ދުނިޔެއަށް އަންނަމުންދާ ހަލުވި ތަރައްޤީއާއި، ތަހްޒީބްގެ ކުލަވަރުތަކާއެކު، އިޖްތިމާޢީ ވިއުގަތައް ބޭނުންކުރުން މިވަނީ އާއްމުވެފައެވެ. އެ ވިއުގަތަކަކީ އަޅުގަނޑުމެންގެ ދިރިއުޅުމާ ވަކި ނުކުރެވޭފަދަ އެއްޗަކަށްވަނީ ވެފައެވެ. މި އިޖްތިމާޢީ ވިއުގަތައް ބޭނުންކުރެވެނީ އިންޓަރނެޓް ޒަރީއާއިން، މޮބައިލް ފޯން ނުވަތަ ކޮންމެވެސް އިލެކްޓްރޯނިކް ޑިވައިސްއެއް މެދުވެރިކޮށެވެ. މިފަދަ ވަޞީލަތްތަކަކީ، އޭގެ ބޭނުން ރަނގަޅުގޮތުގައި ނުހިފިއްޖެނަމަ ވަރަށް ނުރައްކާތެރި ވަޞީލަތްތަކެކެވެ.
އިންޓަރނެޓް ވިއުގައިގެ ތެރޭން މޮބައިލް ފޯން ފަދަ އިލެކްޓްރޯނިކް ޑިވައިސްތައް ތަޢާރަފްވެ އާއްމުވެގެން ދިއުމުގެ ސަބަބުން އެންމެ ބޮޑު ނިކަމެތިކަމެއް ލިބުނީ އާއިލާތަކަށޭ ދެންނެވުމީ ކުށަކަށް ނުވާނެއެވެ. މާޒީގެ ޞަފްޙާތަކަށް ނަޒަރުހިންގާލުމުން ފެނިގެންގޮސްފައިވަނީ ނުހަނު ހިތްގައިމު މަންޒަތަކެކެވެ. އާއިލާ އެންމެން އެކުގައި ކައިބޮއި ހަދާ މަންޒަރެވެ. ހުކުރު ދުވަހެއް ނުވަތަ ބަންދު ދުވަހެއް އަތުވެއްޖެނަމަ ތިމާގެ މީހުންނާއި، ރަޙްމަތްތެރިންގެ ގޭގެއަށް ޒިޔާރަތްކޮށް އެކަކު އަނެކަކަށްފެނި ޙާލުއަހުވާލު ބަލައިއުޅުނު ހިތްގައިމު ގޮތްތަކެވެ. ނަމަވެސް މިއަދު ޙާލަތު ބަދަލުވެއްޖެއެވެ. ދެމަފިރިން ހޭބޯ ނާރާ މަސައްކަަތުގައި ވަގުތު ހޭދަކުރުމަށްފަހު އާއިލާއާއެކު ވަގުތު ހޭދަކޮށްލުމަށް ލިބޭ މަދު ވަގުތުކޮޅުގައިވެސް ގެއަށް ފުރަތަމަ ވަދެވުމާއެކު ފުރަތަމަވެސް ހުޅުވާލެވެނީ މޮބައިލް ފޯނެވެ. ގޭގެ ތިބޭ ޅަދަރިންވެސް ތިބެނީ މޮބައިލް ފޯން ނުވަތަ ޓެބްލެޓް ޖާދޫގައި ނިކަން ރަނގަޅަށް ޖެހިފައެވެ. ނަތީޖާއަކަށް ވެގެންދަނީ މައިންބަފައިން ދަރިންނާ އޮންނަ ގުޅުން ނުހަނު ބޮޑަށް ހީނަރުވެގެން ދިއުމެވެ. މިކަމުގެ ސަބަބުން ދަރިން ނުބައި އޮއިވަރުތަކުގައި ޖެހި އޮޔާ ދިއުން އޮންނާނީ ވަރަށްވެސް ގާތުގައެވެ.
މިހާރު އެންމެ ގިނަ ބަޔަކު ބޭނުންކުރާ ބައެއް އިޖްތިމާޢީ ވިއުގަތަކަކީ، ފޭސްބުކް، ޓްވިޓަރ، ސްނެޕް އަދި އިންސްޓަގްރާމް އެވެ. މި ވިއުގަތައް ބޭނުންކުރާ ޒްވާނުން އެންމެ ގިނައިން ކޮށް އުޅޭ ކަމަކީ، ފޮޓޯ އަޕްލޯޑްކުރުމޭ ދެންނެވިދާނެ އެވެ. ނަމަވެސް ހިތާމައަކީ، ޕްރޮފައިލް ފޮޮޓޯއާއި، އަލްބަމަށް ފޮޓޯ ލާއިރު ފަރުވާތެރި ނުވުމެވެ. އެހެންމީހުން ނުރުހޭ ބޮލަށް ތުރާވާ ޒާތުގެ މަންޒަރު ހިމެނޭ ފޮޓޯއާއި، ބޭއަދަބީ ފޮޓޯ ލުމަކީ، ތިމާ ފަޟީޙަތްވެ ބޭޒާރުވެދާނެ ކަމެއްކަމުގައިވެސް ވިސްނާ ނުލާތީއެެވެ. ސާބިތު ނުހިފޭ ދޮގު މަޢުލޫމާތު ފެތުރުމާއި، އަނެކާގެ އަބުރު ކަތިލުން މިވަނީ އާއްމުކަމަކަށް ވެފައެވެ. މިފަދަ ޢަމަލުތައް ހިންގާ ފަރާތްތަކުން ފަހުން އެކަމުން ކުރާނެ ނޭދެވޭ އަސަރަކާމެދު ވިސްނާލާ ތަނެއް ނުފެނެއެވެ. މިފަދަ ޢަމަލުތަކުން އެއްކިބާވެ އިޖްތިމާޢީ ވިއުގަތަކުން ލިބެން ހުންނަ މަޢުލޫމާތު މުއްސަނދިކޮށްދޭ ލިޔުންތަކާ ވީޑިއޯތައް ބެލުމަށް ސަމާލުކަންދޭންޖެހެއެވެ.
އިޖްތިމާޢީ ވިއުތަކަށް ވަންނަން ބޭނުންކުރާ ޑިވައިސްތަކަކީ ހެކަރުން ނުވަތަ ސައިބާ ކްރައިމް ހިންގާ ފަރާތްތަކުގެ ޝިކާރައަކަށް ވެފައިވާ ޑިވައިސަތަކެކެވެ. މިފަދަ ސައިބާ ތްރެޑްތަކަށް ބަލާއިރު އިޖްތިމާޢީ ވިއުގަތަކުގައި ޝާއިޢުކުރެވިފައިވާ ޕޯސްޓްސް، ލައިކްސް، އަދި ފޮލޯކުރަމުންދާ ޕޭޖްތަކަށްކުރެ އެވެ. ހަމަ މިއާއެކު، ސްޕޭމް އީމެއިލްތައް ލިބުމަކީ އާއްމުކަމެކެވެ. މިފަދަ ގިނަ އީމެއިލްތަކުގައި ގޮތް ނޭންގޭ ލިންކުތައް ހިމަނާފައި ހުރެއެވެ. ގިނަ ފަހަރަށް މިފަދަ ލިންކުތަކަށް ފިއްތާލުމުން ވަދެވޭ ސައިޓްތަކަކީ، ވައިރަހުން ފުރިފައިވާ ސައިޓްތަކެކެވެ. ނުވަތަ އެލިންކްތަކަށް ފިއްތާލުމުން ރައްކާކުރެވިފައިވާ ސިއްރު މަޢުލޫމާތައް ފޭރިގަނެ އެވެ. ބެންކް އެކައުންޓްގައި ހުރި ފައިސާކޮޅު ވީނުވީއެއް ނޭންގި ގެއްލިގެން ދެއެވެ. އެހެންކަމުން އިޖްތިމާޢީ ވިއުގަތަކުގެ ބޭނުންކުރާ އިރު ކުރިމއަތިވެފައިވާ މިފަދަ މައްސަލަތަކާމެދު ލޯހުޅުވިފައިވާ ބަޔަކަށް ވާން އެބަޖެހެއެވެ.
އިޖްތިމާޢި ވިއުގަތަކަކީ، ވަރަށް ފުޅާ ދާއިރާއެއްގައި ކުޑަ ކުދިންވެސް ބޭނުން ކުރަމުން އަންނަ އެއްޗެކެވެ. އިޖްތިމާޢީ ވިއުގަތަކުގެ ބޭނުން ކުޑަ ކުދިންނާއި ބޮޑެތި މީހުން ހިފަމުން ދާއިރު މީގެ ނާޖާއިޒް ފައިދާ ނެގުން އިތުރުވެ ކަންބޮޑުވުންތައްވަނީ އިތުރުވެފައެވެ. ދާދި މިދާކަށް ދުވަހު މީޑިޔާތަކުގައި ތިލަވެގެން ދިޔަ ޚަބަރަކީ، އުމުރުން 50 އަށްވުރެ މަތީއުމުރުގެ ފިރިހެެނަކު އެންމެ 11 އަހަރުގެ ކުޑަ އަންހެންކުއްޖަކު ގްރޫމްކޮށްގެން އެ ކުއްޖާ ރޭޕްގެ ޝިކާރައަކަށް ހަދައިލިގޮތުގެ ވާހަކައެވެ. ފުރާވަރުގެ ފޮނި އުއްމީދުތައް ދެކެމުން އައި މި ކުޑަކުއްޖާއާއި އެކުއްޖާގެ އާއިލާގެ ދެކެމުން އައި ހުވަފެންތައް ވެއްޔާ މޮޑެވިގެން ދިޔައީއެވެ. މުޖްތަމަޢުއަށް ބޭޒާރުވެ މަލާމާތާ ފުރައްސާރައާ ކުރިމަތިލާންޖެހުނީއެވެ.
އެހެންކަމުން މައިންބަފައިން ދަރިން އިޖްތިމާޢީ ވިއުގަތައް ބޭނުންކުރާ ގޮތާމެދު ވަރަށް ބޮޑަށް ފާރަވެރިވެ ކުރަންވީ ކަންތަކާއި، ނުކުރަންވީ ކަންތައް ކުދިންނަށް ބުނެދޭންޖެހެއެވެ. އަދި ޕޭރަންޓަލް ކޮންޓްރޯލް ނިޒާމެއް ޤާއިމްކުރަންޖެހެ އެވެ. ޕޭރެންޓަލް ކޮންޓްރޯލް ޤާއިމްކުރުމުން ކުދިން ބޭނުންކުރާ ސައިޓްތަކާއި ބެލޭނެ ތަކެތި ކޮންޓްރޯލްކުރެވޭނެއެވެ. އެގޮތުން ވަކި ވެބްސައިޓްތަކާއި އުމުރާނުގުޅޭ ތަކެތި ނުބެލޭނެ އިންތިޒާމެއް އެކަށައެޅޭނެއެވެ.
