ރައީސް ޑރ. މުޢިއްޒުގެ "ޝަޚްސިއްޔަތު" ލަވަ

2023 ވަނަ އަހަރުގެ ރިޔާސީ އިންތިޚާބުގެ ކެމްޕެއިންގެ ފޯރިގަދަވެގެން ދިޔަ ދުވަސްވަރެވެ. ޓީވީ ބަލާލަން އިށީނީމެވެ. ޗެނަލްތައް ބަދަލުކުރަމުންދަނިކޮށް، އަޅުވާލެވުނު ޗެނެލުން ގުގުމަމުން ދިޔައީ އެންމެ ހިމަ ނާރާ ކުޅެލާފަދަ ފަށުވި އިބާރާތްތަކެކެވެ. ހިތުގެ އެންމެ ފުނަށް އެ ޝުޢޫރުތައް ފާއްދާލިފަދައެވެ. އިވެމުންދިޔައީ ޝަޚްސިއްތެއްގެ ވާހަކައެވެ. ލަވައެއްގެ ސިފައިގައެވެ. "އެންމެ ގާބިލު ކެންޑިޑޭޓް". މި ފުރިހަމަ ލަވައެވެ. މި ލަވަ ނިމެންދެން މަޑުކޮށްލައިގެން އިނީމެވެ. އަދިވެސް އެއް ފަހަރު އެ ލަވަ އަޑުއަހާލާ ހިތްވިއެވެ. އެއީ، އެ ލަވައިން އިވިގެންދާ "ޝަޚްސިއްޔަތަކީ" ކުރިއަށް އޮތް ދައުރުގެ ރައީސްކަމަށް ވުން އެންމެ ގާތް ފަރާތްކަމުގައި ޤަބޫލުކުރެވިފައިވުމެެވެ.

އެ ލަވައިން އުފެއްދީ ޤައުމީ ޝުޢޫރެކެވެ. ޤައުމަށް ބޭނުންވެފައިވާ ޝަޚްސިއްޔަތެއްގެ މައްޗަށް އުފެދޭ ވަރުގަދަ ޝުއޫރެވެ. މި ލޮބުވެތި ޤައުމަށް ބޭނުންވަނީ އެފަދަ ހަރުދަނާ ޝަޚްސިއްޔަތެއްކަން ޔަޤީނެވެ.

އޭގެ ފަހުންވެސް އެ ލަވަ ގުގުމަމުން ދިޔައެވެ. ދިވެހި ފަޒާގެ ތެރޭގައެވެ. ކެމްޕެއިން ހަރަކާތްތަކަށް އިތުރު ޖޯޝަކާއި ފޯރިއެއް ގެނުވި ލަވަޔަކީ އެއީއެވެ. ޕީއެންސީގެ އޭރުގެ ރިޔާސީ ކެންޑިޑޭޓް ޑރ. މުޙައްމަދު މުޢިއްޒު ރާއްޖޭ ޒަޢާމަތަށް ގެނައުމަށް ކުރެވުނު ކެމްޕެއިންގެ އާރުކާޓީންނަށް އިތުރު ހިތްވަރަކާއި އިތުރު ފޯރިއެއް ގެނައުމުގައި މިލަވަ މުހިއްމު ދައުރެއް އަދާކުރިއެވެ. ބަދަހިިކަމާއި އެކުވެރިކަމުގެ ސަފުތަކަށް އާރޯކަން ގެނުވިއެވެ.

މިހާ ހިސާބުން މި ލަވަ އުފަންވެގެން އައީ ކިހިނެތްތޯ ބަލާލަން އަޅުގަނޑު ޝައުޤުވެރިވިއެވެ. ފުރަތަމަވެސް އިވުނީ މަރީ މިސްއެއްގެ ވާހަކައެވެ. ހިތުގައި ހިނގަމުންދިޔަ ޝުޢޫރުތަކާއި ޚިޔާލުތައް ޖޯޝުން ފުރިގެންވާ އިބާރާތްތަކަކަށް ތިލަކޮށް، އަމުނާލެވޭނީ ޅެންވެރިކަމުގެ ފަންނާއި ހުނަރު ހުރި މީހަކަށެވެ. މަރީ މިސް (ރ. މީދޫ، މަރިޔަމް އިބްރާހީމް) ގެ ފަންނުވެރިކަން މިއޮތީ ފެންނާށެވެ. ފުރަތަމަ އަމުނާލީ ކެމްޕެއިން ލަވައެވެ. ދެން އަމުނާލީ ކެންޑިޑޭޓް ހޮވުމުން މަރުޙަބާ ކިއުމުގެ ލަވައެވެ.

ޕީއެންސީގެ ކެމްޕެއިން ލަވަ: އެންމެ ގާބިލު ކެންޑިޑޭޓް

"ޚުލްޤެއް ރިވެތި ލިބިވީ ޝަޚުސިއްޔަތު ހޮވަމާހޭ.
ޢިލްމާއި ހިލްމެއް ވާ ޝަހުސިއްޔަތު ހޮވަމާހޭ.
ދިވެހި ބިމުން މި ވެށި ތެރޭން ނަންފުޅު ބަބުޅާނޭ..
ޑޮކުޓަރ މުއިއްޒުގެ ނެވިކަން މާ ގަދަކޮށް ދައްކާނޭ
އޯ…

ފެނިލައިފި ރިޔާސީ ރޭހުން އެކި ނަންނަން
އެހެނަސް ގައިމޭ، މާ ތަފާތޭ އެއްނަން.
ހީރާ އެވަނީ ހަތަރެއްގާ، އެ ނަގާށޭ
ވިދުވަރު ވާނޭ ގައުމު ރޯޝަންވާނޭ.
ދިވެހި ބިމުން މި ވެށި …….

ދިވެހިންގެ ވަތަން ދިވެހިންނަށް ، ކަށަވަރު ކޮށް.
އަނބުރާ ހޯދަން އެއްބުރުން ނިންމާލަން.
ފެންނާާނެ މަނާޒިރު ގައުމުން އެކި ރޮނގުގައި
އުއްމީދޭ މީ ގައުމު މި ހިނދުން ކުރެވޭ
ދިވެހި ބިމުން މިވެށި ތެރޭން ނަން……"

މި ލަވަ ފުރަތަމަ ޖެހީ ރައީސް މުޢިއްޒު ރިޔާސީ ކެމްޕެއިން ދަތުރުފުޅުގެ ތެރެއިން ރ. މީދޫއަށް ފައިބައިވަޑައިގެންނެވި ވަގުތުގައެވެ. އެ ރަށުގެ ބަނދަރު މަތީގައި ޖަހަމުންދިޔަ އެ ލަވައިގެ ޖޯޝުން ސަޕޯޓަރުންގެ ފޯރިއާއި ޖޯޝް އުތުރިއަރަމުންދިޔައެވެ.

ޕީއެންސީގެ ކެންޑިޑޭޓް، ރައީސް ޑރ. މުޙައްމަދު މުޢިއްޒު ހޮވިވަޑައިގަތުމުން ތައްޔާރުކުރި ލަވަ:

ޝުކުރާއި ތަޢުރީފުން މި ތަރާނާ އިއްވާނީ
ޒިކުރާ ވެވޭ ނަންފުޅު މައެދާނުން ގުގުމާނީ.
މިއަދު ސަފުން ނުކުމެ ހުރީ ، ޤާބިލު ވެރިޔެއް މާ
ޑޮކްޓަރ މުއިއްޒުގެ ނިޔަނެތި ޝަޚުސިއްޔަތު ފެންނާނޭ.

މިކުރީ މި ވަތަން ހަވާލޭ، މި އަމާނާތް
ރައްކާތެރި ކޮށް ގައުމު ރޯޝަން ކޮށްލަން.
އިތުބާރު މިއަދު ދިވެހިންނަށް ލިބިވާތީ
އުއްމީދެއްގައި މާ ޔަގީންކޮށް މިތިބީ.
މިއަދު ސަފުން……..

ދިވެހިންގެ ލަގަން ދިވެހިންނަށް ހޯދައިދޭން
ދިވެހިންގެ ދަރީން ޖޯޝުގައި ކުރި ހިއްމަތް
ލިޔެވޭނެ ޒަމާނަށް ދެމިވާ ސަފުޚާގައި
ގައުމީ ލޯތްބޭ ރޫޙުގައި ތިޔަ ދެއްކީ
މިއަދު ސަފުން……

މަރުޙަބާ ކިޔުމަށް ހެދި މި ލަވައަކީ، އިންތިޚާބީ ރައީސަށް މަރުޙަބާ ކިޔުމަށް ސޯޝަލް ސެންޓަރުގައި ބޭއްވި ޖަލްސާއަށް ތައްޔާރުކުރި ލަވައެވެ. އެ ލަވަ ލިޔަން ފުރަތަމަ ފެށީވެސް ޖަލްސާ ފެށުމުގެ 3 ގަޑިއިރު ކުރިންނެވެ. ބައިގަޑި އިރެއްހާ އިރުގެ ތެރޭގައި ލަވައިގެ ލިރިކްސް ނިންމާލިއެވެ. ތިން ގަޑިއިރު ތެރޭގައި ލަވަ ތައްޔާރުކޮށް، ލަވަ ކިޔައި ނިންމާލުމުން މި ފަންނުވެރިންގެ ހުށިޔާރުކަން ވަޒަންކުރެވެއެެވެ.

މި ދެ ލަވައިގެ ލިރިކްސްވެސް ތައްޔާރުކުރެއްވީ މަރީ މިސްއެވެ.

"ކޮންމެ ލަވައެއްވެސް ރެކޯޑްކުރަން ދާން ދެތިން ގަޑިއިރަށް ވީމަ އާސިމް ގުޅާފަ ބުނާނީ ލަވަ ހަދަން." މަރީ މިސް ވިދާޅުވިއެވެ. އާސިމް (މުޙައްމަދު އާސިމް، ރ. މީދޫ) އަކީ ޕީއެންސީގެ ސެނެޓް މެންބަރެކެވެ. މިހާރު ސްޕޯޓްސް މިނިސްޓްރީގެ ޑެޕިޔުޓީ މިނިސްޓަރެކެވެ. ހަމައެހެންމެ، މި ލަވަ ވުޖޫދަށް ގެނައުމުގައި މީދޫ ދާއިރާގެ މެންބަރު އަޙްމަދު ޒާހިރުގެ ހިއްސާ ބޮޑުކަން ފާހަގަކޮށްލަންޖެހެއެވެ.

"އަޅުގަނޑު ވަރަށް އުފާވޭ އަޅުގަނޑު ހެދި ލަވަ ރައީސްއަށް ރީތިވީމަ. ޝަޚުސިއްޔަތު އެ ނަމާއެކު މުޅި ގައުމުގަ ވިދާލީމަ. ޝަޚުސިއްޔަތު އަޅުގަނޑަށް ލަވައިގަ ގެނެވުނު ސަބަބަކީ، އާސިމު ގުޅުއްވާފަ ލަވައެއް ހަދަން ވިދާޅުވީ ޑޮކްޓަރ މުޢިއްޒު އޭރު އެއީ ރައީސްއެއް ނޫންތާ! އާސިމު ވިދާޅުވީ މުޢިއްޒު ރަށަށް ވަޑައިގަންނަވަނީޔޭ، އަޅުގަނޑުގެ ރަށް ރ.މީދޫއަށް. އެހެންވީމަ ރަށުގަ ޖަހާނެ ލަވައެއް ހަދާށޭ. ލަވަ ޚާއްސަ ކުރާށޭ ހަމައެކަނި ޑޮކްޓަރ މުޢިއްޒަށް.
ދެން އަޅުގަނޑު ވިސްނާލީ، ޑޮކްޓަރ މުޢިއްޒަށް އިނގޭތޯ! އަޅުގަނޑު ލޯ މަތިން ތަސައްވަރުވީ، ސިނަމާލެ ބުރިޖު އަޅަމުން ދިޔައިރު އެތަނުގަ އެމަނިކުފާނު ކުޅުއްވަމުން ގެންދެވި އިސްރޯލު. ޓީވީން ޚަބަރު ގަޑިތަކުގަ ވީޑިއޯ އަޅުގަނޑަށް ފެންނަނީ.ހާއްސަ ހެދުމެއް އަޅުއްވައިގެން މަސައްކަތުގެ ބައިވެރިންނާއެކު އެ ފެންނަ ފެނުން ވަރަށް " ވަންތަ" ކޮށް އަޅުގަނޑަށް ސިފަވީ. އެތަނުން އޭނީ އަޅުގަނޑަށް ހަމަ ޝަޚުސިއްޔަތު އެ ނަން ގެނެވިފަ. ދެން ހަމަ ވަރަށް ބަސްމަދު ޢަމަލުގިނަ ބޭފުޅެއްގެ ގޮތުގަ، ކޮންމެވެސް ވަރެއްގެ ހިނިތުންވުމެއް އަބަދުވެސް މޫނުފުޅުން ފާޅުވެފަ ހުރުން، މި ކަހަލަ ކަންކަމަށް އަޅުގަނޑު ލަވަ ހަނދަން އިނދެ ވިސްނަމުން، ރިވެތި ޚުލްޤާއި ހިލްމު ލަވައިގަ ގެނެސް އެވަނީ.ދެން ޢިލްމީ ބޭފުޅެއްކަން އެނގޭނެދެއްތޯ! ކޮންމެއަކަސް ލަވައާއިމެދު ރައީސް ވަރަށް ހިތްޕުޅާ ހަމަ ކުރެއްވިކަން އެނގުނީމަ އަޅުގަނޑު ވަރަށް ހިތްހަމަ ޖެހުނު." މަރީ މިސްގެ ޝުޢޫރު ހިއްސާކުރައްވަމުން ވިދާޅުވިއެވެ.

ޖޯޝުން ފުރިގެންވާ މި ދެ ލަވަވެސް ކިޔާފައިވަނީ، މަޝްހޫރު ލަވަކިޔުންތެރިންކަމަށްވާ ސޮބާ (ޙުސައިން ޞަބާޙް) އާއި ރާފިޔަތު ރަމީޒާ އެވެ. ލަވަ ރިކޯޑްކުރުމުގެ މަސައްކަތުގެ ތެރޭގައި ރާފިޔަތުގެ ފިރިކަލުން އިބްރާހީމް އާމިރު އިސް ދައުރެއް އަދާކުރެއްވިއެވެ. ލަވައިގެ މިއުޒިކް މޮޑިފައިކޮށް ތައްޔާރުކުރީ ސޮބާއެވެ. މި ބޭފުޅުންގެ ހުނަރުވެރިކަމާމެދު ސުވާލެއް ނުއުފެދެއެވެ. ތިންގަޑި އިރެއްހާ އިރުގެ ތެރޭގައި ލަވައިގެ މިއުޒިކް ތައްޔާރުކުރައްވައި ލަވައިގެ ރިކޯޑިން ހައްދަވައި ނިންމަވާލެއްވުމީ މިކަމުގެ ހެތްކެކެވެ.

ރިޔާސީ އިންތިޚާބު ކާމިޔާބު ކުރެއްވުމަށްފަހު ރައީސް ޑރ. މުޢިއްޒު މި ޓީމާ ބައްދަލުކުރައްވައި، ޝުކުރު އަދާކުރެއްވިއެވެ. ލަވައިގެ ފުރިހަމަކަމުގެ ވާހަކަ އެމަނިކުފާނު ވިދާޅުވިއެވެ.

މި ލަވައިގައި ފާހަގަކޮށްފައިވަނީ ޝަޚްޞިއްޔަތެއްގެ ހަރުދަނާ ކަމުގެ ޝުޢޫރެވެ. މިކަމާ ދެބަސްވެވޭކަށް ނެތެވެ. ރާއްޖޭގެ ޒަޢާމަތާ ޙަވާލުވެވަޑައިގެންނެވުމުގެ ކުރިންވެސް އެމަނިކުފާނަކީ ހަރުދަނާ ޝަޚްސިއްތެކެވެ. ޢިލްމީ ޤާބިލު ބޭފުޅެކެވެ. ޑރ. މުޢިއްޒު ޙާޞިލްކުރައްވާފައިވަނީ އިނގިރޭސިވިލާތުގެ ލީޑްސް ޔުނިވަރސިޓީން ސިވިލް އިންޖީނިއަރިންގގެ ދާއިރާއިން ޕީއެޗްޑީއެވެ. އަދި ޕްރޮޖެކްޓް މެނޭޖްމަންޓް ޕްރޮފެޝަނަލް (ޕީއެމްޕީ) ސެޓްފިކެޓްވެސް ހާސިލްކުރައްވާފައިވެއެވެ.

ސަރުކާރުގެ ޚިދުމަތް ފެށްޓެވީ 1998 ވަނަ އަހަރު މިނިސްޓްރީ އޮފް ކޮންސްޓްރަކްޝަން އެންޑް ޕަބްލިކް ވަރކްސްގެ ޕްލޭނިންގ ޓެކްނީޝަން ޓްރޭނީއެއްގެ މަގާމުންނެވެ.

2012 އިން 2018 އަށް ހައުސިންގ މިނިސްޓަރުކަމުގައި ހުންނަވައި، ސިނަމާލެ ބްރިޖާއި، ހިޔާ ފްލެޓްތަކާއި، ދަރުމަވަންތަ ހޮސްޕިޓަލް ފަދަ ތާރީޚީ ގިނަ ބިޔަ މަޝްރޫޢުތައް ކާމިޔާބުކަމާއެކު ހިންގެވިއެވެ.

މިނިސްޓަރުކަމުގެ ދައުރުގައި ރާއްޖޭގެ ތާރީޚުގައި އެންމެ ގިނަ ގެދޮރުވެރިކަމުގެ މަޝްރޫޢުތަކާއި، ބިން ހިއްކުމުގެ ބޮޑެތި މަޝްރޫޢުތައް ހިންގަވައި މަގުތައް ތާރުއެޅުއްވިއެވެ.

މާލޭގެ ރައްޔިތުންގެ ސީދާ ވޯޓަކުން އިންތިޚާބުކުރި ފުރަތަމަ މޭޔަރުގެ ހައިސިއްޔަތުން (2021-2023)، މާލެ ސިޓީގައި ފެހިކޮށް ޗާލުކުރުމުގެ މަސައްކަތްތައް ކުރައްވައި، ރައްޔިތުންނާ ސީދާ ބައްދަލުކުރެއްވުމުގެ ނަމޫނާ ދެއްކެވިއެވެ.

ދެން އޮތީ ރައީސުލްޖުމްހޫރިއްޔާކަމުގެ މަޤާމާ ޙަވާލުވެވަޑައިގެން އެ މަނިކުފާނުގެ ޝަހްޞިއްޔަތު ދެއްކެވި ކަންކަމެވެ. ޤައުމަށް ކުރިއެރުން ގެންނަވާ މަންޒަރު އެ ދަނީ ފެންނަމުންނެވެ. ދަރަނިވެރިވެފައިވާ ޤައުމު ބަގުރޫޓް ވާން ދޫކޮށް ނުލައްވައި ރާއްޖޭގެ އިޤްތިޞާދު ކޮޅަށް ޖައްސަވައިފިއެވެ.

ޤައުމުގެ އެންމެ މަތީ ވެރިޔާގެ ހައިސިއްޔަތުން ދިވެހިރާއްޖޭގެ މީހުން ދިރިއުޅޭ ހުރިހާ ރަށަކަށް ރެކޯޑް މުއްދަތެއްގެ ތެރޭގައި ޒިޔާރަތްކުރައްވައި އެމަނިކުފާނު ވަނީ، ރާއްޖޭގެ ސިޔާސީ މައިދާނުގައި ތާރީޚީ ކާމިޔާބީއެއް ޙާޞިލުކުރައްވާފައެވެ. އެއީ 1 އަހަރާއި 11 މަސްތެރޭގައެވެ. އެ ރަށްރަށުގައި ގިނަ މަޝްރޫޢުތަކެއް ފައްޓަވައިފިއެވެ. ބިން ހިއްކުމާއި، ބަނދަރު ހެދުމާއި، ސްކޫލްތައް ބިނާކުރުމާއި ހޮސްޕިޓަލު އިމާރާތްތައް ޤާއިމުކުރުމާއި، ފުލުހުންގެ އިދާރާތައް ޤާއިމުކުރުމާއި، ސްޕޯޓްސް ކޮމްޕްލެކްސްތަކާއި، ފެނާއި ނަރުދަމާގެ މަޝްރޫޢުތަކާއި ހައުސިން މަޝްރޫޢުތައް ފައްޓަވައިފިއެވެ.

ވެލާނާ އިންޓަރނޭޝަނަލް އެއަރޕޯޓްގެ އައު ޓާމިނަލް ތަރައްޤީކޮށް ނިންމައި ހުޅުވައިފިއެވެ. ޖުމްލަ 72،000 އަކަ މީޓަރުގެ ބޮޑު މި ޓަރމިނަލާއެކު ފުރަތަމަ ފަހަރަށް ރާއްޖޭގައި އެއިރޯ ބްރިޖްތައް ބޭނުންކުރަން ފަށައިފިއެވެ. މިގޮތުން ޓަރމިނަލުގައި 12 އެއިރޯ ބްރިޖް ޤާއިމްކުރެވިފައިވެއެވެ. މިއިން ކޮންމެ އެއިރޯ ބްރިޖަކީ އެންމެ ޒަމާނީ ވަސީލަތްތަކާއެކު އޭސީ ކުރެވިފައިވާ ބްރިޖްތަކެއް ކަމަށާއި މިކަމުގެ ސަބަބުން ފްލައިޓުން މީހުން ބޭލުމަށް ހޭދަވާ ވަގުތު 8 މިނިޓަށް ކުޑަވެގެންދާނެ ކަމަށް އެމްއޭސީއެލްއިން ވަނީ ވިދާޅުވެފައެވެ.

ހަނިމާދޫ އިންޓަރނޭޝަނަލް އެއަރޕޯޓް ތަރައްޤީކޮށް ހުޅުވައިފިއެވެ. މި ސަރުކާރު ރާއްޖޭގެ ވެރިކަމާ ހަވާލުވިއިރު، ހަނިމާދޫ އެއަރޕޯޓު މަޝްރޫޢުގެ ގާތްގަނޑަކަށް 28 އިންސައްތަ މަސައްކަތް ނިމިފައިވެއެވެ. ނަމަވެސް ބާކީހުރި 72 އިންސައްތަ މަސައްކަތް ނިންމާފައިވަނީ މި ސަރުކާރުންނެވެ.

އަސާސީ ބޭންކިންގ ޚިދުމަތާއެކު ރަށްރަށަށް އިޤްތިޞާދީ ކުރިއެރުމާއި މާލީ ބާރުވެރިކަން ގެނުވައިފިއެވެ. އޭޓީއެމް މަޝްރޫޢުގެ ދަށުން މުޅި ރާއްޖޭގައި 105 އޭޓީއެމް ބަހައްޓައި، ރާއްޖޭގެ ހުރިހާ ރަށެއްގައި ފުރަތަމަ ފަހަރަށް އޭޓީއެމްގެ ޚިދުމަތް ދޭން ފަށައިފިއެވެ.

ޤައުމުގެ އިޖްތިމާޢީ ހަމަޖެހުމާއި ދުޅަހެޔޮކަމަށް ގިނަ ފިޔަވަޅުތަކެއް އަޅުއްވައިފިއެވެ. ވޭޕް މަނާކޮށްފިއެވެ. ދުންފަތުގެ އިސްތިޢުމާލުކުރުމުގެ ޖެނަރޭޝަނަލް ބޭންއެއް ގެެނެސްފިއެވެ.

މިހެންގޮސް އެތައް ކަމެކެވެ. ރައީސް ޑރ. މުޢިއްޒުގެ ޝަޚްސިއްޔަތު ފެނިއްޖެއެވެ. ޤައުމު ހެއްވާލައިފިއެވެ. އިރާދަކުރެއްވިއްޔާ ޤައުމަށް ދެންވެސް އޮތީ ކުރިއެރުމާއި އުފާ ފާގަތިކަމެވެ.