މާލޭގައި ޒަމާނީ ފެންވަރުގެ އައު މަސްމާރުކޭޓެއް އެޅުމުގެ މަސައްކަތް ޖަޕާން ސަރުކާރުގެ ހިލޭ އެހީގެ ދަށުން ކުރިއަށް ގެންދިއުމަށް ހަމަޖެހިފައިވާކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ރައީސް މިހެން ވިދާޅުވީ ހެންވޭރުގެ ރައްޔިތުންނާ ބައްދަލުކުރައްވާ ދެއްކެވި ވާހަކަފުޅުގައެވެ. މި މަޝްރޫޢަކީ ރައީސް މުޢިއްޒު މާލޭގެ މޭޔަރަކަށް ހުންނެވި އިރު ފެށި ނަމަވެސް އެކި ސަބަބުތަކާ ހުރެ މަސައްކަތް ހުއްޓިފައިވާ މަޝްރޫޢެކެވެ.
ރައީސް ޑރ. މުޢިއްޒު ވިދާޅުވި ގޮތުގައި، މި މަސައްކަތް ކުރިއަށް ގެންދިޔުމަށް ކުރެވުނު މަސައްކަތްތަކުގެ ތެރެއިން މިހާރު ޖަޕާން ސަރުކާރުން ވަނީ އެހީތެރިކަން ފޯރުކޮށްދޭން އެއްބަސްވެފައެވެ. އެގޮތުން، މި މަޝްރޫޢު ޖަޕާން ސަރުކާރުގެ ހިލޭ އެހީގައި ހިންގާ މަޝްރޫޢެއްގެ ގޮތުގައި ކަނޑައެޅުމަށްޓަކައި އެ ބޭފުޅުންނާ އެކުގައި ވެސް ވާހަކަދެއްކުމުގެ މަސައްކަތްތަކެއް ފެށިފައިވާކަމަށް ރައީސް ވިދާޅުވިއެވެ. އަދި މި މަސައްކަތް ފެށުމަށްޓަކައި ޖަޕާނުގެ ފަންނީ ޓީމެއް ވަރަށް އަވަހަށް ރާއްޖެ އަންނާނެކަމަށް ވެސް އެމަނިކުފާނު ހާމަކުރެއްވިއެވެ.
އައު މާރުކޭޓު ތަރައްޤީކުރާނީ ޒަމާނީ ފެންވަރުގެ މަސްމާރުކޭޓަކާއި ތަރުކާރީ މާރުކޭޓު ހިމެނޭ "މިކްސްޑް ޔޫސް މާކެޓެއް" ހަދައި ޒަމާނީ އިމާރާތެއްގެ ގޮތުގައިކަމަށް ރައީސް ވިދާޅުވިއެވެ. އަދި މި މަޝްރޫޢު ކުރިއަށް ގެންދިއުމަށް ހަމަޖެހިފައިވަނީ ކުރިން ޕްލޭންކޮށްފައި އޮތް ގޮތަށް، މިހާރު ލޯކަލް މާރުކޭޓު ހުރި ބިމުގައިކަމަށް ވެސް ރައީސް ވިދާޅުވިއެވެ. ރައީސް އިޝާރާތްކުރެއްވީ އެއީ ރައީސް މައުމޫން ވެރިކަމުގައި އެތަން ހިއްކި އިރުގައިވެސް އެކަން ކުރަން ރާވާފައި އޮތް "އޮރިޖިނަލް ޕްލޭން" ކަމަށެވެ.
މާލޭގެ މާރުކޭޓު ޚިދުމަތް އެއް ފުރާޅެއްގެ ދަށަށް ބަދަލުކުރުމަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތަސައްވުރެކެވެ. މި މަޝްރޫޢުގެ ދަށުން އައު މަސްމާރުކޭޓު ތަރައްޤީކުރަނީ 7 ފަންގިފިލާއަށެވެ. މީގެ އިތުރުން، މަސްމާރުކޭޓު މިހާރު ހުރި ތަނުގައި މަސްވެރިކަމުގެ ސިނާއަތުގައި އުޅޭ ކުންފުނިތަކާއި ޖަމްޢިއްޔާތަކަށް ބޭނުންވާ އޮފީސް ޖާގަ ދެވޭނެ ގޮތަށް އިމާރާތެއް އަޅަންވެސް ރާވަމުންދާކަމަށް ރައީސް ވިދާޅުވިއެވެ.
މަސް މާރުކޭޓާއި ލޯކަލް މާރުކޭޓު ތަރައްޤީކުރުމަށްޓަކައި، މިހާރުގެ ލޯކަލް މާރުކޭޓާއި ދަތުރުވެރިންގެ މާރުކޭޓު އަދި ވަޅޯމަސް މާރުކޭޓު ވަގުތީގޮތުން އެހެން ސަރަޙައްދަކަށް ބަދަލުކުރުމަށް ވަގުތީ ބިންތަކެއްވެސް ވަނީ ހަމަޖައްސާފައެވެ. ސަރުކާރުން ބުނެފައިވަނީ ވަގުތީ މާރުކޭޓުތަކުގެ މަސައްކަތް ނިމުމާއެކު ދާއިމީ މާރުކޭޓު ތަރައްޤީކުރުމުގެ މަސައްކަތް ފެށޭނެކަމަށާއި، އައު މަސްމާރުކޭޓާއެކު މިހާރު ކުރިމަތިވެފައިވާ ޖާގައިގެ ދަތިކަން ހައްލުވެގެންދާނެކަމަށެވެ.
