މި މަހުގެ 31 ގައި ބޭއްވުމަށް ހަމަޖެހިފައިވާ އަދާލަތު ޕާޓީގެ ރައީސް ހޮވުމުގެ އިންތިހާބުގައި އިލެކްޓްރޯނިކް ވޯޓިން ނުވަތަ އީ-ވޯޓިން ބޭނުންކުރުން ހުއްޓުވައިދިނުމަށް އެދި އެ މަގާމަށް ވާދަކުރައްވާ ކެންޑިޑޭޓް ޑރ. އިކްރާމް އަބްދުއްސައްތާރު އިލެކްޝަންސް ކޮމިޝަނަށް ހުށަހަޅުއްވައިފިއެވެ. އިކްރާމް ތުހުމަތު ކުރައްވާ ގޮތުގައި އޮންލައިންކޮށް ވޯޓުލުން ކުރިއަށް ގެންގޮސްފިނަމަ، ޕާޓީގެ މިހާރުގެ ލީޑަޝިޕުން ވޯޓުގެ ނަތީޖާއަށް ނުފޫޒު ފޯރުވައި އޮޅުވާލުމުގެ ފުރުސަތު ބޮޑެވެ.
އިކްރާމްގެ ސިޓީގައި ފާހަގަކުރައްވާފައިވާ ގޮތުގައި އޭނާއާ ވާދަކުރައްވާ ކެންޑިޑޭޓް ޝައިހު މުހައްމަދު ޝިފާން އާއި އޭނާގެ ރަނިންމޭޓަކީ މިހާރުވެސް ޕާޓީގެ އިސް މަގާމުތަކުގައި ތިއްބެވި ބޭފުޅުން ކަމަށްވާތީ، އޮންލައިން ނިޒާމުގެ ތެރެއިން އިންތިހާބު ގަޑުބަޑުކުރުމުގެ ބިރު އެބައޮތެވެ. އަދި މީގެ ކުރިން ޕާޓީގެ ރައީސް އިމްރާން އަބްދުﷲ އިންތިހާބު ކުރިއިރުވެސް އޮންލައިންކޮށް ވޯޓުލުމުން އިންތިހާބުގެ ސައްހަކަމާ މެދު ސުވާލު އުފެދުނުކަން އޭނާ ފާހަގަކުރެއްވިއެވެ.
މިހާރު ރާއްޖޭގައި ކުއްލި ނުރައްކަލުގެ ހާލަތެއް ނެތްކަން ފާހަގަކުރައްވައި، އިކްރާމް އެދިވަޑައިގަންނަވަނީ އެހެން ސިޔާސީ ޕާޓީތަކެކޭވެސް އެއްފަދައިން ކަރުދާހުގައި ފާހަގަޖަހައިގެން ވޯޓުލާ އުސޫލަށް އިންތިހާބު ބަދަލުކޮށްދިނުމަށެވެ. މިއީ ޕާޓީގެ އެތެރޭގެ ޑިމޮކްރެސީ އާއި ޓްރާންސްޕޭރެންސީ ހަރުދަނާކޮށް، ގެއްލިފައިވާ އިތުބާރު އަލުން ހޯދުމަށް މުހިންމު ކަމެއް ކަމަށް އޭނާ ވިދާޅުވިއެވެ.
މި އިންތިހާބުގައި ޑރ. އިކްރާމާ ވާދަކުރައްވަނީ ޕާޓީގެ މިހާރުގެ ނައިބު ރައީސް ޝައިހު މުހައްމަދު ޝިފާން އެވެ. އިކްރާމަކީ 2005 ވަނަ އަހަރުން ފެށިގެން ޕާޓީގައި އިސްކޮށް އުޅުއްވި، ގާނޫނީ ދާއިރާއިން ޕީއެޗްޑީ ހާސިލުކުރައްވައިގެން ހުންނެވި ބޭފުޅެކެވެ. އޭނާގެ ރަނިންމޭޓަކީ ސްޓޭޓް މިނިސްޓަރު މުހައްމަދު މުއްތަލިބެވެ.
