ދައުލަތުގެ ވިޔަފާރި ކުންފުނި އެސްޓީއޯ އިން ވިއްކާ އަސާސީ ބާވަތްތަކުގެ އަދަދު މި އަހަރުގެ އޮކްޓޫބަރު 15 އިން ފެށިގެން އިތުރު ކޮށްފައިވާތީ އެ ބާވަތްތައް ވިއްކުން ފުޅާކުރުމަށްޓަކައި މާލޭގެ ބާޒާރުމަތީގައި އާ ހޯލްސޭލް ފިހާރައެއް މިއަދު ހުޅުވައިފިއެވެ،
"އެސްޓީއޯ ޕީޕަލްސް ޗޮއިސް ހޯލްސޭލް ސެންޓަ 2″ ހުޅުވީ ކުރީގައި އެސްޓީއޯ ހޯމް އިމްޕްރޫވްމަންޓް ހިންގި އިމާރާތް ނުވަތަ މާލޭ ނޯތު ހާބަރުގެ ގޭޓު ކުރިމަތީގައެވެ.
ބާޒާރުމަތީގައި ހޯލްސޭލް ސެންޓަރެއް ހުޅުވުމުގެ ބޭނުމަކީ އަސާސީ ކާބޯތަކެތީގެ ގޮތުގައި ކަނޑައަޅާފައިވާ 23 ބާވަތުގެ އިތުރުން އެ ކުންފުނިން ވިއްކާ ބްރޭންޑުތަކުގެ އުފެއްދުންތައް ހެޔޮ އަގެއްގައި ހޯލްސޭލްކޮށް ވިޔަފާރިވެރިންނަށާއި އާންމުންނަށް ފޯރުކޮށްދިނުމާއި މާލެ އިން ރަށްރަށަށް މުދާ އުފުލާ ބޯޓުތަކަށް އެ ތަކެތި ފަސޭހައިން ލިބޭނެ މަގު ތަނަވަސް ކޮށްދިނުން ކަމަށާއި، އެސްޓީއޯ އިން މާލޭގައި ހުޅުވި އާ ހޯލްސޭލް ފިހާރަ މެދުވެރިކޮށް، ދަނޑުވެރިން އުފައްދާ ބާވަތްތަށް ހޯލްސޭލްކޮށް ގަތުމުގެ އިންތިޒާމް ވެސް ހަމަޖެހޭނެ ކަމަށް އެ ކުންފުނިން ވިދާޅުވިއެވެ.
އެސްޓީއޯ އިން ވިއްކާ އަސާސީ ކާބޯތަކެތީގެ ލިސްޓަށް 23 ބާވަތެއް އިތުރުކުރީ ރާއްޖޭގެ ބާޒާރުގައި މޭވާ އާއި ތަރުކާރީގެ ބާވަތްތައް އާދަޔާ ހިލާފަށް އަގު ބޮޑުވާ މައްސަލައަށް ދާއިމީ ހައްލެއް ހޯދުމުގެ ގޮތުންނެވެ.
ކާޑުގެ ބާވަތްތަކުގެ އިތުރުން އަސާސީ ކާބޯތަކެތީގެ ލިސްޓަށް މި އަހަރުގެ އޮކްޓޫބަރުމަހުން ފެށިގެން އެސްޓީއޯ އިން އިތުރުކުރީ:
1- ދޮންކެޔޮ
2- އާފަލު
3- އޮރެންޖު
4- ލުނބޯ
5- ޖުމްހޫރީމޭވާ
6- އަނބު
7- ފަޅޯ
8- ކަރާ
9- މިރުސް
10- މޭބިސްކަދުރު
11- ފިޔާ (ރަތް)
12- އިނގުރު
13- ކެރެޓް
14- ބަށި
15- ކައްޓަލަ
16- ލޮނުމެދު
17- އަލުވި
18- ކެބެޖު
19- ބަރަބޯ
20- ބޯވެލި
21- މުގު (ރީނދޫ)
22- ކުކުޅު ބިސް
23- ކާށި
މީގެ އިތުރުން، އަސާސީ ކާބޯތަކެތީގެ ބާވަތްތައް ހޯލްސޭލްކޮށް ވިއްކުން އަދިވެސް ފުޅާކުރުމަށްޓަކައި، ހުޅުމާލޭގައި އެ ކުންފުނީގެ އައުޓްލެޓެއް ވަރަށް އަވަހަށް ހުޅުވަން އެސްޓީއޯ އިން ނިންމާފައިވެއެވެ.
އެ ހުރިހާ ބާވަތްތައް އެ ކުންފުނިން މާލޭގައި ހިންގާ ދެ ފިހާރަ ކަމަށްވާ އެސްޓީއޯ ހޯލްސޭލް ސެންޓަރުންނާއި އެސްޓީއޯ ޕީޕަލްސް ޗޮއިސް މެދުވެރިކޮށް މިހާތަނަށް ވެސް އައީ މެދުނުކެނޑި ވިއްކަމުން ކަމަށް އެސްޓީއޯއިން ވިދާޅުވެއެވެ.
ކިޔުންތެރިންގެ ޚިޔާލުތައް:
ކިހާދުުވަހަުގެކމެއްބާ؟