ގއ. ވިލިނގިލިން ގެއްލިގެން ހޯދަމުންދާ ޒުވާނާ އެންމެ ފަހުން ފެނިފަިއވަނީ އިއްޔެ ހަވީރުކަމަށް އެރަށުން މައުލޫމާތު ދީފިއެވެ.
ގެއްލިގެން ހޯދަމުންދަނީ އެރަށު ރަތްވިލާގޭ އަސްއަދު އަހުމަދުއެވެ. ފުލުހުންގެ ފަރާތުން އެނގިފައިވާ ގޮތުގައި އޭނާ ގެއްލިގެން އާއިލާއިން ފުލުހަށް ރިޕޯޓު ކޮށްފައިވަނީ ރޭ ދަންވަރު 01:10 ގައެވެ. އަދި ގެއްލިގެން ހޯދަމުންދަނީ 38 އަހަރުގެ ފިރިހެނެއް ކަމަަށްވެސް ފުލުހުންގެ ފަރާތުން ވަނީ މައުލޫމާތު ލިބިފައެވެ. އެހެންނަމަވެސް މިހާތަނަށް ކުރެއްވުނު މަސައްކަތުން އަދި އޭނާ ހޯދިފައެއް ނުވެއެވެ.
ވިލިނގިލީ ކައުންސިލް މެމްބަރަކު ވިދާޅުވީ އައްސަދު ފޯނަށް ކުރިން ގުޅޭ ކަމަށާއި ނަމަވެސް މިއަދު މެންދުރު އެކެއް ޖަހާކަންހާ އިރު ފަހުން އެއްގޮތަކަށް ވެސް ނުގުޅޭ ކަމަށެވެ. އެހެންވެ ފުލުހުންނާ ގުޅިގެން އޭނާ ހޯދުމުގެ މަސައްކަތް ކުރަމުންދާ ކަމަށެވެ.
އަދި ފޯނުން ލޮކޭޝަން ޓްރޭސްކޮށް ބަލަން ޖެހޭ ސަރަހައްދުތައް ވެސް ބަލަމުންދާ ކަމަށްވެސް ވަނީ ވިދާޅުވެފައެވެ.
އޭނާގެ އެއްވެސް މައުލޫމާތެއް ލިބުފައިވާނަމަ، ވީހާ އަވަހަކަށް ފުލުހުންގެ ހޮޓްލައިން 3322111 އަށް ނުވަތަ ޖެނެރަލް އިންވެސްޓިގޭޝަން ޑިޕާޓުމަންޓުގެ 9631696 ނަންބަރަށް ގުޅުއްވާ މައުލޫމާތު ހިއްސާކުރުމަށްވެސް ފުކުހުން ވަނީ އެދިފައެވެ.
