޙު ވިދާޅުވީ، މިއީ ކުރީގެ ރައީސް ޔާމީންވެސް ޖެހިލުންވެވަޑައިގަންނަވާނެ ވަރުގެ ވައްކަންތަކެއް ކަމަށެވެ. އަދި މި މައްސަލަތަކާ ގުޅޭގޮތުން އޭނާ ރައްޔިތުންގެ މަޖިލީހުގައިވެސް ވާހަކަދައްކަވާފައިވާ ކަމަށް ފާހަގަކުރެއްވިއެވެ.
"މިއީ ސަޢީދު އެކަނި ކޮށްފައި އޮތް ކަމެއް ނޫން. އެމްޑީޕީގެ މުޅި ލީޑަރޝިޕަށް މި ފައިސާގަނޑުން ވަނީ ބައި އަޅާފަ. އެމްޑީޕީގެ ކުރީގެ ބައެއް މަޖިލިސް މެންބަރުން އެހެރީ ރިސޯޓުތައް ހަދަން ރަށްތައް ގަނެ، ބައެއް މީހުން ރިސޯޓު ހަދަންވެސް ފަށާފަ،" ފަލާޙު ވިދާޅުވިއެވެ.
އޮކްޓޯބަރު 3 ވަނަ ދުވަހު އެމްޑީޕީން ބޭއްވުމަށް ރާވާފައިވާ އެއްވުމަކީ މިފަދަ ވައްކަންތައް ފޮރުވައި، އާންމު ރައްޔިތުން މަގުމައްޗަށް ނެރެ ހަމަނުޖެހުން އުފެއްދުމަށް ރޭވިފައިވާ ކަމެއް ކަމަށްވެސް ފަލާޙު ތުހުމަތުކުރެއްވިއެވެ.
2023 ވަނަ އަހަރުގެ ރިޔާސީ އިންތިޚާބުގައި އެމްޑީޕީއަށް ވެރިކަން ލިބުނުނަމަ، މިއަދު ދިވެހި ރައްޔިތުން ތިބޭނީ ނުކައި ނުބޮއި، ކަނު އަނދިރީގައި ކަމަށްވެސް ފަލާޙު ވިދާޅުވިއެވެ. އަދި ކުރިއަށް އޮތް ތަނުގައިވެސް އެމްޑީޕީން ކޮށްފައިވާ މިފަދަ އިތުރު ކަންކަން ހާމަވަމުންދާނެ ކަމަށް އޭނާ ވިދާޅުވިއެވެ.
