މޯލްޑިވިއަނުން ކޮޗިންއާއި ޓްރިވެންޑްރަމަށް ކުރާ ދަތުރުތައް އިތުރުކުރަނީ

ޤައުމީ އެއަރލައިން މޯލްޑިވިއަނުން އިންޑިއާގެ 2 މަންޒިލަކަށް ކުރަމުން އައި ދަތުރުތައް އަންނަ މަހުން ފެށިގެން އިތުރުކުރާ ގޮތަށް ނިންމައިފިއެވެ.

މޯލްޑިވިއަނުން ބުނީ، އިންޑިއާގެ ޓްރިވެންޑްރަމާއި ކޮޗިންއަށް ކުރަމުން އައި ދަތުރުތައް އިތުރު ކުރާ ގޮތަށް ނިންމާފައިވާ ކަމަށާއި، މި ދަތުރުތައް އިތުރުކުރަނީ، ޑިސެމްބަރު މަހުގެ 19 ވަނަ ދުވަހުން ފެށިގެން ކަމަށެވެ.

އެގޮތުން ޑިސެމްބަރު 19 އިން ފެށިގެން މި 2 މަންޒިލަށްވެސް މޯލްޑިވިއަނުން ކުރަމުން އައި ދަތުރުތައް 5 ދަތުރަށް އިތުރު ކުރާ ގޮތަށް ވަނީ ނިންމާފައެވެ. މިހާރު މިމަންޒިލްތަކަށް ކުރަނީ، ކޮންމެ މަންޒިލަކަށް ހަފްތާއަކު 4 ދަތުރެވެ.

މޯލްޑިވިއަނުން ވަނީ، މި ދަތުރުތަކަށް ޓިކެޓް ބުކް ކުރުމުގެ ފުރުޞަތު މިހާރު ހުޅުވާލާފައެވެ. ޤައުމީ އެއަރލައިން މޯލްޑިވިއަނުން މިވަގުތު ޝެޑިއުލް ދަތުރުތައް ކުރަނީ، ބައިނަލްއަޤްވާމީ 2 ޤައުމެއްގެ 5 މަންޒިލަކަށެވެ. އެއީ، ޗައިނާގެ 3 ސިޓީއަކަށާއި، އިންޑިއާގެ 2 ސިޓީއަކަށެވެ.

މޯލްޑިވިއަނުން ދަނީ، އެ ކުންފުނީގެ ދަތުރުތައް ބައިނަލްއަޤްވާމީ ގިނަ ޤައުމުތަކަކަށް ފުޅާކުރުމުގެ މަސައްކަތް ކުރަމުންނެވެ.