ސައޫދީ އަރަބިއްޔާގެ ޖިއްދާގައި ކުޅުނު ފޯރިގަދަ ސްޕެނިޝް ސުޕަކަޕް ފައިނަލްގައި ފަސް ލަނޑު ފެނިގެންދިޔަ މެޗަކުން 3:2 އިން ރެއާލް މެޑްރިޑް ބަލިކޮށް، ބާސެލޯނާއިން ޖެހިޖެހިގެން ދެވަނަ ފަހަރަށް ސްޕެނިޝް ސުޕަ ކަޕް ކާމިޔާބުކޮށްފިއެވެ.
މިއީ ހަންސީ ފްލިކްގެ ޓީމުން މި މުބާރާތް ކާމިޔާބުކުރި 16 ވަނަ ފަހަރެވެ. މިދިޔަ އަހަރުގެ ފައިނަލްގައި ވެސް ބާސެލޯނާއިން ވަނީ ލޮސް ބްލާންކޯސް ބަލިކޮށްފައެވެ.
ފުރަތަމަ ހާފުގެ ފޯރިގަދަ ނިމުމަކަށްފަހު، މެޗުގެ 73 ވަނަ މިނެޓުގައި ބްރެޒިލްގެ ފޯވާޑް ރަފީނިއާ ފޮނުވާލި ހިތްގައިމު ހަމަލާއަކީ މެޗުން މޮޅުވި ލަނޑެވެ.
މެޗުގެ 36 ވަނަ މިނެޓުގައި ރަފީނިއާ ގޯލުގެ ތިރީ ކަނަށް ބޯޅަ ފޮނުވާލައިގެން ލީޑު ނަގާފައިވަނިކޮށް، ފުރަތަމަ ހާފުގެ އިތުރު ވަގުތުގެ ތެރޭގައި ފެނިގެންދިޔަ އަވަސް ތިން ލަނޑާއެކު، ހާފު ނިމުނުއިރު ދެ ޓީމު އޮތީ އެއްވަރުވެފައެވެ.
އިތުރު ވަގުތުގެ ދެވަނަ މިނެޓުގައި ވިނީޝިއަސް ޖޫނިއާ ވަނީ ޖޫލްސް ކޫންޑޭގެ ފައިދަށުން ބޯޅަ ހިންގާލުމަށްފަހު ގޯލުގެ ދުރު ކަނަށް ފޮނުވާލައިގެން ނަތީޖާ އެއްވަރުކޮށްފައެވެ. މިއީ 2025 ވަނަ އަހަރުގެ އޮކްޓޯބަރު 4 ގެ ފަހުން، ވޭތުވެދިޔަ 17 މެޗުގައި އޭނާ ރެއާލްއަށް ޖަހައިދިން ފުރަތަމަ ލަނޑެވެ.
އޭގެ ފަހުން 49 ވަނަ މިނެޓުގައި ރޮބަޓް ލެވަންޑޯސްކީ ވަނީ ގޯލުގެ ދަނޑީގައި ޖައްސާފައި ބޯޅަ ގޯލަށް ވައްދާލައިގެން އަލުން ބާސާއަށް ލީޑު ހޯދައިދީފައެވެ.
ނަމަވެސް، ތިން މިނެޓު ފަހުން ގޮންޒާލޯ ގާސިއާ ވަނީ ނަތީޖާ އެއްވަރުކޮށްފައެވެ. މިއީ ޑީން ހައިސެން ބޮލުން ޖެހި ބޯޅައެއް ގޯލުގެ ހުރަސް ދަނޑީގައި ޖެހި، އޭރިއާ ތެރޭގައި އުފެދުނު ހަލަބޮލިކަމެއްގެ ތެރެއިން އޭނާ ކާމިޔާބުކުރި ލަނޑެކެވެ. މި ވަގުތު ބާސާގެ ކޯޗު ފްލިކް ވަނީ އޭގެ ކުރިން ހާފު ނިމުނުކަމުގެ ފުމެންޖެހޭނެ ކަމަށް ބުނެ އިހުތިޖާޖުކޮށްފައެވެ.
ކަކުލުގެ އަނިޔާއަކުން ސަލާމަތްވެ ބަދަލު ކުޅުންތެރިއެއްގެ ގޮތުގައި ކުޅެން އެރި ކީލިއަން އެމްބާޕޭއަށް ކުރި ނުރައްކާތެރި ފައުލަކާ ގުޅިގެން، މެޗުގެ އިތުރު ވަގުތުގެ ތެރޭގައި ފްރެންކީ ޑި ޔޮންގަށް ވަނީ ސީދާ ރަތް ކާޑެއް ދައްކާފައެވެ.
މެޗުގެ ފަހުކޮޅު ދެ ޓީމަށްވެސް ލަނޑު ޖަހާނެ ރަނގަޅު ފުރުސަތުތަކެއް ލިބުނެވެ. މާކަސް ރަޝްފޯޑަށް ލިބުނު ހުސް ފުރުސަތެއްގައި ފޮނުވާލި ބޯޅަ ގޯލާ އަމާޒުނުވިއިރު، އަލްވާރޯ ކަރޭރަސް އަދި ރައުލް އަސެންސިއޯ ފޮނުވާލި ހަމަލާތައް ކީޕަރު ޖޯން ގާސިއާ ވަނީ ދިފާއުކޮށްފައެވެ.
ނަތީޖާ ދަމަހައްޓައިގެން ބާސެލޯނާއިން މެޗު ކާމިޔާބުކުރިއިރު، މިއީ 2011 ވަނަ އަހަރުގެ ފަހުން އެ ޓީމުން ޖެހިޖެހިގެން ދެ ފަހަރު މި ތަށި އުފުލާލި ފުރަތަމަ ފަހަރެވެ.
