ވެނެޒުއޭލާގެ ރައީސް ނިކޮލަސް މަޑޫރޯ އާއި އެމަނިކުފާނުގެ އަނބިކަނބަލުން ކަރަކަސްއިން ހައްޔަރުކުރުމަށް އެމެރިކާގެ އަސްކަރިއްޔާއިން ހިންގި ހާއްސަ އޮޕަރޭޝަނެއްގައި ކިއުބާގެ 32 ރައްޔިތަކު މަރުވެފައިވާކަން ކިއުބާ ސަރުކާރުން އިއުލާންކޮށްފިއެވެ. މި ހާދިސާއާ ގުޅިގެން ކިއުބާގައި ވަނީ ރަސްމީކޮށް ހިތާމަ ފާޅުކުރުން އިއުލާންކޮށްފައެވެ.
ކިއުބާގެ ދައުލަތުގެ މީޑިއާ، ޕްރެންސާ ލެޓީނާއިން ރިޕޯޓުކޮށްފައިވާ ގޮތުގައި، މަރުވި ކިއުބާގެ "ހަނގުރާމަވެރިން" މަރުވީ ވެނެޒުއޭލާ ސަރުކާރުގެ އެދުމުގެ މަތިން އެ ގައުމުގެ އަސްކަރިއްޔާގެ ފަރާތުން ހާއްސަ މިޝަންތަކެއް ފުރިހަމަކުރަމުން ދަނިކޮށެވެ. އެ އެޖެންސީން ބުނި ގޮތުގައި، ކިއުބާގެ ސިފައިން މަރުވީ އެމެރިކާގެ ހަމަލާތަކަށް ވަރުގަދައަށް ރައްދު ދެމުން ދަނިކޮށް، ސީދާ ކުރިމަތިލުންތަކުގައި ނުވަތަ ދިން ބޮމުގެ ހަމަލާތަކުގެ ސަބަބުންނެވެ.
މި ހާދިސާގައި މަރުވި މީހުންގެ ހަނދާނުގައި ޖެނުއަރީ މަހުގެ 5 އަދި 6 ވަނަ ދުވަހަކީ ރަސްމީކޮށް ހިތާމަ ފާޅުކުރާ ދެ ދުވަސް ކަމުގައި ކިއުބާ ސަރުކާރުން ވަނީ ކަނޑައަޅާފައެވެ. އަދި މަރުވި މީހުންގެ ޖަނާޒާގެ ކަންތައްތައް ކުރިއަށްދާނެ ގޮތް ފަހުން އިއުލާން ކުރާނެ ކަމަށް ހަވާނާއިން ބުނެފައިވެއެވެ.
ކިއުބާއަކީ ވެނެޒުއޭލާ ސަރުކާރުގެ ގާތް އެކުވެރިއެކެވެ. ލެޓިން އެމެރިކާގެ އެ ގައުމުގައި ހިންގާ އެކި އޮޕަރޭޝަންތަކަށް އެހީތެރިވުމަށް ކިއުބާއިން އަސްކަރީ އަދި ފުލުހުންގެ ބާރުތައް ފޮނުވަމުންދާތާ އަހަރުތަކެއް ވެއްޖެއެވެ.
އެމެރިކާގެ އޮޕަރޭޝަނަށްފަހު، ރައީސް މަޑޫރޯ އާއި އެމަނިކުފާނުގެ އަނބިކަނބަލުން މިހާރު ވަނީ ނިއުޔޯކަށް ގެންގޮސްފައެވެ. އެމަނިކުފާނުގެ މައްޗަށް އުފުލާފައިވަނީ މަސްތުވާތަކެއްޗާ ގުޅުންހުރި ދައުވާތަކެކެވެ. އުމުރުން 63 އަހަރުގެ މަޑޫރޯ ހޯމަ ދުވަހު ކޯޓަށް ހާޒިރުކުރުމަށް ވަނީ ހަމަޖެހިފައެވެ. ނަމަވެސް، މީގެ ކުރިން މަޑޫރޯ ވަނީ އެއްވެސް ޖިނާއީ ކަމެއްގައި ބައިވެރިވެފައި ނުވާނެ ކަމަށް ވިދާޅުވެ، އެ ތުހުމަތުތައް ދޮގުކުރައްވާފައެވެ.
