މޫޑީސް އިން ދިވެހިރާއްޖޭގެ ކްރެޑިޓް ރޭޓިން އައުޓްލުކް ސްޓޭބަލްކަމަށް ކަނޑައެޅުމަކީ، ވިޔަފާރިތަކަށާއި އިންވެސްޓަރުންނަށް ލިބޭނެ ވަރަށް ބޮޑު ޔަގީންކަމެއް ކަމަށް އިޤްތިސާދީ ތަރައްގީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. ވަޒީރު މިހެން ވިދާޅުވީ، މޯލްޑިވްސް އެމްއެސްއެމްއީ އެވޯޑް 2025 ޙަފްލާގައި ވާހަކަ ދައްކަވަމުންނެވެ.
ވަޒީރު ސަޢީދު ވިދާޅުވީ، މި ސަރުކާރު ވެރިކަމާއި ހަވާލުވިއިރު ރާއްޖޭގެ އިޤްތިޞާދު އޮތީ ވަރަށް ހީނަރުކޮށް ކަމަށާއި، ވިޔަފާރިވެރިން ތިބީ މާޔޫސްކަމެއްގެ ތެރޭގައި ކަމަށެވެ. އެގޮތުން ރާއްޖޭގެ ސްކޫލުތަކާއި ހޮސްޕިޓަލްތައް މޯގޭޖްކޮށް ރާއްޖޭގެ ރޭޓިން އޮތީ ވަރަށް ބޮޑަށް ދަށުގައި ކަމަށް ވެސް ވަޒީރު ފާހަގަކުރެއްވިއެވެ. ނަމަވެސް، ރައީސުލްޖުމްހޫރިއްޔާގެ ކެތްތެރިކަމާއި ޙިކުމަތްތެރިކަމާއިއެކު ކުރެއްވި މަސައްކަތުން މިކަން ބަދަލުކުރެވިފައިވާ ކަމަށް ވަޒީރު ވިދާޅުވިއެވެ.
"މޫޑީސްއިން ރާއްޖޭގެ އައުޓްލުކް ސްޓޭބަލް ކަމަށް ވަނީ ކަނޑައަޅާފައި. މިއީ، ކުދި ވިޔަފާރިތަކާއި ޖުމްލަކޮށް ހުރިހާ ވިޔަފާރިތަކަށް ލިބޭ ބޮޑު ހިތްހަމަޖެހުމެއް އަދި ލިބޭ ޔަޤީން ކަމެއް. ވިޔަފާރިތަކަށް ބޭނުންވަނީ، މި ޔަޤީންކަން. އިޤްތިޞާދު އޮތް ޑިޕްރެޝަނުން ސްޓެބިލިޓީއަކަށް އައިކަން އެ އިޢުލާނުކުރީ،" އިޤްތިޞާދީ ވަޒީރު މުޙައްމަދު ސަޢީދު ވިދާޅުވިއެވެ.
ކުދި ވިޔަފާރިތަކަށް ދެވޭ އެހީތެރިކަން
ކުދި ވިޔަފާރިތައް ކުރިއަރާ ދިއުމަށް ބޭނުންވާ ކަންކަން ފަހިކޮށްދިނުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށް ވަޒީރު ވިދާޅުވިއެވެ. އެގޮތުން ކުދި ވިޔަފާރިތަކަށް ޢަމާޒުކޮށް 141 ޓްރެއިނިންގ ޕްރޮގްރާމް ހިންގާ 2500 ފަރާތަކަށް ބޭނުންވާ ތަމްރީނާއި އިރުޝާދުތައް ދީފައިވާ ކަމަށް އޭނާ ވިދާޅުވިއެވެ. އަދި، ކުދި އަދި މެދުފަންތީގެ ވިޔަފާރިތަކަށް ޚާއްސަކޮށް ބޭއްވި އެކްސްޕޯއަކީ މިހާތަނަށް ރާއްޖޭގައި ބޭއްވި އެންމެ ފުރިހަމަ އެކްސްޕޯ ކަމަށް ވެސް ވަޒީރު ފާހަގަކުރެއްވިއެވެ.
ވިޔަފާރިތަކަށް މާކެޓް އެކްސެސް ހޯދައިދިނުމަށް ކުރާ މަސައްކަތުގެ ތެރެއިން، ދުނިޔޭގެ ވިޔަފާރީގެ އެންމެ ބޮޑު ބާޒާރުކަމަށްވާ ޗައިނާއާއެކު ރާއްޖެއިން މިނިވަން ވިޔަފާރީގެ އެއްބަސްވުމެއް އެކުލަވާލައި، އެއަށް އަމަލުކުރަމުންދާކަން ވަޒީރު ފާހަގަކުރެއްވިއެވެ. މީގެ އިތުރުން، ދިވެހިންގެ އަމިއްލަ އުފެއްދުންތައް ވިއްކުމަށް ޚާއްސަ 'އޮތެންޓިކް މޯލްޑިވްސް' މެދުވެރިވެގެން ރާއްޖޭގެ 400 ވިޔަފާރިއަކަށް މި ދެ އަހަރުގެ ތެރޭގައި 50 މިލިއަން ރުފިޔާ ބީސީސީން ފޯރުކޮށްދީފައިވާ ކަމަށް ވެސް ވަޒީރު ވިދާޅުވިއެވެ.
ޑިޖިޓަލް ވިޔަފާރިއަށް އަންނަ ބަދަލުތައް
ވަޒީރު ވިދާޅުވީ، ރައީސްގެ މެނިފެސްޓޯގައި ހިމެނޭ، ޕޭޕާލްގެ ޚިދުމަތް ރާއްޖެ ގެނައުމަށް އުރީދޫއާކު ކުރަމުންދާ މަސައްކަތުގެ ދަށުން އަންނަ އަހަރުގެ ކުރީކޮޅު ޚިދުމަތް ފެށޭނެ ކަމަށެވެ. އަދި ބީއެމްއެލްގެ ބުރަ މަސައްކަތާއެކު "ސްވައިޕް"ގެ ނަމުގައި އެސްއެމްއީ ޑިޖިޓަލް ޕްލެޓްފޯމެއްވެސް ޤާއިމުކޮށްފައިވާ ކަމަށް ވަޒީރު ވިދާޅުވިއެވެ.
ވިޔަފާރިއާއި އިޤްތީޞާދީ ދާއިރާގެ ރެގިއުލޭޓަރީ ފްރޭމް ވަރކްތަކާއި، ޤާނޫނުތައްވެސް ސަރުކާރުން ހަރުދަނާ ކުރަމުންދާ ކަމަށް ވަޒީރު ވިދާޅުވިއެވެ. އެގޮތުން އައިޕީ އިންފްރާސްޓްރަކްޗަރ ހަރުދަނާކޮށް ފަންނުވެރިންގެ ހައްގުތަކަށް މަސައްކަތްކުރުމަށް އެކުލަވާލާފައިވާ ބަރން ކޮންވެންޝަންގައި ފުރަތަމަ ފަހަރަށް ރާއްޖެއިން ބައިވެރިވެފައިވާކަން ވެސް ވަޒީރު ފާހަގަކުރެއްވިއެވެ. އަދި އަންނަ އަހަރު އައިޕީ އޮފީހެއް ރާއްޖޭގައި ޤާއިމުކުރާނެ ކަމަށް ވެސް ވަޒީރު ވިދާޅުވިއެވެ. ވަޒީރު ވަނީ، އެންމެ ކުދި، ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ސަރުކާރުން ދެވެން އޮތް ހުރިހާ އެއްބާރުލުމެއް ދެއްވާނެކަމުގެ ޔަޤީންކަން ދެއްވާފައެވެ.
