މަސްތުވާތަކެތީގެ މައްސަލައެއްގައި ލ. ދަނބިދޫއާއި ގަމުން ދެ މީހަކު އޮކްޓޫބަރު މަހުގެ 30 ވަނަ ދުވަހު ހިންގި އޮޕަރޭޝަނެއްގައި ހައްޔަރުކޮށްފިއެވެ. ހައްޔަރުކުރެވުނު މީހުންނަކީ ލ. ގަން، ހުދުފުސް، 60 އަހަރުގެ ޔޫސުފް ނަސީމާއި، ލ. މުންޑޫ، ހީނާވިލާ، 55 އަހަރުގެ އަޙުމަދު ޝަފީޤެވެ.
ފުލުހުން ވިދާޅުވި ގޮތުގައި، ޔޫސުފް ނަސީމް ހައްޔަރުކޮށްފައިވަނީ ގަން ޕޮލިހާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި އޭނާ ދިރިއުޅޭ ގެ ބަލައި ފާސްކުރިއިރު މަސްތުވާތަކެތިކަމަށް ބެލެވޭ ތަކެއްޗާއި، މަސްތުވާތަކެތީގެ ވިޔަފާރިކުރަން ބޭނުންކުރާކަމަށް ބެލެވޭ ތަކެތި ފެނިފައިވާތީއެވެ. ފުލުހުން ވިދާޅުވި ގޮތުގައި އެ ތަކެތީގެ ވަގުތީ ބަރުދަނަކީ 5.39 ގުރާމެވެ.
މި މައްސަލައާ ގުޅިގެން ޔޫސުފް ނަސީމްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، އޭނާ 10 ދުވަހަށް ބަންދުކުރުމަށް ވަނީ އަމުރުކޮށްފައެވެ.
އަޙުމަދު ޝަފީޤް ހައްޔަރުކޮށްފައިވަނީ ދަނބިދޫ ޕޮލިހާއި ކައުންޓަރ ނާކޮޓިކްސް އިންޓެލިޖެންސް ގުޅިގެން ހިންގި އޮޕަރޭޝަނެއްގައި ދަނބިދޫ ބަނދަރު މަތިންނެވެ. އޭނާ ބަލައިފާސްކުރިއިރު މަސްތުވާތަކެތިކަމަށް ބެލެވޭ ތަކެތި ފެނިފައިވާއިރު، އެ ތަކެތީގެ ވަގުތީ ބަރުދަނަކީ 46.32 ގުރާމެވެ.
އަޙުމަދު ޝަފީޤްގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން އޭނާ 5 ދުވަހަށް ބަންދުކުރުމަށް އަމުރުކުރިއެވެ. މި ދެ މައްސަލަވެސް ފުލުހުން ގެންދަނީ އިތުރަށް ތަހުގީގު ކުރަމުންނެވެ.
