ބ. ތުޅާދޫ އާއި ތ. ވިލުފުށީގައި ސަރުކާރުން އިމާރާތްކޮށްފައިވާ ހައުސިންގ ޔުނިޓްތަކަށް ކުރިމަތިލުމުގެ ފުރުޞަތު ހުޅުވާލައިފިއެވެ. މި ޔުނިޓްތަކަށް އެދި ފޯމު ހުށަހަޅަންޖެހެނީ "ހިޔާވަހި" ޕޯޓަލް މެދުވެރިކޮށް، މިއަދުން ފެށިގެން ތިން މަސް ދުވަހުގެ މުއްދަތަށެވެ. ފޯމު ހުށަހެޅުމުގެ އެންމެ ފަހު ތާރީޚަކީ އޭޕްރިލް މަހުގެ 11 ވަނަ ދުވަހެވެ.
މި ހައުސިންގ ޔުނިޓްތަކަށް ކުރިމަތިލެވޭނީ އެ ރަށްރަށުގެ ރަށްވެހިންނަށާއި، އެ ރަށްރަށުގައި މެދުނުކެނޑި ދިރިއުޅޭތާ 10 އަހަރުވެފައިވާ ފަރާތްތަކަށެވެ. ކުރިމަތިލާ ފަރާތްތަކަކީ އުމުރުން 18 އަހަރުވެފައިވާ، އަދި އަމިއްލަ ނަމުގައި 600 އަކަފޫޓަށްވުރެ ބޮޑު ބިމެއް ނެތް މީހަކަށް ވާންޖެހެއެވެ. މީގެ އިތުރުން މަހެއްގެ އާމްދަނީ 60,000 ރުފިޔާއަށްވުރެ އިތުރުވެގެން ނުވާނެއެވެ.
ޕޮއިންޓް ދިނުމުގައި ބަލާނީ އާއިލާގެ ކުޑަބޮޑުމިނަށާއި ދިރިއުޅުމުގެ ހާލަތަށެވެ. އައު އުސޫލުގެ ދަށުން ދަރިން ނުލިބޭ މީހުންނަށްވެސް ޕޮއިންޓް ދޭނެ މިންގަނޑެއް ވަނީ ކަނޑައަޅާފައެވެ. މިފަދަ ފަރާތްތަކުން ސިއްހީ އިދާރާއަކުން ދޫކޮށްފައިވާ ރަސްމީ ލިޔެކިޔުންތައް ހުށަހަޅަންޖެހެއެވެ.
މި ހައުސިންގ ޔުނިޓްތަކަކީ 3 ކޮޓަރީގެ ރޯހައުސްތަކެކެވެ. ކޮންމެ ޔުނިޓެއް އިމާރާތްކޮށްފައިވަނީ 2,002 އަކަފޫޓުގެ ބިމެއްގައި 1,204 އަކަފޫޓުގެ ސަރަހައްދެއްގައެވެ. މި ތަންތަން ހަވާލުކުރާނީ ފިނިޝިންގ މަސައްކަތްތައް މުޅިން ނިންމުމަށްފަހުގައެވެ. މިހާރު ކުރިއަށްދަނީ މި ޔުނިޓްތަކަށް ބޭނުންވާ ޔުޓިލިޓީ ހިދުމަތްތައް ގުޅުމުގެ މަސައްކަތެވެ.
