އިނގިރޭސިވިލާތުގައި މަގުމަތީގައި ދިގު މުއްދަތަކަށް ނިދާ މީހުންގެ އަދަދު ދެބައިކުޅަ އެއްބަޔަށް މަދުކުރުމަށް އެ ޤައުމުގެ ސަރުކާރުން ވައުދުވެއްޖެއެވެ.
އިނގިރޭސިވިލާތުގެ ސަރުކާރުން ވަނީ އަންނަ ފަސް އަހަރު ތެރޭގައި މަގުމަތީގައި ދިގު މުއްދަތަކަށް ނިދާ މީހުންގެ އަދަދު ދެބައިކުޅަ އެއްބަޔަށް މަދުކުރުމަށް ވައުދުވެފައެވެ. މިކަމަށްޓަކައި އިނގިރޭސި ސަރުކާރުން ވަނީ "ނޭޝަނަލް ޕްލޭން” ގެ ނަމުގައި އާ ޕްލޭނެއް ތައާރަފްކޮށްފައެވެ.
މި ޕްލޭންގެ ދަށުން، ޢާއިލާތަކަށް ބޭނުންކުރެވޭ ބެޑް-އެންޑް-ބްރޭކްފާސްޓްތައް ޤާނޫނާ ޚިލާފަށް ބޭނުންކުރުން ހުއްޓާލައި، އިތުރު ޢާއިލާތައް ގެދޮރު ނެތް ހާލަތަކަށް ވެއްޓުން ހުއްޓުވުމަށް ވެސް ސަރުކާރުން ވަނީ ވައުދުވެފައެވެ. ސަރުކާރުން ބުނާ ގޮތުގައި މިއީ ގެދޮރު ނެތް މީހުންގެ މައްސަލަ ހައްލުކުރުމަށް އަޅާ މުހިއްމު ފިޔަވަޅެކެވެ.
ނަމަވެސް، ހައުސިންގ ޗެރިޓީތަކުން ބުނާ ގޮތުގައި މި ޕްލޭން އެކަށީގެންވާ ވަރަށް ވަރުގަދައެއް ނޫނެވެ. އެމީހުން ފާހަގަކުރާ ގޮތުގައި، އިނގިރޭސިވިލާތުގައި ގާތްގަނޑަކަށް 400،000 މީހުން މި ކްރިސްމަސް ޗުއްޓީ ގެދޮރު ނެތި ހޭދަކުރާނެ ކަމަށް ލަފާކުރެވެއެވެ. ޗެރިޓީތަކުގެ ފަރާތުން ބުނެފައިވަނީ މިހާ ބޮޑު މައްސަލައަކަށް ހައްލެއް ހޯދުމަށް މި ޕްލޭންގެ ފުރިހަމަ ނުވާ ކަމަށެވެ.
