މިފްކޯގެ ހިންގުން ހަރުދަނާކޮށް ޚަރަދުތައް ކުޑަކުރުމަށް ކުރަމުންދާ މަސައްކަތްތަކުގެ ދަށުން، މިއަހަރު ނިމޭއިރު ސަރުކާރުން އެ ކުންފުންޏަށް ދޭ ސަބްސިޑީ %50 އަށް ކުޑަކުރުމަށް އަމާޒު ހިފާފައިވާ ކަމަށް އެ ކުންފުނިން ހާމަކޮށްފިއެވެ. މިއީ ސަރުކާރު ހިއްސާވާ ކުންފުނިތައް ހަމަމަގަށް އެޅުވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގެންގުޅުއްވާ ސިޔާސަތުގެ ދަށުން ކުރެވެމުންދާ މަސައްކަތެކެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުން މިފްކޯގެ ސީއީއޯ ފަރުޙަތު ޝަހީރު ވިދާޅުވި ގޮތުގައި، ދައުލަތުން ދޭ ސަބްސިޑީއަކީ ސަރުކާރުން ކަނޑައަޅާ އަގުގައި މަސް ގަތުމަށް ދޭ އެހީއެކެވެ. ކުންފުނީގެ އެހެނިހެން ޚަރަދުތައް މިހާރުވެސް ހަމަޖައްސަނީ އަމިއްލަ އާމްދަނީންނެވެ. ވޭތުވެދިޔަ އަހަރުގެ ބައެއް ކުއާޓަރުތަކުގައި މަސްވެރިކަން ދަށްވުމުގެ ސަބަބުން ގޮންޖެހުންތަކެއް ހުރި ނަމަވެސް، މުޅި އަހަރުގެ ހިސާބުތަކަށް ބަލާއިރު ކުންފުނީގެ މާލީ ހާލަތު ރަނގަޅުވަމުންދާ ކަމުގެ ނިޝާންތައް ފެންނަން ހުރިކަން އޭނާ ފާހަގަކުރެއްވިއެވެ.
ކުންފުނީގެ ސްޓްރެޓެޖިކް ކޮންސަލްޓެންޓް އިބްރާހީމް އާޠިފް ޝަކޫރު ވިދާޅުވީ، ސަބްސިޑީ ކުޑަކުރުމާ ގުޅޭގޮތުން ސަރުކާރާއެކު އެއްބަސްވުމަކަށް އާދެވިފައިވާ ކަމަށެވެ. އެގޮތުން މަސް ކިލޯއަކުން 1 ރުފިޔާ މަދުކޮށް، މިއަހަރު ނިމޭއިރު ސަބްސިޑީ ދެބައިކުޅަ އެއްބަޔަށް ކުޑަކުރުމަށް ވަނީ ރޭވިފައެވެ.
މީގެ އިތުރުން، މަސްވެރިންނަށް 48 ގަޑިއިރު ތެރޭގައި ފައިސާ ދޫކުރުމުގެ ވަޢުދުގެ ދަށުން މިހާތަނަށް 973 މިލިއަނަށްވުރެ ގިނަ ރުފިޔާ ދޫކޮށްފައިވާ ކަމަށް މިފްކޯއިން ބުނެއެވެ. އަދި ކުންފުނީގެ އުފެއްދުންތެރިކަން އިތުރުކުރުމަށްޓަކައި ފެލިވަރުގެ ކޯލްޑް ސްޓޯރޭޖް ތަރައްޤީކުރުމުގެ މަސައްކަތް މިއަހަރުގެ މެދުތެރޭގައި ނިމޭނެ ކަމަށްވެސް އެ ކުންފުނިން މަޢުލޫމާތުދެއެވެ.
