ދިވެހިރާއްޖޭގެ ކަންކަން ހިނގާގޮތުން ރައްޔިތުން ކަންކަމުގައި ދެކޭގޮތް ތަފާތުވަމުން އަންނަކަން ފާހަގަކުރެވެއެވެ. މިގޮތުން ސިޔާސީ ގޮތުންނާއި އިޖްތިމާއީ ގޮތުން ގައުމުގައި ކަންކަން ހިނގަމުންދާ ގޮތް ބަލަން ތިބެ، ކަންކަމާމެދު ވިސްނާ ފިކުރުކުރުމުން ކުރިންތޯ، މިހާރުތޯ ރަނގަޅީ މިވަނީ ބަހުސްއަކަަށް ވެފައެވެ. ކުރިން މި ނިސްބަތް ކުރަނީ ރައީސް މައުމޫންގެ 30 އަހަރަށެވެ. އަދި މިހާރު މި ނިސްބަތްކުރަނީ ރައީސް މައުމޫންގެ ވެރިކަމަށްފަހު މި ހޭދަވި ދުވަސްތަކަށެވެ.
ގިނަ ރައްޔިތުން ދެކޭގޮތުގައި ދިވެހިވަންތަކަމާއި ޤައުމުދެކެ ލޯބިވުމާއި ވެރީންނަށް އިޙްތިރާމްކުރުން ފަދަ ކަންކަން މިހާރަށްވުރެ އެދުވަސްތަކުގައި މާބޮަޑަށްވެސް ރަނގަޅެވެ. އަދި ޤައުމު ތަރައްޤީކުރަމުން ގެންދިޔައީ މާސިންގާ ދަރަނިވާ ވަރުގެ ލޯންތައް ނުނަގައެވެ. އެންމެ ފާހަގަށްލެވޭކަމަކީ، ރާއްޖެ ވަކި ޤައުމަކަށް ބަރޯސާނުވެ ހުރިހާ ޤައުމުތަކާއި ގުޅުންބަދަހިކޮށްގެން ކުރިއަށްގެންދެވި ފޮރިން ޕޮލިސީގެ ހިތްގައިމުކަމެވެ. ރައީސް މައުމޫންގެ ފޮރިން ސިޔާސަތަށް ރާއްޖޭގެ ފުންނާބުއުސް ތަފާތު ޢިލްމުވެރި ބޭފުޅުން އެކިއެކި ފޯރަމްތަކުގައި އަންނަނީ ތަޢުރީފްކޮށް ވާހަކަ ދައްކަމުންނެވެ.
ސިޔާސީ ގޮތުން މީހުންނާ ދިމާކުރުމާއި އަޚްލާގީގޮތުން ދަށްފެންވަރުގެ ޢަމަލުތައް ފެނުން މިހާރު އާންމުވެއްޖެއެވެ. އެއްވެސް މީހަކު އަނެކާއަށް އިޙްތިރާމްކުރުމެއްނެތެވެ. އެމީހަކު ބޭނުންގޮތަކަށް އުޅެމުންގެންދަންވީއެވެ.
ޤައުމަކަށްވީތީ ފާހަގަކުރަމުންގެންދާ މިނިވަން ދުވަސް، ޤައުމީ ދުވަސް ފަދަ ދުވަސްތައް ފާހަގަކުރުން ފަނޑުވެއްޖެއެވެ. އެއްވެސްކަހަލަ އާރޯކަމެއްނެތެވެ. ރީތި ޤައުމީވަންތަ ލަވައެއް ކަންފަތުގައި ޖެހުން ބިލާހަކަށްވެއްޖެއެވެ.
ރާއްޖޭގެ ރަށްރަށް ސާފުކޮށްބޭއްވުމަށް ރައްޔިތުން ކުރަމުންއައި ޤައުމީ މަސައްކަތް އުޖޫރަ ދިނުމުން ނޫނީ ނުކުރާގޮތަށް ހަމަޖެހި ނިމިއްޖެއެވެ. މިރީތި އާދަ ހުރިހާ ރަށަކުންމެ ހެން ނެތިގޮސްފިއެވެ.
ތަރައްޤީއަށް ބަލާއިރު ޞިއްޙީ ނިޒާމް މިވަނީ ފެއިލްވެެފައެވެ. ކުރިން އަތޮޅުތަކުގެ ހޮސްޕިޓަލްތަކުންނާއި ޞިއްޙީ މަރުކަޒުތަކުން ކުރަމުން އައި ކަންކަން މިހާރު ނުކުރެވޭކަމީ މިކަމުގެ ހެއްކެކެވެ.
ދީނީގޮތުންވެސް ފެންނަނީ ހިތްގައިމު މަންޒަރެއްނޫނެވެ. އެމީހަކު ބޭނުން ހުކުމެއް ބޭނުންކަމަކަށް ނެރެންވީއެވެ. އެކަން މަނާކުރެވޭނެފަދަ ކޮންޓްރޯލެއް ދައުލަތުގައިނެތެވެ. ޢިލްމުވެރިންވެސް ސިޔާސީވެ ކަންކަމުގައި އިތުބާރުގެއްލި އެބޭފުޅުންނަށް އިޙްތިރާމްކުރާބަޔަކުނެތެވެ. ސޯޝަލް މީޑީޔާތަކުގައި އެވެރިންނަށް ނުކިޔާ ހަޑިއެއްޗެއްނެތެވެ. ގައުމުގެ ފޭރާން ވީދިގެންދިޔަ މިންވަރު ވަޒަންކޮށްލަން މިކަން ފުދޭނެއެވެ.
ކުޅިވަރުގެ ކަންކަމަށް ބަލާލަމާ ހިނގާށެވެ. މާލޭގައި އަދިވެސް ހުރީ އެންމެ އިންޑޯ ސްޓޭޑިއަމްއެކެވެ. އެއީ ސޯޝަލް ސެންޓަރ އިންޑޯ ހޯލެވެ. ބާސްކެޓްބޯޅަ މުބާރާތެއް މިވަގުތު ސޯޝަލްސެންޓަރުގައި އެދަނީ ކުރިއަށެވެ. އެހެންކަމުން، ވޮލީޓީމް އެތިބީ ޕްރެކްޓިސް ކުރާނެތަނެއްނެތި މަގުމަތިވެފައެވެ. އިތުރު އިންޑޯއެއް މިހާ މުހިއްމުކަން އެނގިތިބެ މިކަންނުކުރެވި ވާކަމީ ހިތާމަކުރަންޖެހޭކަމެކެވެ. ރައީސް މައުމޫންގެ ވެރިކަން ނިމި އެތައް ސަރުކާރެއް އައިސްފިއެވެ.
ފުޓްބޯޅައިގެ ފޯރި ނެތި ގޮސްފިއެވެ. ޤައުމީ ޓީމްކުޅޭ މެޗްތަކަށް މީހުން ވަންނަ އަދަދުން މިކަން އަންދާޒާ ކުރެވޭނެއެވެ. ޤައުމީ ޓީމަށް އެރުމުން ކުޅުންތެރިންނަށް ލިބޭ ޝަރަފަކީ ކިހާވަރެއްގެ ކަމެއްކަން އެކުޅުންތެރިންނަށް މިހާރު ނޭނގޭއޭ ވެސް ބުނެވޭ ފެންވަރަށް ކުޅުންތެރިންގެ އަމަލުތަކުން ހާމަވެއެވެ. މުސާރަ ލިބޭތީ ކުރާކަމަކަށް މިކަންވެސްވެ ނިމިގެންދިޔައީއެވެ.
މާލޭގެ މަގުތަކުގެ ޕޭމަންޓު މަތިން ހިނގަމުން ކުރިއަށްދާއިރު، ތިބާ ގަޔަށް ފެންތިކި ނުޖަހާ މަގެއް ގޯޅިއެއް އޮންނާނެތޯ ޗެކްކޮށް ލަބަލާށެވެ. ދިޔަދޮވިތަކުންނާ އޭސީ އައުޓްޑޯ ޔުނިޓްތަކުން ފައިބާ ފެނުން ނުތެމި ނުދެވޭނެއެވެ. މިނިސްޓަރ އުމަރު ޒާހިރުމެން މިކަންކަމުގައި ޤަވާއިދުން ފިޔަވަޅުއަޅުއްވާ ކަންކަން އިންތިޒާމް ކުރެއްވިގޮތް މާރަނގަޅެއްނޫންތޯއެވެ.
އަދިވެސް ބުނެލަންހެއްޔެވެ. ކޮންމެ ރަށަކުން މަހަށްފުރާ އޮޑީގެ އަދަދާއި ބޭނި މަހުގެ ހިސާބު އެރަށެއްގެ އޮފީހުން މޮނީޓަރކޮށް އަތޮޅު އޮފީހަށް ރިޕޯޓްކުރާނެއެވެ. ވިސްނާލަބަލާށެވެ. ޓެކްނޮލޮޖީގެ ގޮތުން ކުރިއަރާފައި މިއޮތް ޒަމާނުގައި މިކަންކުރަން ފަސޭހައިރުވެސް މިކަންކުރާ ރަށެއް އަތޮޅެއް ނެތެވެ. ޙަޤީގަތުގައި މިކަންކުރުމުން ލިބޭ މަޢުލޫމާތަކީ ޤައުމުގެ ކަންކަން ޕްލޭންކުރުމަށް ބޭނުންވާނެ ނުހަނު ބޭނުންތެރި މަޢުލޫމާތެކެވެ. މިބާވަތުގެ ކުދިކުދި ކަންތައްތަކުން ވެސް އޭރުގެ ހިންގުންތެރިކަމާއި މިހާރުގެ ހިންގުންތެރިކަން ވަޒަންކޮއްލެވެއެވެ.
މިދެންނެވި ހުރިހާ ކަމަކަށް ވިސްނާ ފިކުރުކޮއްލުމުން 'ކުރިން މާރަނގަޅޭ' ނުބުނެވޭނޭ ހެއްޔެވެ؟
