އެމެރިކާގެ 'އުދުވާނާ' ދެކޮޅަށް ވެނެޒުއޭލާއިން ކުރިމަތިލާނީ ޑިޕްލޮމެސީގެ ޒަރީއާއިން ކަމަށްވެނެޒުއޭލާގެ އިންތިގާލީ ރައީސާ ޑެލްސީ ރޮޑްރިގޭޒް ވިދާޅުވެއްޖެއެވެ.
ވެނެޒުއޭލާގެ އިންތިގާލީ ރައީސާ ޑެލްސީ ރޮޑްރިގޭޒް ހުކުރު ދުވަހު ވިދާޅުވީ، އެމެރިކާގެ "އުދުވާނާ" ދެކޮޅަށް އެ ގައުމުން ކުރިމަތިލާނީ ޑިޕްލޮމެސީގެ މަގުން ކަމަށެވެ. މީގެ އިތުރުން، ކުރީގެ ރައީސް ނިކޮލަސް މަދޫރޯ އެމެރިކާއިން ހައްޔަރުކުރުމާ ގުޅިގެން ކެނޑިފައިވާ ގުޅުންތައް އަލުން ގާއިމުކުރުމަށް ސަރުކާރުން ފިޔަވަޅުތަކެއް އަޅަމުންދާކަން ވެސް ވަނީ އިއުލާނުކޮށްފައެވެ.
ބްރެޒިލް، ކޮލަމްބިއާ އަދި ސްޕެއިންގެ ލީޑަރުންނާއެކު ބޭއްވި އޮންލައިން ބައްދަލުވުމެއްގައި ރޮޑްރިގޭޒް ވަނީ، ޖެނުއަރީ 3 ވަނަ ދުވަހު އެމެރިކާގެ ސިފައިން ނިކޮލަސް މަދޫރޯ ހައްޔަރުކޮށްގެން ގެންދިޔަ ހާދިސާއަށް ވަރަށް ބޮޑަށް ފާޑުވިދާޅުވެފައެވެ. އޭނާ އެ ހާދިސާ ސިފަކުރެއްވީ "ސީރިއަސް، ޖިނާއީ، ޣައިރު ގާނޫނީ އަދި އުސޫލުން ބޭރުން ދިން ހަމަލާއެއް" ގެ ގޮތުގައެވެ.
ރޮޑްރިގޭޒް ނެރުއްވި ބަޔާނެއްގައި ވިދާޅުވީ، "މި އުދުވާނާ ދެކޮޅަށް ވެނެޒުއޭލާއިން ކުރިމަތިލާނީ ޑިޕްލޮމެސީގެ ޒަރީއާއިން ކަމަށް އަޅުގަނޑު ތަކުރާރުކޮށް ދަންނަވަން،" ކަމަށެވެ. މި ބައްދަލުވުމުގައި ބައިނަލްއަގުވާމީ މައިދާނުގައި ވެނެޒުއޭލާގެ މަސްލަހަތު ހިމާޔަތްކުރުމާ ގުޅޭގޮތުން ވެސް މަޝްވަރާ ކުރެވުނެވެ.
މިދިޔަ މަހުގެ ކުރީކޮޅު މަދޫރޯ ހައްޔަރުކުރުމާ ގުޅިގެން ވެނެޒުއޭލާގެ ސިޔާސީ މަސްރަހަށް ބޮޑެތި ބަދަލުތަކެއް އައިސްފައިވާއިރު، އިންތިގާލީ ސަރުކާރުން މިހާރު މަސައްކަތް ކުރަމުންދަނީ އެމެރިކާއާއެކު އޮތް ގުޅުންތައް އަލުން އާރާސްތުކުރުމަށެވެ. ނަމަވެސް، އެމެރިކާގެ އަމަލުތަކަކީ ބައިނަލްއަގުވާމީ ގާނޫނުތަކާ ހިލާފު ކަންތައްތަކެއްގެ ގޮތުގައި ވެނެޒުއޭލާއިން ދަނީ ވަކާލާތު ކުރަމުންނެވެ.
