މޫދާއި ކަނޑަށް ކުނިއެޅުން ހުއްޓުވުމަށް ބާރު އެޅުމުގެ ގޮތުން މުޅި ރާއްޖޭގައި އައްސޭރިފަށް ސާފުކުރުމުގެ ބޮޑު ހަރަކާތެއް ފެށިގެން ކުރިއަށް އެބަދެއެވެ.
"މޯލްޑިވްސް ފޯ ދި އޯޝަންސް" މި ނަމުގައި ކުރިއަށްގެންދާ މި ހަރަކާތަކީ ޕާލޭ މޯލްޑިވްސްއާއި މިނިސްޓްރީ އޮފް އެޑިޔުކޭޝަން އަދި މޯލްޑިވްސް އެސޯސިއޭޝަން އޮފް ޓޫރިޒަމް އިންޑަސްޓްރީ (މަޓީ) ގުޅިގެން ކުރިއަށްގެންދާ ހަރަކާތެކެވެ. ދުނިޔޭގެ ކަނޑުތަކުގެ ދުވަހާގުޅުވައިގެން ކުރިއަށްގެންދާ މި ސާފުކުރުމުގެ ހަރަކާތް ކުރިއަށްދާނީ މިއަދު ހެނދުނު 6 އިން އިރުއޮއްސި 6 ޖެހުމާއި ހަމައަށެވެ.
ރިސޯޓްތައްވެސް ހިމެނޭހެން މި ހަރަކާތުގެ ތެރެއިން ރާއްޖޭގެ 250 އަށްވުރެ ގިނަ ރަށުގައި ބީޗްކްލީނަޕް ނުވަތަ އައްސޭރިފަށް ސާފުކުރުމުގެ ހަރަކާތްތައް ހިންގުމަށް ވަނީ ހަމަޖެހިފައެވެ. އަދި މިކަންކަން ހިނގަމުންދާއިރު، ޕަބްލިކް ސަރވިސް މީޑިއާ، ޕީ.އެސް.އެމް މެދުވެރިކޮށް ހެނދުނު 6 އިން އިރުއޮއްސި 6 އަކަށް ޓެލެތޯނެއްގެ ސިފައިގައި މި ހަރަކާތްތަކުގެ މަންޒަރުތަކާއި، މިކަންކަމާގުޅޭ މައުލޫމާތު ފޯރުކޮށްދޭނެއެވެ.
ޕާލޭ މޯލްޑިވްސްއިން ބުނިގޮތުގައި މި ހަރަކާތުގައި މައިގަނޑު 4 އިވެންޓުގައި ކަނޑުވެށި ރައްކާތެރިކުރުމާގުޅޭ އައު ރެކޯޑްތަކެއް ޤާއިމުކުރުމަށް ވަނީ އަމާޒުކޮށްފައެވެ. އަދި މި އަމާޒުތަކަށް ވާޞިލުވަމުންދާ މިންވަރު ޓީވީ، ރޭޑިއޯއާއި ސޯޝަލް މީޑިއާގައި ވަގުތުން ހިއްސާކުރަމުންދާނެކަމަށްވެސް މިކަން އިންތިޒާމްކުރާ ފަރާތުން ބުނެއެވެ.
ޕާލޭ ފޯ ދަ އޯޝަންސް އަކީ ކަނޑުތަކަށް ޕްލާސްޓިކް ކުނިީގެ ސަބަބުން ދިމާވާ ނޭދެވޭ އަސަރުތަކުން ރާއްޖޭގެ ކަނޑުތައް ރައްކާތެރި ކުރުމަށް މަސައްކަތް ކުރާ ޖަމިއްޔާއެކެވެ.
