ރާއްޖޭގައި އެންމެ ބޮޑު ލޯނެއް ނަގައިގެން ހިންގާ އެންމެ ބޮޑު އެއް މަޝްރޫޢުއަކީ ތިލަމާލެ ބްރިޖްގެ މަސައްކަތް ކަމަށާއި، ނަމަވެސް ވެރިކަން ނިމުނުއިރު އެ މަޝްރޫޢުގެ އެއްވެސް ތަނބެއް މައްޗަށް އަރާފައިވާ ތަނެއް ރައްޔިތަކަށް ފެނިފައި ނުވާ ކަމަށް ވިލިމާލެ ދާއިރާގެ މެންބަރު މުޙައްމަދު އިސްމާޢީލް ވިދާޅުވެއްޖެއެވެ.
ރާއްޖޭގެ ޓީވީ ޗެނަލެއް ކަމަށްވާ ސަންގުއާ ވާހަކަދައްކަވަމުން މެންބަރު އިސްމާޢީލް ވިދާޅުވީ، ރައްޔިތުންގެ ހައްގުތަކެއް ގެއްލިގެން ކަމަށް ބުނެ މަގުމައްޗަށް ނިކުންނައިރު، ގެއްލިފައިވާ ހައްގެއް ނޭނގޭ ކަމަށެވެ. އަދި ރައްޔިތުންގެ ގެއްލިފައިވާ އެއްވެސް ހައްގެއް ނުފެންނަ ކަމަށާއި، އެމްޑީޕީއަށް އެކަމެއް ކިޔައިވެސް ނުދެވޭ ކަމަށް އެމަނިކުފާނު ވިދާޅުވިއެވެ.
"ދިވެހި ރައްޔިތުންގެ ހައްގުގައި މިބޭފުޅުންނަށް ކޮށްދެވިފައިވާ އެއްވެސް ކަމެއް އޮތް ކަމަށް އަޅުގަނޑު ގަބޫލެއް ނުކުރަން. 2008 އިން ފެށިގެން އައި ވެރިކަމުގައި، 30 އަހަރުގެ ވެރިކަން ބަދަލުވެގެން އައިއިރު، އޭރުގެ ރައީސުލްޖުމްހޫރިއްޔާ އަރާ ޓީވީތަކުގަޔާއި ރޭޑިއޯ ހިތާބުތަކުގައި އަޅުގަނޑުމެން އެ ދީނަކާމެދު ފަހުރުވެރިވާ އިސްލާމްދީނާ ދެކޮޅަށް އެތައް ވާހަކަތަކެއް ދައްކާފައި ހުރިކަން ދިވެހިރާއްޖޭގެ ރައްޔިތުންނަށް މިއަދު ފަތްފުށްތައް ހުޅުވާލީމާ ފެންނާނެ،" މެންބަރު އިސްމާޢީލް ވިދާޅުވިއެވެ.
އިތުރަށް ވާހަކަފުޅު ދައްކަވަމުން މެންބަރު އިސްމާޢީލް ވިދާޅުވީ، ވެރިކަމުގެ ފުރަތަމަ ދެ އަހަރުގެ ތެރޭގައި މިހާ ގިނަ މަޝްރޫޢުތަކެއް އެއްފަހަރާ ކުރިއަށް ގެންދިޔަ ސަރުކާރެއް ރައީސް މުޢިއްޒުގެ ސަރުކާރު ނޫނީ ނެތް ކަމަށެވެ. އަދި 2013 ވަނަ އަހަރު ރައީސް ޔާމީންގެ ވެރިކަމުގައިވެސް މަޝްރޫޢުތައް ފެށުނީ ދެ އަހަރާއި ބައި ވެފައިވަނިކޮށް ކަމަށް ފާހަގަކުރެއްވިއެވެ.
ރައީސް ޞާލިހުގެ ވެރިކަމުގައި ގިނަ ދަރަނިތައް ނެގި ނަމަވެސް، އެންމެ ރަނގަޅު ޕްރޮޖެކްޓެއްވެސް ރައްޔިތުންނަށް ފެންނަން ނެތް ކަމަށް މެންބަރު އިސްމާޢީލް ފާހަގަކުރެއްވިއެވެ. އަދި މީޑިއާ ބިލާ ގުޅޭގޮތުން ވާހަކަފުޅު ދައްކަވަމުން، އެއީ ގެންނަން ޖެހޭ އަދި އޮންނަން ޖެހޭ ގާނޫނެއް ކަމަށާއި، ހިތުހުރި އެއްޗެއް މީޑިއާގެ ވަސީލަތްތަކުން ގެނެސްދިނުމަކީ ތަހުޒީބު މުޖުތަމަޢުތަކުގައި އޮންނަ ގޮތެއް ނޫން ކަމަށްވެސް ވިދާޅުވިއެވެ.
ކިޔުންތެރިންގެ ޚިޔާލުތައް:
ތިޔަރަށު ކިޔަވާ ކުދިންނަށް އެންމެ ރަނގަޅު ގޮތަކީ އެހެންރަށަކަށް ކިޔަވަން ދިއުން. ފެރީއެއް ބޭއްވުން ރަނގަޅު