ބިންވެރިޔާ ސްކީމްގެ ދަށުން ރިޔާސީ އިންތިޚާބާ ދިމާކޮށް އެމްޑީޕީން ދޫކުރި ގޯތިތަކަކީ ރާއްޖޭގެ ތާރީޚުގައި ވެސް ބަޔަކު ހިންގާފައިނުވާ ވަރުގެ ބޮޑު ކޮރަޕްޝަނެއް ކަމަށް ސަރުކާރުގެ މައި ޕާޓީ ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހީމް ފަލާޙް ވިދާޅުވެއްޖެއެވެ.
ސަރުކާރުގެ މައި ޕާޓީ ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހީމް ފަލާޙް ވިދާޅުވެފައިވަނީ، ބިންވެރިޔާ ސްކީމްގެ ދަށުން ރިޔާސީ އިންތިޚާބާ ދިމާކޮށް އެމްޑީޕީން ދޫކުރި ގޯތިތަކަކީ ރާއްޖޭގެ ތާރީޚުގައި ވެސް ބަޔަކު ހިންގާފައިނުވާ ވަރުގެ ބޮޑު ކޮރަޕްޝަނެއް ކަމަށެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން ފަލާހު ފާހަގަކުރެއްވި ގޮތުގައި، އެމްޑީޕީގެ ފުރަތަމަ ވެރިކަމުގައި ދިރާގު ފަދަ ކުންފުނިތަކުގެ ހިއްސާތައް ވިއްކާލީ ކޮން އުސޫލުތަކެއްގެ މަތިންކަން މިއަދާ ހަމައަށް ވެސް ނޭނގެއެވެ. އަދި ދަތުރުފަތުރުގެ ނިޒާމުގެ ތެރެއިން ހުރި ފަޅުރަށްތައް ޕާޓީގެ އިސްވެރިންނާއި ގާތް ގުޅުން އޮތް މީހުންނަށް ބަހާލާފައިވާ ކަމަށް ވެސް އެމަނިކުފާނު ވިދާޅުވިއެވެ.
"ދަތުރުފަތުރު ހަރުދަނާކުރުމުގެ ނަމުގައި ދޯނިތަކެއް ގެނެސް، އެކަމުގައި ކޮރަޕްޝަންގެ އަމަލުތައް ހިންގާފައިވޭ،" ފަލާޙް ވިދާޅުވިއެވެ.
އެމްޑީޕީގެ ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އަށް ތަޢުރީފުކުރައްވަމުން ފަލާހު ވިދާޅުވީ، އެމަނިކުފާނަކީ ނަޒާހަތްތެރި ބޭފުޅެއް ކަމަށެވެ. އަދި އެމްޑީޕީގެ ތެރެއިން ބޭފުޅަކު މި މައްސަލަތައް ހުށަހަޅާފައިވާއިރު، އެހެން މެންބަރުން ވާހަކަދައްކަމުންދަނީ އެކަން ނުކޮށް ތިބެން ނުކެރިގެން ކަމަށް ދެކޭ ކަމަށް ވެސް ވިދާޅުވިއެވެ.
ފަލާހު އިތުރަށް ފާހަގަކުރެއްވި ގޮތުގައި، އެމްޑީޕީގެ އެހެނިހެން މެންބަރުންނާއި ކުޑޫއާ ދެމެދު ނުތަނަވަސްކަމެއް އުފެދިފައިވެއެވެ. އެހެނީ ކުޑޫ ކުރައްވަމުންދާ މަސައްކަތްތަކުގެ ސަބަބުން އެ ޕާޓީގެ މެންބަރުންގެ ކަންކަން ފަޅާއަރައި، ފަޟީހަތްވެގެންދާނެތީ ކަމަށް ވެސް އޭނާ ވިދާޅުވިއެވެ.
ކުރީގެ ރައީސް އިބްރާހިމް މުޙައްމަދު ޞާލިޙުގެ ވެރިކަމުގައި އެންމެ ބޮޑަށް ސަމާލުކަން ދެވުނު އެއް މައްސަލައަކީ ފެނަކަ ކޯޕަރޭޝަންގެ ކޮރަޕްޝަނުގެ މައްސަލަތަކެވެ. އޮޑިޓަރ ޖެނެރަލްގެ އޮފީހުން 2021 އިން 2023 އަށް ކުރި އޮޑިޓުތަކުން ހާމަވެފައިވާ ގޮތުގައި، ފެނަކައިގެ ތެރޭގައި ކޮރަޕްޝަނަށް މަގުފަހިވާ ގިނަ ކަންތައްތަކެއް ހިނގާފައިވެއެވެ.
