މިއަދު ސްކޫލްތަކުން ރިޕޯޓު ފޮތްދިނުމާއެކު ސްކޫލުތަކުގެ ބޮޑު ޗުއްޓީ ފެށުނީއެވެ. ދެން ސްކޫލްތައް ހުޅުވޭނީ ދޮޅު މަސް ދުވަސް ފަހުންނެވެ.
ރިޕޯޓް ފޯމް ލިބުނު އިރު ބައެއް ދަރިވަރުންގެ މޫނު މަތިން ފެނިގެން ގޮސްފައިވަނީ އެހާ އުފާވެރިކަމެއް ނޫނެވެ. ނަމަވެސް ޖުމްލަ ގޮތެއްގައި ގިނަ ދަރިވަރުންގެ މޫނު މަތިން ފެނިގެންދަނީ އުޖާލާ ކަމެވެ.
ހުރަވީ ސްކޫލަށް ދަރިވަރަކު ލާން ގޮސް ހުރި ބެލެނިވެރިޔަކު ސިފަ ކުރި ގޮތުގައި، އޭނާގެ ދަރިފުޅު މިއަދު ހުރީ ވަރަށް އުފަލުންނެވެ. އެއީ އޭނާގެ ނަތީޖާވެސް ރަނގަޅުވެފައި މުޅި ޗުއްޓީ އެއްކޮށް ހޭދަކޮށްލަން އޭނާގެ ރަށަށް ދެވޭތީ ކަމަށެވެ.
ދަރިވަރުން ޗުއްޓީއަށް ދާއިރު ވިސްނަންވީ، މިއަހަރުގެ ނަތީޖާ ކޮންމެ ގޮތަކަށް އޮތް ކަމުގައި ވިޔަސް އަންނަ އަހަރަކީ މިއަށްވުރެ މާ އުޖާލާ އަހަރަކަށް ވާނެ ކަމަށެވެ. ބުރަ މަސައްކަތްކޮށް ރަނގަޅު ނަތީޖާއެއް ނުލިބުމުން ހަމަ ކޮންމެ ކުއްޖަކުވެސް ދެރަވާނެއެވެ. ނަމަވެސް އަބަދުވެސް އުއްމީދު އާލާ ކުރަންޖެހޭނީ މާދަމާ އަށެވެ. އެކި ކުދިން ކިޔެވުމަށް ހުންނަ ޝައުޤުވެރިކަމާއި، ތޫނުފިލިކަން ހުންނާނީ އެކި މިންވަރަށެވެ، އެކަމަކީ ޤަބޫލު ކުރަންޖެހޭ ޙަޤީޤަތެކެވެ. ބުއްދިވެރިންނަކީ ދިރިއުޅުމުގައި ދިމާވާ ކޮންމެ ކަމަކީވެސް އިމްތިޙާނެއް ކަމުގައި ބަަލައިގަނެ، މުސްތަޤްބަލަށްޓަކައި އަޅަންޖެހޭ ފިޔަވަޅުތައް ވަރުގަދަ ކުރާ މީހާއެވެ. އާ ޢަޒްމަކާއި އާ އުންމީދަކާ އެކު އާ ޖޯޝެއްލައި މަސައްކަތް ފެށުމަކީ ކުރިއަށް އޮތްތަަނުގައި ރަގަޅު ނަތީޖާއަކަށް ވާސިލުވުމަށް ކޮށާލެވޭނެ ރާސްތާ މަގެކެވެ.
ދަރިވަރުން ހިތްހަމަ ޖައްސާލާ އުފާކޮށްލާ ހަދާލަން ހިތްގައިމު ދުވަސްތަކެއް ލިބުމަކީ، އަންނަ ދިރާސީ އަހަރަށް ކުދިންގެ ސިކުނޑިތައް ތާޒާކޮށްލަން ލިބޭ ރަނުގެ ފުރުޞަތެކެވެ. މުޅި އަހަރު ދުވަހުގެ ތެރޭގައި ވަރަށް ބުރަކޮށް އުޅުމަށްފަހު، މި ގޮތަށް ދުވަސްތަކެއް ލިބިގެން ދިއުމަކީ މުހިއްމު ކަމެކެވެ.
