ދެމެހެއްޓެނިވި އިޤްތިޞާދީ ކުރިއެރުމެއް ހޯދުމަށްޓަކައި ވިޔަފާރިތަކުގެ އަޑުއެހުމަށް ސިލްސިލާ ބައްދަލުވުންތަކެއް ބޭއްވުމަކީ މުހިންމު ކަމެއް ކަމަށް އިޤްތިޞާދީ ތަރައްޤީއާއި ވިޔަފާރިއާ ބެހޭ ވަޒީރު މުޙައްމަދު ސަޢީދު ވިދާޅުވެއްޖެއެވެ. އޮތެންޓިކް މޯލްޑިވްސްގެ 6 ވަނަ އަހަރީ ޙަފްލާގައި ވާހަކަފުޅު ދައްކަވަމުން ވަޒީރު ފާހަގަކުރެއްވީ، ވިޔަފާރިތަކަށް ދެވޭ ޚިދުމަތްތައް ހަރުދަނާ ކުރެވޭނީ ސީދާ ވިޔަފާރިވެރިންނާ ވާހަކަދެކެވި، އެފަރާތްތަކަށް ކުރިމަތިވާ ގޮންޖެހުންތައް ދެނެގަނެވިގެން ކަމަށެވެ.
ކުދި ވިޔަފާރިތަކަށް ލުއިތަކެއް ދިނުމަށް ރައީސުލްޖުމްހޫރިއްޔާ ނިންމަވާފައިވާ ނިންމެވުމާ އެއްގޮތަށް، 2026 އަދި 2027 ވަނަ އަހަރު އެފަދަ ވިޔަފާރިތަކާއެކު ގަވާއިދުން ބައްދަލުވުންތައް ބާއްވާނެ ކަމަށް ވަޒީރު ވިދާޅުވިއެވެ. މީގެ އިތުރުން، ވިޔަފާރިތަކަށް ބޭނުންވާ ޑޮލަރު ހޯދުމުގައި ހުރި ދަތިތަކަށް ހައްލެއް ހޯދައިދިނުމުގެ ގޮތުން، އޮތެންޓިކް މޯލްޑިވްސްގެ ސަޕްލަޔަރުންނަށް ފައިސާ ދޫކުރާއިރު އޭގެ ތެރެއިން ވަކި މިންވަރެއް ޑޮލަރުން ދޫކުރަން ފަށާފައިވާކަންވެސް ފާހަގަކުރެއްވިއެވެ.
އޮތެންޓިކް މޯލްޑިވްސްއަށް 6 އަހަރު ފުރުނުއިރު، މި މަރުކާއަކީ ދިވެހި އުފެއްދުންތެރިންނާއި ކުދި ވިޔަފާރިތައް ބައިނަލްއަޤްވާމީ ބާޒާރާ ގުޅުވައިދޭ އިތުބާރު ހުރި މަންސައަކަށް ވަނީ ވެފައެވެ. އެގޮތުން 2025 ވަނަ އަހަރު ހާސިލްކުރި އެންމެ ބޮޑު އެއް ކާމިޔާބީއަކީ ދުނިޔޭގެ މަޝްހޫރު އީކޮމާސް ޕްލެޓްފޯމް 'އަލީބާބާ' މެދުވެރިކޮށް ދިވެހި އުފެއްދުންތައް ވިއްކުމުގެ ފުރުޞަތު ފަހިވެގެން ދިއުމެވެ.
ތަފާސްހިސާބުތަކަށް ބަލާއިރު، އޮތެންޓިކް މޯލްޑިވްސްގައި މިހާރު 407 ވިޔަފާރިއަކުން ރަޖިސްޓަރީވެފައިވާއިރު، ސަޕްލަޔަރުންނަށް ދޫކުރި ފައިސާގެ މިންވަރު 2024 ވަނަ އަހަރުގެ 26.4 މިލިއަނުން 2025 ވަނަ އަހަރު 31.1 މިލިއަން ރުފިޔާއަށް ވަނީ އިތުރުވެފައެވެ. ބިޒްނަސް ސެންޓަރ ކޯޕަރޭޝަން (ބީސީސީ) އިން ބުނާގޮތުގައި 2026 ވަނަ އަހަރަކީ ދިވެހި އުފެއްދުންތެރިކަމަށް އުންމީދީ އަހަރަކަށް ވާނެ ކަމަށާއި، މި މަރުކާ ރާއްޖެއިން ބޭރުގެ އިތުރު ޤައުމުތަކަށް ފުޅާކުރުމުގެ މަސައްކަތް ކުރިއަށްދާނެއެވެ.
