ރާއްޖޭގައި ގަވާއިދާ ހިލާފަށް ހިންގާ 74 ވިޔަފާރިއެއް ސަރުކާރުން ބަންދުކޮށްފިއެވެ.
އިކޮނޮމިކް މިނިސްޓްރީން އެކްސްގައި ކުރި ޕޯސްޓެއްގައި ވިދާޅުވީ، ގަވާއިދާ ހިލާފަށް ހިންގާ ވިޔަފާރި ފާސްކުރުމަށް ހިންގި ހަރަކާތުގައި މިދިޔަ މަހު 29 އިން ފެށިގެން އިއްޔެގެ ނިޔަލަށް 74 ވިޔަފާރިއެއް ބަންދުކޮށްފައިވާ ކަމަށެވެ.
ގަވާއިދާ ހިލާފަށް ވިޔަފާރިކުރާ ކަމަށް ބުނެ 252 ޝަކުވާއެއް އެ މުއްދަތުގައި ލިބިފައިވާ ކަަމަށާއި، އެ ޝަކުވާތަކާ ގުޅިގެން މިނިސްޓްރީން 98 ވިޔަފާރިއެއް ބަލައި ފާސްކޮށްފައިވާކަމަށް ވިދާޅުވެއެވެ. އެހެންކަމުން، އޭގެ ތެރެއިން 37 ވިޔަފާރިއެއް ބަންދުކުރި އިރު، މިނިސްޓްރީއާ ގުޅޭ ގާނޫނުތަކާ ހިލާފުވެގެން 25 ވިޔަފާރިއެއް އަދި އެހެނިހެން ގާނޫނުތަކާ ހިލާފުވެގެން ބަންދުކުރި 12 ވިޔަފާރިއަކާ އެކު ޖުމްލަ 74 ވިޔަފާރިއެއް ބަންދުކޮށްފައިވެއެވެ.
ގަވާއިދާ ޚިލާފަށް ހިންގާ ވިޔަފާރިތައް ބަލައިފާސްކުރުމުގެ އެންމެ ފަހުގެ އަދާހަމަ. #EconomicDevelopment pic.twitter.com/WddZyPhfTX
— Ministry of Economic Development and Trade (@MoEDmv) December 16, 2025
އެ މުއްދަތުގައި ބަންދުކުރި ވިޔަފާރިތަކުގެ ތެރެއިން އަލުން ހުޅުވަން ހުއްދަ ދިނީ އެންމެ 8 ވިޔަފާރިއަކަށް ކަމަށް ވިދާޅުވެފައިވެއެވެ. ނަމަވެސް، ވަކިވަކި ވިޔަފާރިތަކުގެ ތަފުސީލެއް މިނިސްޓްރީން ހާމައެއް ނުކުރައްވައެވެ.
އެ މިނިސްޓްރީން މިފަދަ ފިޔަވަޅެއް އަޅުއްވާފައިވާއިރު، ރާއްޖޭގައި އުޅޭ ބިދޭސީން ގަވާއިދާ ހިލާފަށް ކުރާ ވިޔަފާރިތައް ހުއްޓުވުމުގެ މަސައްކަތް ފުލުހުންނާއި އިމިގްރޭޝަން އަދި ކަމާ ބެހޭ އެހެން އިދާރާތައް ގުޅިގެން އަންނަނީ ކުރަމުންނެވެ.
