މުޅި ރާއްޖޭގެ ޞިއްޙީ ހާލަތު ދެނެގަތުމަށް އަންނަ އަހަރު ދިރާސާއެއް ފަށަން ހަމަޖެހިއްޖެއެވެ. ޞިއްޙީ ވަޒީރު ޢަބްދުﷲ ނާޡިމް އިބްރާހިމް ވަނީ މުޅި ރާއްޖޭގެ ޞިއްޙީ ހާލަތު ދެނެގަތުމަށް އަންނަ އަހަރު ދިރާސާއެއް ފެށުމުގެ މަސައްކަތް ހާމަކުރައްވާފައެވެ. މިކަން ހާމަކުރެއްވީ، މި ދިރާސާ ހެދުމަށް ޔުނިސެފާއެކު ފަހުމުނާމާއެއްގައި ސޮއިކުރުމަށް ބޭއްވި ރަސްމިއްޔާތެއްގައެވެ.
މަލްޓިޕްލް އިންޑިކޭޓަރ ކްލަސްޓަރ ސަރވޭ (MICS) ގެ ނަމުގައި ކުރިއަށްގެންދާ މި ދިރާސާއަކީ ޞިއްޙީ ވުޒާރާއާއި ޔުނިސެފް މޯލްޑިވްސް ކަންޓްރީ އޮފީހާ ގުޅިގެން ކުރިއަށްގެންދާ މަސައްކަތެކެވެ. މި ފަހުމުނާމާގައި ވަޒީރު ނާޡިމާއި، ޔުނިސެފްގެ ޚާއްސަ މަންދޫބު ޑރ. އެޑްވަރޑް އަޑާއީ ވަނީ ސޮއިކުރައްވާފައެވެ.
MoH and @UNICEFMaldives have signed an MoU to implement the Multiple Indicator Cluster Survey (MICS) 2026–2027. MICS will collect nationwide data on health, nutrition, and well-being to guide policies and plan for a healthier Maldives. #MICS #HealthData #ForEveryChild #Maldives pic.twitter.com/pCd6mW6UdB
— Ministry of Health (@MoHmv) November 12, 2025
ވަޒީރު ވިދާޅުވީ، ޤައުމުތަކުގެ އިޤުތިޞާދު ކުރިއަރުވައި ސިޔާސަތުތައް އެކުލަވާލުމުގައި ތަފާސްހިސާބު މުހިންމު ނަމަވެސް، ޞިއްޙީ ދާއިރާއިން އަދާހަމަ ތަފާސްހިސާބެއް މިހާރު ނެތް ކަމަށެވެ. އެހެންކަމުން މި ދިރާސާއާއެކު ޞިއްޙީ ދާއިރާގެ ސިޔާސަތުތައް ކަނޑައެޅުމަށާއި، ފެންވަރު ރަނގަޅުކުރަންވީ ކަންކަން ދެނެގަނެ، ދެމެހެއްޓެނިވި ތަރައްޤީގެ ލަނޑުދަނޑިތަކަށް ވާޞިލުވުމަށް ބޮޑު ކުރިއެރުމެއް ލިބޭނެއެވެ.
ކްލަސްޓަރ ސަރވޭއަކީ ބައިނަލްއަޤުވާމީ ފެންވަރުގައި އާބާދީއާއި ޞިއްހަތާ ގުޅުންހުރި މިންގަނޑުތަކާއި، މައިގަނޑު ޞިއްޙީ ހާލަތު ދެނެގަތުމަށް ޔުނިސެފްގެ އެހީގައި ގިނަ ޤައުމުތަކުގައި ކުރާ ދިރާސާއެކެވެ. މި ދިރާސާގެ މަސައްކަތް އަންނަ އަހަރުގެ ކުރީކޮޅު ފެށިގެންދާނެ ކަމަށާއި، އޭގެ ބޭނުމަކީ ޞިއްޙީ ދާއިރާގެ ދުރު ރާސްތާ ޕްލޭނާއި ސިޔާސަތުތަކަށް ބޭނުންވާ މަޢުލޫމާތު އެއްކުރުން ކަމަށް ވަޒީރު ވިދާޅުވިއެވެ.
ރާއްޖޭގެ ޞިއްޙީ ޙާލަތާ ގުޅޭގޮތުން އެންމެ ފަހުން ދިރާސާއެއް ކުރިއަށް ގެންގޮސްފައިވަނީ 2017 ވަނަ އަހަރު ކަމަށާއި، އޭގެފަހުން މިފަދަ ދިރާސާއެއް ހަދާފައިނުވާތީ، ޞިއްޙީ ދާއިރާގެ ކުރިއެރުމަށް ކުރަންވީ ކަންކަން ދެނެގަތުމުގައި މިހާރު ދަތިތަކެއް ދިމާވެފައިވާކަން ވަޒީރު ފާހަގަކުރެއްވިއެވެ.
މި ދިރާސާގައި އާބާދީގެ ޞިއްހަތާއި، ދަރިމައިވުމުގެ ޞިއްހަތާއި، ކުޑަކުދިން ހެދިބޮޑުވަމުންދާ މިންވަރާއި، ދިވެހިން ޢާންމުކޮށް ކައިބޮއެ އުޅޭ ތަކެއްޗާ ބެހޭ މަޢުލޫމާތު އެއްކުރެވޭނެއެވެ. އަދި މި ދިރާސާ ހުރިހާ އަތޮޅެއްގައި ކުރިއަށް ގެންދެވޭނެ ކަމަށާއި، 6000 ގޭބިސީއަކަށް ޒިޔާރަތް ކުރުމަށް ހަމަޖެހިފައިވާ ކަމަށް ވަޒީރު ވިދާޅުވިއެވެ.
