ޤާސިމްގެ ވެރިކަމެއްގަ މެސީ އައިސް ގަލޮޅު ދަނޑުގަ ފުޓްބޯޅަ މެޗެއް ކުޅޭނެ ކަމަށަ ކުރީގެ މަޖިލިސް މެންބަރު ރިޔާޒް ރަޝީދު ވިދާޅުވެއްޖެއެވެ.
ގާނޫނު އަސާސީއާ އެއްގޮތަށް ރާއްޖޭގައި ވެރިކަން ކުރެވޭނެ ހަމައެކަނި ލީޑަރަކީ ޖުމްހޫރީ ޕާޓީގެ ކެންޑިޑޭޓް އޮނަރަބަލް ގާސިމް އިބްރާހީމް ކަމަށް ޖޭޕީގެ ލީޑަރުގެ ސްޕެޝަލް އެޑްވައިޒަރ ރިޔާޒް ރަޝީދު ވިދާޅުވެއްޖެއެވެ.
"ހާސްކަނޑާލާ. ހަމަޖެހޭނެ" މިޝިޢާރުގެ ދަށުން ޖުމްހޫރީ ޕާޓީން ސިލްސިލާކޮށް ބާއްވަމުން އަންނަ ޖަލްސާތަކުގެ ތެރެއިން މިރޭ ސަލްޓަން ޕާކުގައި ބޭއްވި އެ ޕާޓީގެ ޖަލްސާއެއްގައި ވާހަކަ ދައްކަވަމުން ރިޔާޒް ރަޝީދު އިތުރަށް ވިދާޅުވީ ޕޯޑިއަމްތަކުން ފެންނަން ކޮންމެ ފަހަރަކު ސިޔާސީ ގިނަ ބޭފުޅުންގެ ހިތްތަކަށް އަސަރުކުރުވާނެ ކަމަށެވެ.
ގާނޫނު އަސާސީއާ އެއްގޮތަށް ރާއްޖޭގައި ވެރިކަން ގާސިމް ކުރައްވާނެ ކަމަށާއި ވަކިވެފައިވާ ތިން ބާރާއެކު ރައްޔިތުންނަށް ހެޔޮ ވެރިކަމެއް އެމަނިކުފާނު ކޮށްދެއްވާނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް ރިޔާޒް ވިދާޅުވިއެވެ.
މި ޖަލްސާގައި ޒުވާނުންނާ މުޚާތަބުކޮށް ވާހަކަ ދައްކަވަމުން ރިޔާޒް ވިދާޅުވީ ޒުވާނުންނަށް އެންމެ ފަހި ފުރުސަތެއް ލިބިގެންދާނީ ޖުމްހޫރީ ޕާޓީން ކަމަށާއި ޕާޓީއާ ގުޅިވަޑައިގަންނަވާ ކޮންމެ ބޭފުޅަކަށް ދައުރެއް އަދާކުރެވޭނެ ކަމުގެ ޔަގީންކަން ލިބޭނެ ކަމަށެވެ.
