ޤައުމީ އެއަރލައިން މޯލްޑިވިއަނުން ވަނީ ޢުމްރާގެ އަޅުކަމަށްދާ މީހުންނަށް ޚާއްސަކޮށް އިތުރު ދަތުރުތަކެއް ބޭއްވުމަށް ނިންމާފައެވެ. މޯލްޑިވިއަނުން ޢުމްރާގެ ދަތުރުތައް ފުރަތަމަ ފަށާފައިވަނީ މި އަހަރުގެ ޖުލައި މަހުގައެވެ. މި ދަތުރުތަކަށް ބޭނުންކުރަނީ ކުންފުންޏަށް ގެނައި ވައިޑް-ބޮޑީ މަތިންދާބޯޓެވެ.
މޯލްޑިވިއަނުން ވިދާޅުވީ ކުރިއަށް އޮތް ސްކޫލް ބަންދާ ދިމާކޮށް، ޢުމްރާއަށް ދިއުމަށް ރާވާފައިވާ ދިވެހިންނަށް ފަސޭހަވާނެ ގޮތަށް މާލެއިން ޖިއްދާއަށް ސީދާ ދަތުރުތަކެއް ބޭއްވުމަށް ނިންމާފައިވާކަމަށެވެ.
މާލެއިން ޖިއްދާއަށް ދިއުމަށް 3 ފްލައިޓެއް އޮޕަރޭޓްކުރާނެއެވެ. މި ދަތުރުތައް އޮންނާނީ މިމަހުގެ 27 އަދި 28 ވަނަ ދުވަހުއެވެ. އަދި ޖިއްދާއިން މާލެއަށް އެނބުރި އައުމަށް 3 ފްލައިޓް އޮޕަރޭޓްކުރާނެއިރު، އެ ދަތުރުތައް އޮންނާނީ އަންނަ އަހަރުގެ ޖެނުއަރީ މަހުގެ 10، 11 އަދި 12 ވަނަ ދުވަހުއެވެ.
މި ޝެޑިއުލްގެ ސަބަބުން، ޢުމްރާގެ ކަންކަން ފުރިހަމަކުރުމަށްޓަކައި ޖިއްދާގައި ގިނަ ވަގުތު ހޭދަކުރުމުގެ ފުރުޞަތު ދަތުރުވެރިންނަށް ލިބިގެންދާނެކަމަށް މޯލްޑިވިއަނުން ވިދާޅުވިއެވެ. އަދި ސްކޫލް ބަންދާ ދިމާކޮށް މި ދަތުރުތައް ހަމަޖައްސާފައިވުމުން، އާއިލާތަކަށް އެއްކޮށް ދަތުރުކުރުން އިތުރަށް ފަސޭހަވާނެއެވެ.
ޢުމްރާއަށް ދިޔުމަށް ކުރާ މި ޚާއްސަ ދަތުރުތަކުގެ ޓިކެޓުގެ އަގު ފެށޭނީ 750 އެމެރިކާ ޑޮލަރުންނެވެ. މި އަގުގެ ތެރޭގައި 45 ކިލޯގެ ބެގޭޖް އެލަވަންސެއް ހިމެނޭއިރު، މިކަމުގެ ސަބަބުން ޒަމްޒަމް ފެންފަދަ ހުއްދަ ތަކެއްޗާއެކު އެނބުރި އަންނަ ފަރާތްތަކަށްވެސް ފަސޭހަތަކެއް ލިބިގެންދާނެކަމަށް މޯލްޑިވިއަނުން ބުނެއެވެ.
ޢުމްރާއަށް ޚާއްސަ ދަތުރުތަކުގެ އިތުރުން، މޯލްޑިވިއަނުން ވަނީ މި އަހަރު ރާއްޖެއިން ޙައްޖަށް ދިޔަ ޙައްޖާޖީން ގެންދިއުމަށް ސަޢޫދީއަށް 2 ދަތުރުކޮށްފައެވެ. މީގެ އިތުރުން މޯލްޑިވިއަނުން ދަނީ އަހަރުގެ ބޮޑު ޗުއްޓީއާ ދިމާކޮށް ދުނިޔޭގެ އެކި މަންޒިލްތަކަށްވެސް ދަތުރުތައް ބާއްވަމުންނެވެ.
